Ang Kamatuoran Mihatag Kanakog Kagawasan

ANG akong amahan namatay sa siyete anyos pa ako, ug ang akong makalulooy nga inahan nag-inusara na lamang sa pagpadako sa unom ka anak. Nagdako kami sa siyudad sa Johannesburg, Habagatang Aprika. Sa batan-on pa, wala akoy ganang makighugoy-hugoy sa uban. Abi gud nimo, ako maulaw sa pagpakigsulti tungod kay grabe gayod ang akong pagkanganga.

Apan kini nga depekto nakatabang kanako sa pag-ugmad sa ubang mga katakos. Sa eskuylahan, ako kanunay ang makakuhag dakong grado sa dihang ang among klase pasulaton ug mugbong mga sugilanon. Usahay, basahon gani sa mga magtutudlo ang akong mga sugilanon sa ubang mga klase. Usab, ang akong pagkanganga wala makaapektar sa akong katakos sa pag-awit. Sa balay, magpalabay ako sa labing daghan sa akong libreng panahon diha sa lawak sa pagdulag sista ug sa pagkanta.

Sa ulahi, ang musika lamang ang nahimong tinuod nga akong gikaikagan. Nangandoy ako nga makatugtog sa rock band, ug naapektohan niini ang akong buluhaton sa eskuylahan. Ngani, miundang ako sa pagtungha nga wala ko matapos ang paninugdan nga edukasyon. Nagtukod akog usa ka banda, ug halos kada hinapos-sa-semana nga kami manugtog sa nagkalainlaing mga dapit palibot sa Johannesburg. Sa ulahi mitaas ang akong buhok, ug misugod na akog inom ug daghang alkoholikong ilimnon.

Nahinumdom ako nga mitugtog sa usa ka klab sa Johannesburg sa daghang semana. Usa sa mga trabahante, nga daw usa ka matahom nga babaye, naibog nako ug palitan akog maisog nga ilimnon. Pagkadako sa akong kalagot sa dihang nasayran ko nga siya usa diay ka lalaki nga nagsul-ob ug besti sa babaye! Oo, ang klab naghatag kalingawan ilabina sa mga homoseksuwal. Aron makaapas sa eskedyol niini nga klab, gikan sa alas 9:​00 s.g. ngadto sa alas 5:​00 s.b., unom ka gabii sa usa ka semana, kami nahimong giyanon sa makapamatamatang mga droga.

Human sa lima ka tuig nga pagtugtog sa banda, may nahitabo nga nagpasugod nako sa seryosong pagpalandong mahitungod sa relihiyon. Gidapit sa usa ka paring Katoliko ang among banda sa pagtugtog alang sa usa ka organisasyon sa mga batan-on diha sa tigomanan sa iyang simbahan. Kapin sa 500 ka tin-edyer ang mitambong, ug ang paring Katoliko mao ang kahero. Banha kaayong musika ang among gitugtog, ug ang kadaghanan sa mga batan-on nakainom. Apan may laing grupo sa mga batan-on ang nakadani sa akong pagtagad. Sila nag-alirong nga nanglingkod diha sa sayawanan nga nagpasag mga droga. Misugod ako sa pagduda kon duna ba gayoy Diyos nga naglungtad.

Duna bay Usa ka Diyos?

Sa akong pagpangita, miadto ako sa Sabadista, Metodista, Katoliko, ug ubang mga simbahan. Apan gibati ko nga wala silay ikatanyag, ug sa ulahi mihunong ako sa pagtambong. Ang akong gibating kalugda napamatud-an sa nahitabo sa usa ka gabii niana sa adlawng Dominggo diha sa usa ka diskohan. Gipadulom ang kahayag ug banha ang musika, ug nakita ko ang tigsilbig-bino, nga mao ang lokal nga paring Katoliko. Siya nagsul-ob ug maong nga karsones, usa ka saliko nga walay kamesin, ug usa ka dakong krusipiho nga gikulintas. Wala gayod kami maghunahuna nga siya mas maayo pa kay kanamo, ug gitawag namo siya nga hippie nga pari.

Naikag ako sa Buddhismo ug mipalit ug gamay nga rebulto ni Buddha, nga gibutang ko diha sa akong lawak tapad sa akong katre. Kada adlaw moluhod ako atubangan niana ug moingon: “O Buddha, palihog tabangi ako.” Nagtuo usab ako nga ang tawo dunay astral nga kalag nga konektado sa lawas pinaagi sa higot nga plata ug nga niining paagiha ang tawo makapanaw sa tibuok uniberso bisag asay iyang gustong adtoan.

Kining bakak nga pagtuo bahin sa pagkadili-mamatay sa kalag nakaapektar sa among musika. (Itandi ang Ecclesiastes 9:​5, 10 ug Ezekiel 18:4.) Misugod ako sa pagsulat ug mga awit ubos sa impluwensiya sa mga droga. Ang banda nakakat-on sa pagtugtog sa akong musika, ug among gihimoan kana ug propesyonal nga rekording. Ang rekording miabot ug duha ka oras, ug ang mga awit maoy bahin sa usa ka tema sa kinabuhi sa usa ka hinanduraw nga tawo nga nagapanaw uban sa panahon. Ang usa sa mga awit maoy bahin kang Satanas; nagpasiugda kini sa mapasipalahong ideya nga ang Yawa mas gamhanan kay sa Diyos.

Ang pagkalinga ko sa okulto ug sa makapamatamatang mga droga nagsakit gayod kanako. Mahigmata ako magabii ug makakitag itom nga mga dagway nga naglakaw-lakaw sa akong lawak. Usa ka gabii ako nalisang kaayo nga nawad-ag umoy ang akong mga bukton, ug dili ako makalihok samtang ang makahahadlok nga butang nagpaduol kanako. Sa laing okasyon, naghigda ako sa katre sa dihang kalit nga mitungha ang katingalahang mga butang diha sa lawak. Misugod ako sa pagpangandoy nga mahigawas unta gikan niini nga pagkaulipon.

Usa ka Adlaw nga Nagbag-o sa Akong Kinabuhi

Niining higayona ang akong magulang nga igsoong lalaking si Charles ug ang iyang asawa, si Lorraine, nahimong mga Saksi ni Jehova. Sa Sabado sa buntag, ako sagad makamata nga luya pa tungod sa kahubog ug makakitag gamayng papel diha sa tupad sa akong katre. Diha niana gisulat ni Charles ang pipila ka teksto sa Bibliya nga nalangkit sa akong balikong estilo-sa-kinabuhi.

Unya usa ka Dominggo niana, gidapit ako ni Charles ug Lorraine sa pag-uban kanila sa pagtan-aw sa usa ka drama sa Bibliya nga gidula sa mga Saksi ni Jehova sa ilang tinuig nga distritong kombensiyon sa Pretoria. Maikagon bahin sa drama, mihukom ako sa pag-uban. Pagkadako sa akong kahibulong nga makita ang maong dakong panon sa mahinlong mga tawo! Nalipay ako sa maong adlaw bisag ako wala makasabot sa 90 porsiento sa akong nadungog. Sa dihang gipailaila ako ni Charles sa iyang mga higala, nakadayeg ako sa ilang mainitong paagi sa pag-abiabi kanako, bisag taas ang akong buhok ug wala magbisti sa nahiangay alang sa okasyon. Ang mga kahikayan gihimo alang sa usa ka Saksi sa pagtuon sa Bibliya uban kanako.

Sa misunod nga semana, imbes motambong sa pag-ensayo sa banda, miadto ako sa mga tigom sa mga Saksi ni Jehova sa ilang Kingdom Hall. Sa kataposan sa semana, mihukom ako sa pagbiya sa banda ug sa pagbaligya sa akong musikal nga mga instrumento. Human nga nabungkag ang banda, among gikauyonan nga ako ang angay mokupot sa orihinal nga teyp sa among mga narekord tungod kay ako ang misulat sa tanang awit ingon man ang nagkomposo sa musika. Dili ko makasukol sa tentasyon sa pagtago niana. Gitago ko usab ang akong acoustic nga sista ug nagpadayon sa pagtugtog sa musika sa okulto nga akong gikomposo ubos sa impluwensiya sa mga droga.

Samtang nagpadayon ako sa pagtuon sa Bibliya ug nagtambongan sa Kristohanong mga tigom, ang akong pagsabot sa mga kinahanglanon sa Diyos sa inanay miuswag. Sa wala madugay naamgohan ko nga aron makapahimuot sa Diyos, kinahanglang makig-ambit ako sa Kristohanong mga tigom ug makigbahin sa pagpakaylap sa maayong balita gikan sa balay ug balay ingong usa sa mga Saksi ni Jehova. (Buhat 5:​42; Roma 10:10) Wala ako makaangay sa maong ideya. Ang akong pagkanganga grabe gayod nga ako nahimong hilomon, nga sagad nagsalig sa uban nga maoy mosulti para nako.

Pagkanganga Wala Magpahunong Kanako

Sa dihang motambong sa mga tigom, sultihan ko ang akong kaugalingon, ‘Kon makakomento lang unta ako sama sa uban.’ Sa kadugayan nahimo ko kini, apan pagkadako gayod sa akong pakigbisog nga ikapagawas kadtong pipila ka mga pulong! Human nga natapos ang tigom, daghan ang miduol ug gipahalipayan ako. Gipabati ko nilang sama sa usa ka magdudulag soccer nga nakapuntos. Misugod ako sa pagbati sa tinuod nga gugma nga maoy timailhan sa matuod nga Kristiyanidad.​—Juan 13:35.

Ang akong sunod nga buntogonon miabot sa dihang mipalista ako sa Tunghaan sa Teokratikanhong Ministeryo ug mibasa sa Bibliya atubangan sa gamayng grupo. Migrabe ang akong pagkanganga nga wala ko matapos ang akong bahin sa gitagal nga panahon. Human sa tigom ang magtatan-aw sa tunghaan sa pagkamaluloton mihatag nako ug praktikal nga tambag. Iyang gisugyot nga mag-ensayo ako sa pagbasag kusog nga ako lang usa. Gihimo ko kini, migugol ug panahon adlaw-adlaw, nagbasag kusog gikan sa akong Bibliya ug sa magasing Bantayanang Torre. Ang pagsalig nga akong nakuha gikan sa Tunghaan sa Teokratikanhong Ministeryo nakatabang kanako sa pag-atubang sa hagit sa pagduaw sa mga estranghero diha sa ganghaan-ug-ganghaan nga ministeryo. Sa Oktubre 1973, ako gibawtismohan sa pagsimbolo sa akong dedikasyon ngadto kang Jehova nga Diyos.

Mihimo sa Kataposang Pagbulag

Apan, ako bag-ohan pa, dili-hamtong nga Kristohanon. Pananglitan, human nga nakig-ambit sa balay-ug-balay nga pagsangyaw sa usa ka tugnaw nga Dominggo, ako mosulod sa akong awto ug manirado sa mga bintana. Samtang gitagamtam ang kainit sa adlaw, ako maminaw sa narekord diha sa cassette sa orihinal nga teyp sa akong musika. Sa samang panahon, ako usab misugod sa pagpangulitawo sa usa ka buotan batan-ong dalaga, nga si Debbie, nga nakigbahin sa Pagsangyaw nga buluhaton sa bug-os panahon. Kas-a, samtang ako naminaw sa teyp, miduol si Debbie sa awto, ug dalidali ko nga gipatay ang teyp. Sa akong kailadman nahibalo ako nga dili kadto haom nga musika alang sa usa ka Kristohanon.

Sa ulahi human nga si Debbie ug ako nagpakasal, misugod ang among mga suliran. Sagad akong makamata sa tungang gabii nga gisingot ug nangurog. May makahahadlok akong mga damgo nga naglangoy sa mga suba sa dugo samtang gigukod sa mga demonyo. Ang akong alaot nga asawa nag-antos sa malisod nga panahon sa daghang bulan tungod niining mga atake sa demonyo. Bisag wala kaayo bug-os makamatikod si Debbie sa unod sa akong musika, siya nagduda nga kana adunay daotang impluwensiya kanako, ug iyang gipadayag ang maong opinyon. Apan ako sa kagahig-ulo miinsister: “Tipigan ko kini nga mga teyp hangtod sa hangtod tungod sa sentimental nga mga katarongan.”

Daghang mga butang usab ang among gilalisan, ug kasagaran masingkahan ko siya. Tungod kay sige man kamig away, sa maalamon si Debbie miduol sa mga ansiano sa kongregasyon sa pagpangayog tabang. Usahay duawon kami sa ansiano ug naningkamot sa pagtabang kanamo, apan human nga mopauli ang ansiano, masuko na usab ako kang Debbie. Mapahitas-on kaayong modawat nga kami nagkinahanglag tabang, ako moingon: “Unsay imong katungod nga moadto sa mga ansiano ug makigsulti kanila. Ako kanang responsabilidad. Ako ang ulo sa pamilya.” Oo, ako dunay dili-timbang nga panglantaw sa pagkaulo. Unya ako sapoton ug dili makigsulti kaniya sa daghang adlaw. Karon akong naamgohan nga ang tanan lamang niyang gipaningkamotang buhaton mao ang pagluwas sa iyang bana ug sa iyang kaminyoon.

Unya usa ka gabii niana nakigsulti si Debbie sa usa sa mga ansiano mahitungod sa akong pagtugtog ug sista ug sa matang sa musika nga akong gipamatian. Busa giduaw ako sa usa ka ansiano ug nakig-estoryag dugay kanako. Nahinumdom ko nga iya akong gipangutana: “Duna ka bay butang sa inyong balay nga tingalig maoy hinungdan sa inyong mga problema?” Sa kataposan ako nakigsulti ug gitug-anan ko siya mahitungod sa teyp, miangkon nga kini nakahasol sa akong konsensiya.​—1 Timoteo 1:​5, 19.

Nianang gabhiona, human nga mipauli ang ansiano, mihukom ako sa pagdispatsar sa teyp. Among gidala ni Debbie kini sa likod nga nataran ug gisulayan kini pagsunog, apan kini dili masunog. Busa nagkalot kami ug lungag ug gilubong kini. Gibaligya ko usab ang akong sista. Namalandong ako sa kaugalingon: ‘Kon buot ko nga makagawas gikan sa mangil-ad nga musika, nan buhaton ko kini sa bug-os.’ Ug sa katingalahan, wala na ako magdamgo ug makahahadlok. Sukad niadto, hinayhinay nga miuswag ang among kaminyoon.

Ang Hagit sa Pagpahayag Atubangan sa Publiko

Bisag ang Tunghaan sa Teokratikanhong Ministeryo naghatag kanakog dugang pagsalig, ako nganga gihapon kaayo. Gipangandoy ko nga makahatag ug pakigpulong sa kongregasyon nga dili magkanganga. Si Debbie maluloton nga misugyot nga ako magpatan-aw sa usa ka terapista sa pagsulti. Miuyon ako, ug sa mga upat ka bulan, nakadawat ako ug propesyonal nga tabang kas-a sa usa ka semana. Pinaagi sa pagpadapat sa terapiya uban sa maayong tambag gikan sa organisasyon ni Jehova, ako miuswag sa pagpahayag atubangan sa publiko.

Sa 1976, ako nakapribilehiyo nga natudlo ingong ansiano diha sa among kongregasyon. Duha ka bulan sa ulahi, gihatag ko ang akong unang 45-minutos nga pakigpulong publiko. Pipila ka tuig sa ulahi, nakapribilehiyo ako sa paghatag sa akong unang pakigpulong diha sa usa ka programa sa sirkitong asembliya. Sa kadugayan ako gitudlo sa paghatag ug usa ka pakigpulong sa halos matag sirkitong asembliya. Unya, sa Disyembre 1990, nakaabot ako sa kinatas-ang punto sa akong kasinatian ingong mamumulong sa publiko. Ako nakapribilehiyo sa paghatag ug 20-minutos nga pakigpulong bahin sa kinabuhi sa Kristohanong pamilya ngadto sa mamiminaw sa kapig upat ka libo sa Ingles nga sesyon sa “Putling Pinulongan” Distritong Kombensiyon sa mga Saksi ni Jehova sa Johannesburg.

Gikinahanglan ko ang padayong paningkamot sa akong suliran sa pagkanganga. Kay kondili, kini mahimong mobalik, ug sa dihang magkanganga ako, maglisod na ako sa paglingkawas niini. Matag karon ug unya, may mga problema gihapon ako nga ginagmay, apan ang pagsalig kang Jehova tinuod nga makatabang. Sa matag panahong ako mopaingon sa entablado sa paghatag pakigpulong, moampo ako kang Jehova sa pagtabang kanako aron ako magpabiling kalma ug mahatag ug maayo ang impormasyon. Ikaingon ko, hinunoa, nga wala ko gayod makalimot sa mapaubsanong pagpasalamat kang Jehova human sa usa ka pakigpulong tungod kay pinaagi sa iyang tabang nahimo ko kana.

Si Debbie ug ako gipanalanginan usab ug duha ka matahom nga anak, si Pendray, nga nag-edad ug 15, ug si Kyle, nga nag-edad ug 11. Ingong pamilya, malipay kaayo kami sa paggawas sa balay-ug-balay nga ministeryo. Ang kadasig ni Pendray ug Kyle nga gipakita niining buluhatona maoy usa ka tinuod nga pagdasig alang kang Debbie ug kanako.

Samtang tan-awon kog balik ang akong kinabuhi, bation ko ang kalipay ug pagbasol. Pagbasol tungod sa daotang impluwensiya nga nahatag sa akong musika ngadto sa uban apan kalipay nga akong nakaplagan ang kamatuoran, nakahunong sa pagtugtog sa makadaot nga musika, ug nagmalamposon sa pagbuntog sa mga babag sa akong pagkanganga. Kanunay akong nagapalandong sa mga pulong ni Jesus ngadto sa iyang mga tinun-an: “Kamo mahibalo sa kamatuoran, ug ang kamatuoran magahatag kaninyo ug kagawasan.” (Juan 8:32) Pinaagi sa dili-takos nga kalulot ni Jehova, kana nahimo usab nga akong malipayong kasinatian​—Sumala sa giasoy ni William Jordaan.

[Mga hulagway sa panid 26]

Si Debbie ug William Jordaan karong adlawa

Ako padayong maningkamot sa akong suliran sa pagkanganga