Gikan sa Among mga Magbabasa

Tabang Alang sa Himalatyon Sanglit ako usa ka nars nga nagtrabaho diha sa usa ka ospital cardiology unit, ang inyong isyu sa Pagmata! sa “Tabang Alang sa Himalatyon” (Oktubre 22, 1991) nakapainteres kanako. Apan, gibati ko nga ang diyutayng sayop angay nga matul-id, kay kamo miingon: ‘Daghang doktor ang mihinapos nga nahiuyon sa maayong kagawian ang pagsibog sa sustansiya ug tubig nga [mga pluwido] gikan sa usa ka himalatyon, masakitong wala nay paglaom, o mga pasyenteng permanenteng walay panimuot.’ Ipasalig ko kaninyo nga kini mabangis ug masakit kaayo nga hunongon ang sustansiya ug tubig gikan sa tawong masakiton. Sa personal nga obserbasyon, ako makaingon nga kini mopahinabo ug labaw pa nga pag-antos.

M. S., Pransiya

Ang pahayag nga gikuwestiyon maoy kinutlo gikan sa “The New England Journal of Medicine” ug nagpabanaag sa panghunahuna sa daghang doktor. Ang mga doktor nagtuo nga daghan sa mga pasyenteng grabe ang pagkadaot-sa-utok dili na makabati sa kasakit ug pag-antos. Dugang pa, ang pagpadapat sa medikal nga sustansiya ug tubig nagkinahanglan ug maayong medikal nga katakos ug mopahinabog pagkadikomportable ug mga riyesgo. Busa ubay-ubayng mga doktor nagtuo nga diha sa pipila ka kahimtang, ang maong mga riyesgo molabaw pa sa mga kaayohan. Sa bisan unsang kahimtang, ang indibiduwal nga mga Kristohanon kinahanglang mohimog ilang kaugalingon mahunahunaong mga desisyon kon bahin na sa maong masakit ug mga isyu sa emosyon.​—⁠ED.

Bayente ka tuig kanhi gihimo ko ang desisyon nga isibog ang suporta sa kinabuhi gikan sa akong usa-ka-adlaw pa nga anak nga lalaki. Siya ahat nga gihimugso ug nadaot ang utok. Ako siyang gipanganak mismo sa balay, kay kami wala makaabot sa ospital. Dili ikabatbat ang gibati ko nga kaguol ug pagkasad-an nga gihambin ko sa katuigan. Apan pinaagi sa pagbasa sa mga artikulo, ako nahuwasan gikan sa akong gibating kabug-at sulod sa 20-anyos.

S. M., Tinipong Bansa

Mga Kombensiyon sa Sidlakang Uropa Ako natandog gayod sa mga serye sa “Mga Mahigugmaon sa Diyosnong Kagawasan Nagmaya sa Sidlakang Uropa.” (Disyembre 22, 1991) Kay gipadako ingong usa sa mga Saksi ni Jehova, ginabale-wala ko lamang ang espirituwal nga pagkaon nga among nadawat. Apan sa dihang nasayod sa paagi sa pagdawat sa mga Saksi sa Sidlakang Uropa sa mga publikasyon sa unang higayon diha sa ilang kaugalingong pinulongan nga daghan nang katuigang among nabatonan nakapaapresyar pa nako ug dugang sa pribilehiyo nga akong nabatonan nga nahimong bahin sa usa ka kahibulongang organisasyon.

T. O., Hapon

Pagbasa Ako 13 anyos. Ang artikulong “Basa Aron Molapad ang Imong Kalibotan” (Hulyo 22, 1991) mao gayod ang akong gikinahanglan. Naanad ako sa pagbasa sa mga pulong nga tinagsatagsa. Ang akong hunahuna kanunayng magsuroy-suroy, nga nagkinahanglang usbon ko pagbasa ang materyal aron masabtan ko kini. Ang inyong kahibulongang mga sugyot dako ug natabang.

A. K., Polandia

Pagbag-o sa mga Kriminal Ako dunay anak nga lalaki nga nabilanggo nga nakadawat ug suskrisyon sa Pagmata!, ug ako nag-ampo kanunay alang sa mga artikulo nga motugkad unta sa iyang kasingkasing. Akong gipabilhan gayod ang mga artikulong “Ang Gahom sa Kamatuoran sa Pagbag-o” (Hulyo 22, 1991) ug “Ako Niadto Usa ka Propesyonal nga Kawatan.” (Septiyembre 8, 1991) Ako nagabasa niana nga naghilak tungod sa halalom nga pagpasalamat ngadto sa Diyos, kinsa “nagatinguha sa tanan nga makakab-ot sa paghinulsol.” (2 Pedro 3:9) Malaomon, nga sa umaabot ang akong anak mobuhat sa ingon.

A. F., Tinipong Bansa

Kriket Ang kriket maoy usa sa among paborito nga kalingawan dinhi sa Caribbean. Apan ako nahibulong gayod sa pagkakita sa artikulong “Kriket o Besbol​—⁠Unsay Kalainan?” (Nobyembre 8, 1991) Wala gayod ako magdahom nga makakita sa maong artikulo diha sa magasin! Kadto impormatibo kaayo, ug sa paggamit lamang niini nga artikulo, ako nakapahimutang ug daghang kopya sa Pagmata! sa uban.

J. D., Jamaica