Kon Giunsa Nako Pagsagubang ang Pagnganga

Sumala sa giasoy ni Sven Sievers

AKO tignganga na sukad sa bata pa ako. Sa paghinumdom sa nangagi, nagpasalamat ako sa paagi sa akong mga ginikanan aron maatubang ang problema. Dihang monganga ako, kanunay silang maningkamot nga ibug-os ang pagtagad nganha sa pagpamati sa akong gustong isulti inay tul-iron ang paagi nako sa pagsulti. Sumala sa mga terapista sa pagsulti, ang mga ginikanang kanunayng moawhag sa pagtagad nganha sa pagnganga sa ilang anak makapagrabe sa depekto.a

Ang akong inahan nahimong usa sa mga Saksi ni Jehova sa dihang tres anyos pa ako. Sa pagkatin-edyer nako midesidir akong mosunod sa iyang panig-ingnan ug natabangan nga matun-an sa bug-os ang Bibliya. Sa Hulyo 24, 1982, nabawtismohan ako ingong napahinungod nga alagad sa Diyos panahon sa usa ka kombensiyon sa Neumünster, Alemanya. Sa ulahi, milalin ako ngadto sa Habagatang Aprika, diin nagpadayon ako sa pagpakig-ambit sa buluhatong pagsangyaw, nga niana ang tanang matuod nga mga Kristohanon gisugo sa pagpakig-ambit. (Mateo 28:​19, 20) Sa unsang paagi, tingalig mahibulong ka, makahimo ako niana ingong usa ka nganga?

Mga Balos Tungod sa Pagkapositibo

Angkonon kong malisdan ako usahay sa pagpadayon paghupot ug positibong tinamdan, apan nadiskobrehan kong ang pagkapositibo makahimog dakong kalainan. Ang kamatuoran mao nga sa usa ka paagi sa kanunay ako makakomunikar. Kon dili man pinaagi sa pagsulti, ako makigkomunikar pinaagi sa pagsulat sa mga mensahe o pinaagi sa pagpakita lamang sa uban sa literatura sa Bibliya. Ang positibong pagduol nakatabang nako sa pagbuntog sa kalisod nga mosugod sa usa ka kabildohay. Akong paninguhaon ang pagpayano pag-ayo sa akong introduksiyon. Sa sinugdan sa kabildohay, pasultihon nako ang tagbalay sa labing daghan kutob sa mahimo. Ang mga tawo gustong mosulti, ug kini maghatag nakog higayon sa pagkasayod sa ilang panghunahuna. Unya, ipadayon nako ang pakigkabildo uban sa mga butang nga makapaikag nila, nga ipasiugda ang mensahe sa Bibliya. Ang bug-os nga pagtagad sa ilang ginasulti makatabang kanako sa pagkalimot sa akong suliran sa pagsulti, ug momenos ang akong pagnganga.

Ang usa ka positibong paagi usab nakatabang kanako nga mokomento panahon sa Kristohanong mga tigom. Akong nadiskobrehang sa dugang moapil ako sa mga panaghisgot sa Bibliya, sa dugang maanad kanako ang mamiminaw ug tigdumala ug mamati sa akong isulti inay sa paagi sa akong pagsulti.

Aron matagamtam ang kalipay sa kalamposan, kinahanglang mopadayon ako sa pagpaningkamot. Mopugong kini kanako sa pagpadaog sa pagkaluoy-sa-kaugalingon ug pagkahimong maulawon. Ang pagpakigbugno sa pagkaluoy-sa-kaugalingon maoy mapinadayonong bugno. Giingon nga kon ang usa ka tawo mahulog gikan sa kabayo, hinungdanong mobalik siya pagsakay sa kabayo aron dili siya mawad-ag pagsalig-sa-kaugalingon. Busa kon kinahanglang mohunong ako panahon sa pagkomento kay ako nagkabungabunga sa bug-os, ako maningkamot pagsakayg balik sa kabayo, ingnon ta, pinaagi sa pagsulti sa sunod gayong higayon.

Kon sa Unsang Paagi ang Uban Makatabang

Sa dihang ako mohimog mga tawag sa telepono o mangayog impormasyon sa mga estranghero, ako moapresyar gayod sa mataktikanhong tabang. Apan ang pipila ka indibiduwal magpasobra sa ilang tinguha sa pagtabang, ug ila akong tratahong samag bata nga dili makaarang sa paghimog mga desisyon.

Akong gipasalamatan usab ang tabang sa akong mahigugmaong asawa, si Tracy. Sa dili pa siya magsilbing akong “baba,” among hisgotang detalyado ang kahimtang ug siya nahibalo kon unsay gusto nakong malampos. (Itandi ang Exodo 4:10, 14, 15.) Nianang paagiha, siya nagpakita kanakog pagtahod ingong iyang bana, ug siya nagpabati kanakong ako gihapon ang nagkontrolar sa akong kaugalingong kinabuhi.

Ang Tunghaan sa Teokratikanhong Ministeryo maoy laing dakong tabang. Sa senemanang tigom niini, ang mga estudyante makig-ambit sa publikong pagbasag Bibliya ug paghatag sa mugbong mga pakigpulong mahitungod sa mga topiko sa Bibliya. Ako natingala sa pagkadiskobreng ako subsob makabasa ug makasultig maayo atubangan sa mamiminaw. Kon wala pa ako magpalista sa tunghaan, lagmit dili ko gayod hisayran ang maong katakos.

Kon ako may mga asaynment sa Tunghaan sa Teokratikanhong Ministeryo, makapadasig sa linain kon ang instruktor maghatag ug bug-os nga pagtagad sa akong gisulti ug dili sa paagi sa akong pagsulti niana. Nakapahimulos ako pag-ayo sa Giya sa Tunghaan sa Teokratikanhong Ministeryo,b bisan pag ang pipila ka bahin niining basahona maoy mas dakong hagit alang niadtong monganga kay sa niadtong normal ug sinultihan. Pananglitan, usahay, tungod sa sigeng pagnganga, dili ako makahuman sa akong pakigpulong sa gitugot nga panahon. Hinuon, makapadasig kaayo nako kon ipasiugda sa instruktor ang mga punto nga maarangan nako sa pagpauswag.

Mas Dagkong mga Pribilehiyo sa Pag-alagad

Sa nangagi, ako nakapribilehiyo sa paghimog publikong pagbasa gikan sa usa ka Kristohanong basahong among gitun-an panahon sa among mga tigom. Nakapribilehiyo usab ako sa pagdumala sa pagtuon sa dihang walay laing kuwalipikadong ministro nga presente, ug karong adlawa ginahimo ko kana sa regular nga paagi. Bisan pag sa sinugdan ginerbiyos, akong nasinati ang tabang sa Diyos sa pagtuman nianang maong mga asaynment.

Hinuon, sa daghang tuig ang mga higayon sa akong pagbasa o pagtudlo gikan sa entablado sa kongregasyon maoy limitado. Hisabtan kini, sanglit adunay mga higayon nga dangtag dugay nga ako makapasabot. Busa gigamit ko ang akong kusog sa bug-os sa pagdumala sa ubang mga asaynment. Sa sinugdan, ako nag-alagad nga luyoluyong tig-atiman sa suplay sa kongregasyon sa mga magasing Bantayanang Torre ug Pagmata! Unya, human matudlong ministeryal nga alagad, ako ang nag-atiman sa mga suplay sa mga Bibliya, mga libro, ug ubang literatura. Sa ulahi, naasayn ako sa pagsusi sa mga kard sa teritoryo nga gigamit sa among publikong buluhaton sa pagsangyaw. Ang paghatag ug bug-os nga pagtagad sa maong mga asaynment, pagpaningkamot nga makahimog maayong trabaho, naghatag kanakog dakong kalipay.

Sulod sa miaging walo ka tuig, ako nag-alagad usab nga bug-os-panahong magsasangyaw uban kang Tracy. Si Jehova nagpanalangin gayod kanako niining bahina usab. Ngani, usahay ako maghunahuna kon gigamit ba ni Jehova ang akong kahuyangan sa pagnganga. Sa lima ka tawong nakapribilehiyo ako sa pagtabang aron mahimong dedikadong mga Kristohanon, ang duha maoy nganga.

Ako mahinumdom pa uban ang kalipay sa adlawng ako natudlo sa pag-alagad nga usa ka ansiyano sa kongregasyon. Bisan pag ang akong katakos sa pagtudlo gikan sa entablado maoy limitado, naningkamot ako sa paghatag ug bug-os nga pagtagad sa pagtabang sa uban sa personal nga paagi. Ang pagnganga wala maglimite sa akong katakos sa paghimog Kasulatanhong panukiduki sa pagtabang sa mga membro sa kongregasyon nga nag-atubang ug seryosong mga suliran.

Latas sa miaging lima ka tuig, ako nadapit sa paghatag sa dugang ug dugang nga mga asaynment sa pakigpulong. Gawas sa paghatag ug mga pakigpulong sa Tunghaan sa Teokratikanhong Ministeryo, ako nakaarang sa paghatag ug mugbong mga pahibalo panahon sa ubang mga tigom. Sa inanay ang akong kalarino miuswag. Apan unya ako nakaagom ug grabeng pagsugmat. Sa kamabalak-on, naghunahuna ako, ‘Dili na ako hatagan ug mga asaynment,’ apan sa akong katingala, ang akong ngalan diha sa sunod eskedyul! Ang nagadumalang magtatan-aw sa among kongregasyon miingon nga kon ako monganga pag-ayo nga dili makalahos ug sulti, makatan-aw lang ako kaniya ug siya ang moadto sa entablado ug mobanos. Akong gipahimuslan kining mahigugmaong tanyag kas-a o kaduha ka beses, apan wala na nako kana himoa sa mga bulang bag-o pa. Samtang miarang-arang ang akong pagsulti, ako naasayn sa mas tag-as nga mga bahin, lakip ang mga pakigpulong sa publiko. Akong bug-os nga naamgohan lamang ang pag-uswag nga akong nahimo sa dihang sa dili pa dugay ako gipasalmot sa duha ka demonstrasyon panahon sa usa ka sirkitong asembliya sa mga Saksi ni Jehova.

Sa prangka, wala ko bug-os hisabti kon nganong miarang-arang ang akong pagsulti. Gawas pa, basin kini madaot na usab ugma. Ngani, samtang ako morag nakahimog tinong pag-uswag sa pagsulti gikan sa entablado, ako may grabeng mga pagsugmat sa dihang makigsulti sa mga tawo sa personal nga paagi. Busa kini dili usa ka sugilanon sa kalamposan sa diwa nga akong nabuntog ang pagnganga. Inigkaagom nako sa sugmat, akong paningkamotan ang pagpahinumdom sa akong kaugalingon nga kinahanglang dawaton nako ang akong mga limitasyon ug ‘magmakasaranganon sa paglakaw uban sa Diyos.’​—Miqueas 6:8.

Bisan kon unsa tingali ang mahitabo ugma, ako magpadayon sa pagpaningkamot, kay nahibalo nga sa nagsingabot nga bag-ong kalibotan sa Diyos, ang pagnganga bug-os nga mabuntog na. “Ang dila sa mga tunatuna,” nag-ingon ang Bibliya, “magmadali sa pagsultig matin-aw nga mga butang.” Masaligon ako nga kini matuman sa literal ingon man sa espirituwal nga diwa ug bisan “ang amang mosinggit sa kalipay.”​—Isaias 32:​4; 35:6.

[Mga footnote]

[Hulagway sa panid 15]

Uban sa akong asawa, si Tracy