Kolmanskop​—Diin ang Balas ug Taya Nagakutkot

Diha sa ugang balas nga Disyerto sa Namib, duol sa hanginon nga baybayon sa habagatang Namibia, nahimutang ang mingaw nga kalumpagan sa usa ka lungsod nga gipuy-an niadto sa dimomenos 50 ka tuig​—ang Kolmanskop.

Sa dihang nadiskobrehan dinhi ang mga brilyante niadtong 1908, ang mga tigsuhid ug mina, mga dagkong tawo sa mina, ug ang nagkalainlaing katahapang mga tawo mihugop dayon dinhi nga samag mga buwitri. Wala magdugay, ang Kolmanskop nahimong mauswagong lungsod, kompleto sa dagkong kolonyal-nga-Alemang mga balay, post office, ug kaugalingong mga hotel. Ang Kolmanskop duna ganiy duha ka andanang kasino, sinihan ug bolingan​—mga kaluho nga nagpahimo sa kinabuhi nga mas makalilipay diha niining hilit nga Disyerto sa Namib.

Apan ang katarongan sa paglungtad sa Kolmanskop maoy mitultol niini sa pagkawagtang. Ang mga mina nahutdan dayon ug mahalong mga bato sa bililhon nga gidak-on ug kalidad. Ang mga tigsuhid ug mina sa wala madugay nadani samtang nadiskobrehan ang mas dako ug mas maayog klaseng mga brilyante sa laing dapit. Dugang pa, sa sayong katuigan sa 1900 mibahar ang prisyo sa mga brilyante. Ang kinabuhi sa lungsod sa hinayhinay nagkaluya nga hangtod sa kadugayan, sa 1956, ang Kolmanskop giabandonar.

Karon, ang wala na gamitang mga makina gitaya ubos sa naglagiting nga kainit sa adlaw sa Aprika​—usa ka kabilin sa daklit nga panglimbasog sa tawo sa pagkalot ug bahandi gikan sa yuta. Ang Kolmanskop sa ingon nagsilbing dayag nga pahinumdom sa kakawangan sa pagpangitag mga bahandi sa yuta. Si Jesus miingon: “Pagtigom kamog mga bahandi sa langit, diin walay tangkob ug taya ang magakutkot.”​—Mateo 6:20.