Ikaw Makapakigpulong Atubangan sa Mamiminaw!

SI Marie nahikatawang nahinumdom sa unang pagsulay niya sa pagsulti atubangan sa usa ka dakong grupo. “Sa hapit na kong mosulti,” siya miingon, “Ako nakuyapan!”

Bisag sobra ra, ang kasinatian ni Marie nag-ilustrar sa kahadlok sa kadaghanan sa pagpakigpulong sa publiko. Gilantaw kini sa uban ingong kapalaran nga grabe pa kay sa kamatayon! Kini gipadayag diha sa usa ka surbi nga nangutana, “Unsay imong labing gikahadlokan?” Ingon sa madahom, “kahabog,” “mga problema sa salapi,” “pagsakay ug ayroplano,” “grabeng mga sakit,” ug “kamatayon” maoy nanguna sa listahan. Apan ang nanglabaw niining tanan​—ang numero unong gikahadlokan—​mao ang “pagpakigpulong atubangan sa usa ka grupo”!

Bisan ang iladong mga tawo sa Bibliya nagpahayag ug unang kahadlok sa pagpakigsulti sa publiko. “Ako sa pagkamatuod dili mahibalo nga mosulti,” miingon si Jeremias. “Ako usa ka bata lamang.” (Jeremias 1:6) Ang reaksiyon ni Moises sa iyang buluhaton mao: ‘Dili ako larino nga mamumulong. Palihog, pagpadala ug lain.’ (Exodo 4:10, 13) Bisan pa, si Moises ug Jeremias nahimong talagsaong mga mamumulong, namulong atubangan sa iladong mga lider ug sa dagkong panon.

Mahimong tinuod usab kini kanimo. Ang pagpakigpulong sa publiko maoy usa ka dili-makita nga katakos nga maugmad sa tanan. Mabuntog mo ang kahadlok sa pagpakigpulong sa publiko pinaagi sa pagsunod niining mga sugyota:

1. Ayawg Isipa ang Imong Kaugalingon

“Maulawon kaayo ako.” “Bata pa kaayo ako.” “Tigulang na ako kaayo.” “Mahimatngonon kaayo ako sa kaugalingon.” Kini ang mga pananglitan sa paghatag mga ngalan sa kaugalingon. Sila nagapugong kanimo nga makab-ot ang mga tumong nga maabot.

Ang mga ngalan nga gihatag sa kaugalingon mahimong mga tagna nga matuman diha sa kaugalingon. Pananglitan, ang tawo nga nagngalan sa iyang kaugalingon nga “maulawon” magsira kanunay sa mga higayon nga mohagit sa pagkamaulawon. Kining batasana, sa baylo, mokombinsir kaniya nga siya tinuod nga maulawon. Busa ang siklo mamugna nga mopalihok kaniya ug mopalig-on sa iyang gingalan sa kaugalingon. Ang usa ka sikologo miingon: “Kon nagtuo ka nga wala kay mahimo, . . . molihok ka sa ingon niana, ug mahimong ingon niana.”

Si Dr. Lynne Kelly sa University of Hartford (T.B.A.) miangkon nga ang kaulaw mahimong usa ka makat-onang pagsanong. Kon unsay atong matun-an, mahimong dili-matun-an. Ingon niana ang ikaingon bahin sa pagkamahimatngonon sa kaugalingon, kahadlok sa entablado, ug ubang mga babag sa pakigpulong publiko.

2. Himoa ang Kakulba nga Moobra Alang Kanimo

Ang dugay nang artista kas-a gisukna kon human sa daghang katuigan sa kasinatian kulbaan pa ba gihapon siya atubangan sa usa ka pasundayag. “Siyempre,” matud pa niya. “Ako kulbaan gihapon atubangan sa matag pasundayag. Apan sa milabay ang katuigan, nakakat-on ako sa pagkontrolar niini.”

Nan, ang tumong mao ang pagkontrolar sa kakulba, dili pagwagtang niini sa bug-os. Ngano? Tungod kay dili tanan sa kakulba daotan. Dunay duha ka matang sa kakulba. Ang usa nagagikan sa kakulang sa pagpangandam. Apan ang usa mao ang mas positibong kabalaka. Kining matanga sa kakulba maoy maayo alang kanimo tungod kay kini motukmod kanimo nga himoon ang pinakamaayo. Kini nga kakulba nagapamatuod nga ikaw may pagtagad. Aron mamenosan ang kakulba, sulayi ang mosunod:

Hunahunaa ang imong pakigpulong nga usa ka pakigkabildohay imbes usa ka diskurso. “Ordinaryong pagsultihay lang kini,” matud pa sa beteranong si Charles Osgood, “ug sulti sa tanang panahon.” Sa linangkob, ang mamiminaw mao ang tawo nga imong gikaestorya. Usahay angayan nga magrelaks ug magpahiyom. Kon daw nakigsulti ka lang sa mamiminaw, mas relaks ka. May mga panahon, hinunoa, nga ang materyal ug ang okasyon nagkinahanglan ug mas pormal, seryoso, ug kaha puwersadong tuno.

Hinumdomi nga ang mamiminaw nagapaluyo kanimo! Bisan kon dayag ang kakulba, ang kadaghanan sa mamiminaw masinabtanon. Busa lantawa ang mamiminaw nga imong higala. Buot nila nga molampos ka! Hunahunaa sila nga imong mga bisita, ug ikaw ang tig-abiabi. Imbes maghunahuna nga ang mamiminaw angay maghimo kanimong komportable, sultihi ang imong kaugalingon nga ingong tig-abiabi pabation mo silang komportable. Ang pag-usab sa imong panghunahuna makatabang sa pagpakalma sa imong kakulba.

Hunahunaa ang imong mensahe, dili ang imong kaugalingon. Hunahunaa ang imong kaugalingon nga mensahero nga yanong naghatag ug telegrama. Ang mensahero dili kaayo matagad; ang telegrama mao ang gustong madawat sa dumadawat. Matuod usab kana dihang ihatag mo ang mensahe sa mamiminaw. Ang pangunang atensiyon anaa sa mensahe, dili diha kanimo. Kon mas dako ang kadasig mo sa mensahe, mas menos ang kabalaka mo sa imong kaugalingon.

Ayaw pagpabusog kaayo sa dili pa ang pakigpulong. Ang usa ka propesyonal nga mamumulong nahinumdom nga mikaog daghan sa wala pa ihatag ang duha ka oras nga pakigpulong. Bahin sa iyang pakigpulong, siya nahinumdom: “Ang dugo nga angay untang magamit sa akong utok atua sa akong tiyan naghilis sa karne ug patatas.” Ang dako nga paniudto mahimong imong labing dako nga kaaway kon ikaw mohatag ug pakigpulong atubangan sa mamiminaw. Bantayi usab ang imong pagaimnon. Ang caffeine mopakulba nimo. Ang alkohol mopahabol sa imong hunahuna.

Bation mo gayod ang pagsulbong sa kakulba sa mosugod ka na sa pakigsulti atubangan sa mamiminaw. Apan uban ang kasinatian, imong makita nga kini maoy kakulba lamang sa sinugdan​—kakulba sa sinugdan, nga mawala ra human nga makasugod ka na sa pagpakigsulti.

3. Pangandam!

“Ang pakigpulong maoy usa ka biyahe nga may katuyoan, ug kini kinahanglang planohon,” miingon si Dale Carnegie. “Ang pakigpulong nga walay katuyoan, walay makab-ot nga kalamposan.” Aron may makab-ot, ikaw kinahanglang mangandam. Ang kahanas sa pagpakigpulong dili gasa sa imong mamiminaw. Busa unsaon nimo sa pagpangandam?

Pagtuki ug pag-ayag. Ayawg alang-alanga ang imong panukiduki. “Ang bugtong paagi nga mahimong komportable atubangan sa mamiminaw mao ang pagkasayod kon unsay imong gihisgotan,” miingon ang usa ka eksperto sa komunikasyon nga si John Wolfe. Sinatia ang imong ulohan. Panguhag daghang impormasyon nga mahimo nimong gamiton. Unya ayaga ang imong materyal, kuhaa ang “sungo” gikan sa “trigo.” Bisag ang “sungo” dili mausik​—kini mohatag kanimo ug dugang pagsalig sa impormasyon nga imong gamiton.

Pamalandong. ‘Hinuktoki ang imong ulohan.’ Hinumdomi kini panagsa sa mga yugto sa adlaw. “Hunahunaa kini sa pito ka adlaw; damgoha kini sa pito ka gabii,” matud ni Dale Carnegie. Gitambagan ni apostol Pablo si Timoteo: “Tagda kanunay ang imong kaugalingon ug ang imong pagpanudlo.” Apan sa wala pa mosulti niini, miagda si Pablo: “Palandonga kining mga butanga; usaha niini ang imong panghunahuna.” Oo, ang maayong mamumulong maoy una usa ka maayong tigpamalandong.​—1 Timoteo 4:15, 16.

Palandonga hangtod ang importansiya ug pagkadinalian sa imong mensahe mangibabaw sa imong kakulba. Kini ang nakahimo kang Jeremias sa pagsulti sa iyang mensahe: “Sa akong kasingkasing kini nahisamag nagasiga nga kalayo nga natuob sulod sa akong mga bukog; ug ako gikapuyan sa pagpugong, ug dili na makaantos niana.” (Jeremias 20:9) Ug kini ang giingon sa samang tawo kinsa miingon sa sinugdan mahitungod sa iyang buluhaton: ‘Dili ako mahibalo nga mosulti.’

Konsideraha ang imong mamiminaw. Isul-ob ang imong labing presentableng bisti. Usab, ang imong giandam nga materyal kinahanglang himoon nga mohaom sa imong mamiminaw. Busa konsideraha ang ilang panghunahuna: Unsay ilang gituohan? Unsay ilang nasayran na mahitungod sa imong ulohan? Sa unsang paagi ang imong materyal mohaom sa ilang adlaw-adlaw nga kinabuhi? Ang dugang nga pagtagad mo niining mga pangutanaha, dugang nga maikagong mamati kanimo ang imong mamiminaw, nagalantaw sa imong impormasyon ingong gipasibo sa ilang espisipikong mga panginahanglan.

Himoa ang Labing Maayong Paningkamot

Nabatonan sa kalibotan karon ang tanang mga paagi sa dali nga komunikasyon nga mahanduraw. Bisan pa “diha sa kadaghanang mga situwasyon,” miingon ang librong Get to the Point, “ang labing epektibong paagi sa komunikasyon mao ang tawo ngadto sa iyang isigkatawo.” Ang mga sugyot sa itaas makatabang kanimo sa paghanas sa maong komunikasyon. Imbes magpanuko tungod sa wala kinahanglanang kahadlok, makita mo nga makapakigpulong ka atubangan sa mamiminaw!

[Kahon sa panid 22]

Mga Ehersisyo nga Mopakalma sa Nerbiyos

Kon itugot sa mga sirkumstansiya, ang mosunod nga mga ehersisyo makapakunhod sa kakulba sa dili pa moatubang sa mamiminaw.

● Ikitiw-kitiw ang imong mga tudlo, iwilik-wilik ang imong mga pulso ug mga braso. Ipataas ang imong mga abaga, unya irelaks kini. Balik-balika kini sa makadaghan.

● Iduko ang ulo, unya ilingi-lingi kini sa matag kilid.

● Ihiwid-hiwid ang imong apapangig. Bukhag dako ang imong baba.

● Paglaylay nga mahinay, ipataas ug ipaubos ang tuno.

● Ginhawag hinay, lalom nga mga pagginhawa.

[Kahon sa panid 23]

Pagpauswag sa Pagpakigpulong

Magmapasiboon sa gidak-on sa mamiminaw: Kon daghan ang mamiminaw, kinahanglan pakusgan mo ang imong tingog. Ang mga pangumpas mas halapad, ug ang tingog mas puwersado.

Hatagig kinabuhi ang imong tingog. Handurawa nga nagpatokar kag usa ka instrumento sa musika nga dunay usa lamang ka nota! Ang imong tingog mao ang imong instrumento. Kon ang imong pagpakigpulong may “usa ka nota lamang”​—walay-pagbalhin—​laayan ang imong mga mamiminaw.

Bantayi ang imong pamarog. Ang pagpanghuyhoy mopakitag kawalay kaikag. Ang pagpanikig mopadayag ug kabalaka. Paningkamoti ang katimbang​—relaks ug alerto, apan dili kay walay-kaikag o manuskig.

Pangumpas. Dili lamang kini alang sa pagpasiugda. Ang pangumpas mopakalma ug magparelaks sa kaunoran ug mopauswag sa pagginhawa, mopakalma sa tingog ug nerbiyos.

Pamisti nga may kaligdong. Ikaw nagapahayag ug mensahe, dili ang imong mga bisti. Ang opinyon sa mamiminaw kon unsay imong panagway sama ka hinungdanon kon dili labing hinungdanon kay sa imong kaugalingon.

Hupti ang kontak sa mata. Kon maglabay ka ug bola sa dula nga pagsalo, tan-awon mo kini sa pagtino nga kini nasalo. Ang matag ideya sa imong pakigpulong maoy usa ka laing “paglabay” ngadto sa mamiminaw. Ang “pagsalo” makita pinaagi sa ilang pagsanong​—usa ka yango, usa ka pahiyom, usa ka panagway nga nagapaminaw. Hupti ang maayong kontak sa mata aron maseguro nga ang imong mga ideya “ginasalo.”