Pagbasol sa Simbahan Nagyagyag sa Halalom nga Pagkabahin
“AKO nagakumpisal sa atubangan nimo ug sa atubangan sa Ginoo dili lamang sa akong sala ug pagkasad-an . . . apan—ingong nagahawas—ako usab nagapangarisgar sa paghimo niini alang sa Dutch Reformed Church.” Si Propesor Willie Jonker, nagpangunang ministro sa Dutch Reformed, naghanyag niining makapakurat publikong pagbasol atubangan sa nasodnong komperensiya sa mga simbahan niadtong Nobyembre 6, 1990, sa Rustenburg, Habagatang Aprika. Ug sa unsang mga sala si Jonker nagapunting? Sa “politikal, sosyal, ekonomiko, ug organisasyonal nga mga inhustisya nga nahimo” tungod sa polisa sa pagpihig sa rasa sa Habagatang Aprika.
“Ako mibating libre sa paghimo niini,” padayon sa propesor, “tungod kay ang Dutch Reformed Church nagdeklarar diha sa iyang bag-o pang konsilyo nga ang pagpihig sa rasa usa ka sala, ug kini nakakumpisal sa iyang pagkasad-an.” Ugaling, ang kaylap nga reaksiyon sa pagbasol ni Jonker nagatimaan nga daghan sa mga sumusunod sa simbahan bug-os nga wala makauyon sa mga pahayag sa ilang simbahan labot sa pagpihig sa rasa.
Ang katarongan alang sa panagbangi mao nga ang Dutch Reformed Church sa Habagatang Aprika, kansang mga sakop kadaghanan puti nga mga Aprikaner, dugay nang nalambigit sa pagpihig sa rasa.
Hinoon, niadtong Oktubre 1986 ang konsilyo sa simbahan naghimo ug tagsaong kausaban sa iyang polisa pinaagi sa pagdeklarar nga ang simbahan bukas sa tanang rasa mga buot magpasakop ug nga ang simbahan nasayop sa pagsulay paggamit sa Bibliya sa pagpakamatarong sa polisa sa pagpihig sa rasa. Dugang pa, niadtong 1990 ang konsilyo nagdeklarar nga ang simbahan “dapat tin-aw nga nagpahilayo sa iyang kaugalingon gikan niining panlantaw sa sayo pa” ug nga kini “mingdawat ug mikumpisal sa iyang kapakyasan sa paghimo niana.”
Ang pagbasol ni Jonker nagbuhi ug panagbangi, nagyagyag sa halalom nga pagkabahin sa opinyon sa simbahan bahin sa pagpihig ug rasa. Sa pagkatinuod, ang pagkabahin morag mihiwa lahos sa tanang ang-ang sa simbahan, gikan sa layko hangtod sa kanhi mga tsirman sa konsilyo heneral. Sa pagtubag sa pagbasol ni Jonker, si Willie Potgieter, usa ka ministro sa Dutch Reformed, mibati nga kana maoy “pagkawalay-pagbati ang paghimo sa maong butang sa kalit.” Siya miangkon nga katunga sa iyang kongregasyon sa gihapon nagalantaw sa pagpihig sa rasa ingong usa ka Kristohanong modelo nga mosaler.
Masabot, daghan sa mga sakop sa Dutch Reformed Church maoy nasubo tungod niining panagkabahin. Diha sa mga pulong sa usa ka nagbagulbol nga sakop kinsa misulat sa usa ka mantalaan sa Johannesburg, ang Beeld: “Panahon na nga kita . . . moluhod ug mohangyog kapasayloan tungod sa atong makasasalang pagkabahin ug sa tanang teribleng mga butang nga atong gikasulti sa usag usa.”
Ang maong panag-uyon walay kalagmitan, hinoon; ni ang Dutch Reformed Church mao lamang ang simbahan sa Habagatang Aprika ang gihapak sa maong mga pagkabahin. Ang panagbingkil niining gikatawag nga mga Kristiyano sa tino layo kaayo gikan sa gugma ug panaghiusa nga matud ni Jesus ilhanan sa iyang tinuod nga mga sumusunod.—Juan 17:20, 21, 26; itandi ang 1 Corinto 1:10.