“Ako Mihilak Tungod sa Kalipay”
Ang mga Magbabasa Nagpahayag ug Halalom nga Apresasyon Alang sa “Pag-ayo sa mga Kadaot sa Pag-abusar sa Bata”
ANG bag-o pang serye sa mga artikulo sa magasing Pagmata! nakatandog sa daghang mga magbabasa sa tibuok kalibotan sa pagpahayag sa ilang kinasingkasing nga apresasyon sa serye sa ulohang “Pag-ayo sa mga Kadaot sa Pag-abusar sa Bata” sa Oktubre 8, 1991, nga Pagmata! Ang ilang mga sulat nagpakita nga kining maampingong pagkaandam nga materyal nakalampos sa iyang katuyoan, nga tulo ka pilo: (1) sa paghatag pagsabot ug paglaom alang sa mga biktima; (2) sa pagpasidaan sa mga ginikanan aron sila magmaigmat labot sa pagkaluwas sa ilang kabataan; (3) sa pagtabang sa mga ansiano nga nagaabag sa mga biktima sa pag-abusar sa pagbaton ug maayong impormasyon aron sila makahatag ug epektibong tabang.—Proverbio 21:13; itandi ang 27:23.
Ang tema nga gisublisubli sa daghang mga magbabasa gihulad pinaagi niining komentoha: “Ako nakaapresyar kanunay kay usa sa mga Saksi ni Jehova. Hinuon, ang akong apresasyon ug gugma kang Jehova ug sa iyang ‘matinumanon ug maalamong ulipon’ (Mateo 24:45-47) nadugangan ug usa ka gatos ka pilo human mabasa ang Oktubre 8, 1991, nga isyu sa Pagmata!”
“Si Jehova sa Pagkatinuod Nakasabot ug Nahigugma Pag-ayo”
Ubay-ubay ang nagpahayag sa ilang utang kabubut-on tungod sa labing importanteng bahin sa mga artikulo: nga ang Diyos nagapatalinghog, nahigugma, nahibalo nga ang biktima dili sad-an, ug arang makaayo. Usa ka magbabasa nag-ingon: “Salamat gikan sa kahiladman sa akong kasingkasing alang sa Oktubre 8 nga Pagmata! Ang inyong mga artikulo nagtabang kanako pinaagi sa pagpakita kanako nga si Jehova tinuod nga nakasabot ug dulot nga nahigugma.”—Britanya.
Usa ba babaye nagsulat: “Pila ka bulan sa miagi buot nakong mosulat mahitungod sa butang sa pag-ayo sa mga kadaot sa pag-abusar sa bata. Ako wala magsulat inay nag-ampo kang Jehova bahin niana. Nan, hunahunaa ra pagkadako sa akong kalipay sa dihang akong nakita ang hapin sa Oktubre 8 nga isyu. Ako nakahilak, ug nagpasalamat sa atong mahigugmaong Diyos, si Jehova, gikan sa kahiladman sa akong kasingkasing.”—Gresya.
Laing babaye nag-ingon: “Sa dihang ako maghunahuna mahitungod sa akong kaagi, ako pait nga mohilak. Mao nga ako nagbasa uban sa linain nga pagtagad sa mga serye mahitungod sa ‘Pag-ayo sa mga Kadaot sa Pag-abusar sa Bata,’ nga akong napalgan nga mapuslanon kaayo. Sila nagpakita sa tin-aw nga kamo may mahigugmaong kaikag kanila nga nagaantos sa samang mga butang sa ilang kinabuhi.”—Italya.
Daghan ang nagpahayag ning panghunahunaa: “Ako nagpasalamat kang Jehova tungod sa paghatag ning impormasyon, ang labing maayong mga artikulo nga akong nabasa masukad bahin sa ulohan. Ako nagaampo nga kini motabang dili lamang sa mga biktima (mga nakalabang) apan usab kanila nga may dulot nga kahadlok sa pagpakighisgot sa isyu ug nalisdan sa pagpakigsulti mahitungod sa ulohan.”—Tinipong Bansa.
“Gibati Nako nga ang Kinabuhi May Kapuslanan na Karon”
Usa ka babaye kansang anak nga babaye giabusaran wala pa makalingkawas sa suliran nianang pag-abusara. “Apan ang inyong mga artikulo nagpakita kanako sa paagi,” iyang saysay. “Ako may terapiya matag semana sulod sa 11 ka bulan tungod sa kabalaka, mga atake sa kalisang, ug kagul-anan. Kadtong mga artikuloha labaw nga nakaayo nako kaysa tanang terapiya sa kalibotan! Gibati nako nga ang kinabuhi may kapuslanan na karon, samtang sa wala pa mabasahi ang isyu, ako mibati gihapon ug pagkasad-an tungod sa usa ka butang nga wala nako masanta.”—Britanya.
Daghan nagsulti nga ang impormasyon maoy lisoanang punto sa ilang kinabuhi: “Dili paigo ang akong pasalamat tungod sa mga artikulo. Sila ming-abot sa dihang ako diha sa kinaubsan sa pagbati nga akong mahinumdoman. Pila ka mga adlaw ako motikuko ug mobakho. Salamat niining mga artikuloha, nga akong gibasa ug gibasa pag-usab, akong nasabtan nga ang akong kasakit, ug kasakit sa matag-usa, importante kang Jehova ug sa iyang organisasyon. Kining impormasyona nakahatag kanako ug kaisog sa pagsugod sa pagkaayo. Gibati na usab nako nga suod kang Jehova.”—Tinipong Bansa.
Apan ang pag-abusar sa bata dili lamang suliran sa Kasadpan, ingon sa gipakita niining pananglitan: “Sa dihang akong nadawat ang Oktubre 8 nga isyu bahin sa pag-abusar sa bata, dihadiha akong gibasa kana. Giabtan akog taastaas nga panahon sa pagbasa sa mga artikulo kay lugos nakong makita ang mga pulong tungod sa akong mga luha! Ang akong mga pagbati ug mga hunahuna didto mismo sa mga artikulo. Karon ako nalipay nga may usa nga nakasabot. Ako nadasig sa pagtan-aw sa unsang paagi si Jehova sa kamaayo nagatabang sa katawhan kansang mga pag-antos dili makita sa uban. Sa pagkatinuod ako mapasalamaton nga kamo nagpatik niining mga artikuloha. Sa pag-ayom sa akong mga samad, akong ipadapat kon unsay nasulat diha sa mga artikulo. Uban sa gugma ug mga pagbati sa pagpasalamat nga dili ikabungat.”—Hapon.
Laing babaye nagsulat: “Ako dugay nang nakigbisog sa emosyonal nga mga kadaot sa pag-abusar sa bata sa tibuok nakong kinabuhi. Sa dihang nadawat ko ang Oktubre 8 nga magasin, ako nangatarongan nga si Jehova nasayod kon unsay atong gikinahanglan bisan sa wala pa nato kini hangyoa ug siya nahigugma gayod kanato. Dili kaayo ako makakita tungod sa dagayday sa mga luha, ug ang akong kasingkasing morag mobuto sa kahupong sa gugma ug apresasyon alang sa atong mahigugmaon langitnong Amahan. Kining Oktubre 8 nga isyu sa magasin akong hamilion ‘hangtod ang daang mga butang dili na pagahinumdoman, ni sila mosantop pa sa kasingkasing.’” (Isaias 65:17)—Tinipong Bansa.
“Ako Napagawas sa Bilanggoan!”
Usa ka babaye nga nasamok pag-ayo sa dakong bahin sa iyang kinabuhi nagsulat: “Salamat kaninyo tungod sa mga artikulo bahin sa pag-abusar sa bata. Sa kataposan, sa pangedaron nga 53, ako napagawas sa bilanggoan! Ang yawi nga nagbukas alang kanako mao ang laray sa mga pulong nga nagpakita nga kining batan-ong mga biktima ‘walay kusog sa pagpanalipod sa ilang kaugalingon sa dihang hulgaon, busa ang Diyos wala nagatan-aw kanila ingong may tulubagon.’” Ang pagbasa sa Oktubre 8 nga Pagmata! ug pagkasabot sama sa pagpahayag sa magasin, “KADTO DILI IMONG SALA!” nagtabang kaniya sa pagpadapat sa halad lukat ni Jesus sa pagsugod sa iyang proseso sa pagkaayo.—Britanya.
Laing babaye nag-ingon: “Sukad niadtong ako gamay pa hangtod sa akong sayong mga katuigan sa elementarya nga tunghaan, ako balikbalik nga gihilabtan sa seksuwal. Sama sa gihisgotan sa mga artikulo, ako milikay sa paghunahuna. Ugaling, ang mga panumdoman padayon nga nagbalik. Kanunay akong maghunahuna: ‘Ako usa ka hugaw nga tawo. Si Jehova dili gayod modawat kanako.’ Busa ang akong pag-ampo sa Diyos kanunay nga: ‘Mahimong dili nimo ako hatagan ug luna sa Paraiso, apan unta tugotan ako bisan lamang magpabilin sa imong organisasyon hangtod sa akong kamatayon.’ Kini tungod sa paghunahuna, susama nilang mga biktima nga nahisgotan sa mga artikulo, nga ‘ako dili ra gayod hinlo nga mosulod sa Gingharian sa Diyos’ ug nga ako mamatay sa Armageddon. Kadto maoy morag ang mga pagbati sa kaulaw ug kaligutgot nagdugmok kanako sa kamatayon. Mao nga, ang mga unod sa mga artikulo, nga mabination ug malumingon, nagtabang kanako ug dako. Samtang ako silang gibasa, ang akong mga luha nag-agay.”—Hapon.
Laing babaye nag-ingon: “Buot ko kamong pasalamatan tungod sa inyong sensitibo ug maayong-pagkadukiduki nga mga artikulo. Sa mga katuigan, ang kasakit sa pag-abusar nakapasamok sa akong emosyon. Sayon alang sa uban sa pagsabot sa pag-abusar ug pagpaantos sa gubat ug politikal nga kaguliyang. Kita makasabot sa mga nakalabang sa Holocaust. Ang kadaot nga ipahinabo sa mga estranyo daling dawaton. Apan nganong ang pila dili makasabot sa dihang ang abusador maoy atong amahan, inahan, uyoan, igsoong babaye, igsoong lalaki—sila unta nga mopahupay, moatiman, ug mopanalipod kanato? Akong nakita ang akong mga uwat ug nakaila sa makahugno nga kamatuoran sa kawalay paglaom. Sa akong pagkaayo ang akong espirituwal nga Amahan, si Jehova, si kinsa sa matag panahon mipatindog sa akong nahugno nga kaugalingon, nagpugong nako gikan sa kalaglagan.”—Tinipong Bansa.
“Sa Kalit Ako Nabuhi!”
Usa ka babaye ang nag-ingon nga sulod sa 28 hataas nga mga tuig siya mibati nga morag siya gisalikway nagsulat: “Akong gibasa tanan ang mga artikulo sa gabii nga akong nadawat ang isyu ug naghilak kay natandog ug mapasalamaton. Ako malipayon kaayo sa paghunahuna nga si Jehova tin-aw kaayong nakasabot sa akong mga pagbati. Ako mibati nga morag sa kalit ako nabuhi! Tungod kay ang mga artikulo nagpasiugda nga ang kabataan sa maong kahimtang walay tulubagon sa kon unsay nahitabo, akong naamgohan nga ako walay rason sa pagpanghimaraot sa akong kaugalingon. Ang akong panghunahuna sa pagkatinuod nahupayan.” Ang iyang kasingkasing napalihok sa pagsanong sa pagkaayo gikan sa Pulong sa Diyos.—Hapon.
Ang panglugos sa bata suliran usab sa nagakaugmad nga kanasoran, sama sa gipamatud-an niining kokaamgid nga tubag gikan sa Aprika: “Ang mga artikulo ming-abot sa panahon nga gikinahanglan gayod nako sila. Pagkadakong kahupayan sa pagbasa sa mga pamulong sama sa, ‘magmasaligon nga dunay paglaom, nga ikaw mamaayo’ ug, ‘KADTO DILI IMONG SALA!’ Samtang gibasa nako ang mga artikulo, ako mibati nga luwas gayod ug nahupayan sa unang higayon sa akong kinabuhi. Sila nagdala ug tinuod nga kalinaw sa akong hunahuna, kalag, ug lawas. Karon ako may kusog sa pagpanaw sa dalan ngadto sa bug-os nga pagkaayo.”—Nigeria.
Laing babaye nagsulat: “Ang mga pulong dili makabatbat sa akong apresasyon ug kon unsa ang akong gibati human mabasa ang Oktubre 8 nga Pagmata! bahin sa pag-abusar sa bata. Ang akong mga mata napuno ug luha samtang akong gibasa ang matag parapo, matag panid, matag kasulatan. Kadto gisulat uban ang labihang paghunahuna, kalumo, ug gugma. Ingong usa ka biktima, ako nakigbisog batok sa akong mga pagbati ug emosyon. Karon ako mibati nga gikuha ang usa ka sukod sa gibug-aton sa kagul-anan. Salamat sa inyong mga artikulo ug sa kasaligan, mapailobong higala nga maminaw ug mohatag pagpaluyo, ako makatugot sa pagsugod sa pagkaayo.” Ang Diyos sa dili-takos nga kalulot, pinaagi sa saserdotehanong pag-alagad sa iyang Anak, naghimo sa samang daghang mga biktima nga “dili matarog” ug “malig-on.” (1 Pedro 5:6-11)—Tinipong Bansa.
Usa ka giunay nga biktima nalibog kaayo nga iyang gisulayan sa paghikog pinaagi sa pagsunog sa garahe samtang siya didto sa sulod. Siya natabang ug naospital. Sa paggawas gayod sa Oktubre 8 nga isyu, gidala kadto kaniya. Siya mihilak pag-ayo sa dihang iyang nabasa kadto, ug unya gisublisubli niyag basa ang mga artikulo alang sa pagpaluyo, nga nagtabang kaniya sa pagbuntog sa kiling sa paghikog. Ang higala niya nga nagtabang ug dako kaniya nagsulat: “Usahay akong gihunahuna ang Pagmata! angay nga alid-an ang ngalan ug Sagubang kay sa tino mao kanay iyang gitabang kanato.”—Tinipong Bansa.
“Ang Pila Makalimot, ang Uban Dili”
Laing mapabilhong magbabasa may ikasulti: “Ang mga artikulo bahin sa pag-abusar sa bata balanse kaayo. Akong gipabilhan ang mga kasulatan nga gigamit. Kining mga artikuloha maayong pagkasulat nga ako makadayeg kaninyo sa parapo por parapo. Ako mapasalamaton nga kamo nagpakita nga bisan ang pila makalimot, ang uban dili. Kanunay akong mahinumdom sa nangaging mga hitabo sulod sa tulo ka tuig ug masakit sa pisikal matag hinumdom. Apan kini nagkaarang-arang pinaagi sa pagkat-on sa pagsagubang sa mga balik-panumdoman. Salamat kaninyo pag-usab alang sa maong kahibudngan sa pagkabalanse nga mga serye.” (Tinipong Bansa) Kining Kasulatanhong mga artikulo nakatabang ning biktimaha, ug daghan pang uban, sa makausa pa sa pagkalipay sa espirituwal nga mga tagana ni Jehova.—Filipos 4:4-9.
“Ako tigbasa nag magasing Pagmata! sa katuigan,” sulat sa usa ka babaye. “Ugaling, ako wala pa gayod matandog pag-ayo ug artikulo kay sa serye sa magasing nag-ulohan ‘Pag-ayo sa mga Kadaot sa Pag-abusar sa Bata.’ Ang ulohan malisod, apan kamo nakadumala niini uban ang kamataktikanhon ug mahigugmaong-kalulot. Kay ako nakaagi nga giabusaran mismo, kini nakatabang ug nakahupay ug dako kanako. Akong itago kining magasina aron akong mabasag balik. Ang akong pasalamat dili gayod paigo alang sa panahon, kahago, pagsabot, ug labaw sa tanan ang gugma nga inyong gipakita alang nilang nagaantos sa tago.”—Tinipong Bansa.
Pag-atubang sa Kamatuoran
Namatud-ang dakog ikatabang sa mga biktima nga dili makalimot sa mga krimen nga gihimo batok kanila nga sila tugotan sa pagsulti uban sa usa ka makasabot nga ansiano, sa pag-atubang nga realistiko sa suliran, sa pagsabot sa panlantaw ni Jehova sa butang, ug pagsagubang niana subay sa Kasulatan aron ang pag-ayo sa gahom sa lukat ni Jesus maagoman. Niining bahina, usa ka babaye nagpahayag:
“Dili nako mabungat ang pagkaatol gayod sa mga artikulo. Ako dili gayod makatuo sa pagkatukma sa impormasyon. Nagaantos ako sa kaguol ug bulimia sulod sa 20 ka tuig, nga nangitag tabang ug mga tubag bisag asa: sa sikyatrista, sikolohista, mediko, grupo sa terapiya, klinika sa pagpaus-os ug timbang—tanantanan walay kapaingnan alang kanako.
“Apan karon ako nakakaplag ug tabang pinaagi sa impormasyon sama nianang makita sa Oktubre 8 nga isyu. Kinahanglanon gayod kaayo kana. Dili nako mahubit kaninyo ang mga pagbati sa kawalay-paglaom nga usahay modangat kanako, pagkadili madaog nga ang kamatayon morag kahupayan. Apan karon akong makita nga kon unsay nahitabo kanako sa pagkabata dili nako sayop, nga ang Diyos wala mag-isip kanakong hugaw. Ako usa ka biktima. Tungod sa impormasyon sama niini, akong nasabot nga si Jehova nahigugma, nga ako makasalig kaniya. Pagkatapos sa 33 ka tuig nga pagkinabuhi, ako mibati nga ang espiritu ni Jehova nagsugod sa pag-abli sa mga talikala sa pagkabilanggo. Salamat sa paghigugma kanamo sa igo nga gihagoan kining kahibulongan nga mutya sama niining Pagmata! Palihog ipadayon ang pagpatik ning matanga sa mga artikulo ug uban pa, kay sila hinungdanon alang sa among espirituwalidad.”
Ang mosunod nga sulat gikan sa usa ka lalaki nagsumada sa pagbati sa daghan. Siya nag-antos ug kapin sa 50 ka tuig nga pag-agulo tungod kay giabusaran siya sa pagkabata pa. Matud niya: “Ang mahigugmaong pag-atiman ni Jehova pinaagi sa iyang yutan-ong organisasyon wala gayod mohunong sa pagpahingangha kanato ug sa pagdasig ug labaw halalom nga debosyon ug pagsalig kaniya. Human tun-i sa maampingon ang impormasyon sa Oktubre 8, 1991, nga Pagmata! bahin sa pag-abusar sa bata, ako mihilak tungod sa kalipay ug nag-awit ug sunodsunod nga awit alang kang Jehova, bato ug kota, atong salipdanan. Padayon sa pagpatik sa maong mga artikulo, mga igsoon. Si Jehova nagagamit kaninyo sa mga paagi nga dili ninyo mahanduraw.”
Gikan sa mga Magtatan-aw
Makaiikag mao kining sulat gikan sa nagapanaw nga magtatan-aw nga nagadumala sa mga kalihokan sa ubay-ubayng kongregasyon sa mga Saksi ni Jehova:
“Salamat kaninyo tungod sa Oktubre 8 nga Pagmata! bahin sa ‘Pag-ayo sa mga Kadaot sa Pag-abusar sa Bata.’ Maayo kaayong impormasyon ang gipahayag nga sa pagkatinuod among gikinahanglan. Ang mga artikulo tukma kaayo. Akong napanid-an matag karon ug unya nga ang mga biktima naglisod sa pagpakiglabot ni Jehova ingong mahigugmaong Amahan. Sa dihang akong nasabtan kining kakulian, ako silang gipangutana sa sekreto, ‘Ikaw ba gidagmalan sa bata ka pa?’ Ang kinadaghanan sa maong panahon, ang tubag oo! Sa matag higayon nga ang indibiduwal nakaarang sa pagsabot sa koneksiyon tali sa pag-abusar ug sa paagi sa pag-apektar kanila sa ilang kaguol karon o mga kasamok, sila mosugod sa pagkaarang-arang.”
Nagasumada sa pagbati sa daghang ansiano mao kining mubo nga komento sa usa: “Ang Oktubre 8 nga isyu bahin sa pag-abusar sa bata maayo kaayo ug kinahanglanon. Ingong mga ansiano sa kongregasyon, kami kinahanglan nga masayod kutob sa mahimo mahitungod ning mga suliran sa pagpakita ug kabalaka ug pailob nga gikinahanglan sa mga biktima. Samtang kining sistemaha nagakadaot, kining matanga sa mga suliran nagakadaghan. Usab salamat kaninyo alang sa tabang.”
Ang pagdawat sa samang mga sulat nakapahupong sa among mga kasingkasing. Sa pagkasabot sa bug-os nga ‘kadto dili ilang sala,’ ug ingong sangpotanan sa makapausab nga gahom sa Pulong sa Diyos, ang maong mga biktima sa pag-abusar sa bata makasagubang sa masubong mga handumanan. Sila nagkalipay sa paglaom sa unahan, masaligon nga sa bag-ong kalibotan sa Diyos, “ang daang mga butang dili na mahinumdoman, ni sila mosantop pa sa kasingkasing.” (Isaias 65:17; Roma 12:12) Bisan karon, pinaagi sa makaayong gahom sa dugo ni Jesus, sila may mahinlong pagbarog sa atubangan sa Diyos. (Hebreohanon 9:14) Ug kinahanglan nilang modangop sa mga ansiano alang sa tabang. Kining mga ansianoha mahimong “usa ka tagoanan gikan sa hangin” alang nilang may panginahanglan, nga magahupay ug magaampo uban kanila. (Isaias 32:2; 1 Tesalonica 5:14; Santiago 5:14, 15) Busa, ang mga biktima sa pag-abusar matabangan sa pag-uswag ug sa pagkaplag ug kalipay sa tanang mga kalihokan sa Kristohanong kongregasyon.