Kaugdang

KASAGARANG nerbiyoson ang mamumulong sa dihang motindog siya aron mosulti, ilabina kon dili siya sigeg hatag ug mga pakigpulong. Ang magmamantala basin nerbiyoson sa dihang siya mohimo sa unang pipila ka pagduaw sa adlaw sa pag-alagad sa kanataran. Sa gitudlo nga mahimong manalagna, si Jeremias mitubag: “Ania, ako gayod dili mahibalo nga mosulti, kay ako usa ka bata lamang.” (Jer. 1:​5, 6) Si Jehova mitabang kang Jeremias, ug siya motabang usab kanimo. Ngadtongadto, makaugmad ka sa kaugdang.

Ang ugdang nga mamumulong maoy mamumulong nga may pagsalig. Ang maong pagkamasaligon madayag sa pagdala sa iyang lawas. Natural ug angay sa okasyon ang iyang postura. Makahuloganon ang lihok sa iyang mga kamot. Mapadayganon ug kontrolado ang iyang tingog.

Bisan pag tingali gibati nimo nga ang maong kahubitan sa ugdang nga tawo dili mohaom kanimo, ikaw makapauswag. Sa unsang paagi? Atong hisgotan kon nganong ang usa ka mamumulong nerbiyoson ug walay kaugdang. Ang hinungdan basin pisikal.

Sa dihang ikaw moatubang ug lisod nga buluhaton ug buot nimo nga makabuhat ug maayo apan wala makaseguro nga makahimo ka, ikaw mabalaka. Ingong resulta, ang utok momando sa lawas sa paggamag mas daghang adrenaline. Ang moresultang pagsugwak makapahinabo sa mas kusog nga pinitik sa kasingkasing, paspas nga pagginhawa, daghang singot, o pagkurog sa mga kamot ug mga tuhod ingon man sa pagkurog sa tingog. Ang imong lawas naningkamot nga tabangan ka sa pagsagubang sa imong kahimtang pinaagi sa pagdugang sa imong kusog. Ang hagit mao nga ipatunong ang misugwak nga kusog ngadto sa mas maayong panghunahuna ug sa madasigong pakigpulong.

Kon Unsaon Paghupay sa Kabalaka. Hinumdomi nga normal nga mabalaka ka. Bisan pa niana, aron mahuptan ang kaugdang, kinahanglang imong hupayon ang kabalaka ug atubangon ang kahimtang sa kalmado ug maligdong nga paagi. Sa unsang paagi mahimo nimo kini?

Pangandam sa bug-os. Hatagig panahon ang pagpangandam sa imong pakigpulong. Seguroa nga nasabtan nimo pag-ayo ang imong ulohan. Kon ang imong pakigpulong mao kanang ikaw ang magpili sa mga punto nga hisgotan, hunahunaa kon unsa nay nahibaloan sa imong mamiminaw bahin sa ulohan ug kon unsay imong gidahom nga imong mahimo. Makatabang kini kanimo sa pagpilig materyal nga labing mapuslanon. Kon sa sinugdan malisdan ka, ipakigsulti ang problema uban sa usa ka eksperyensiyadong mamumulong. Siya makatabang kanimo sa pag-analisar nga mas maayo sa imong materyal ug sa mamiminaw. Sa dihang natino na nimo nga duna kay materyal nga mapahimuslan sa imong mamiminaw ug tin-aw kini diha sa imong hunahuna, ang imong tinguha nga ipakig-ambit kini makabuntog sa kabalaka nga tingali imong gibati bahin sa pagpakigpulong.

Hatagig linaing pagtagad ang imong introduksiyon. Sayra kon unsaon nimo pagsugod. Sa magapadayon na ang imong pakigpulong, lagmit mahupay na ang imong nerbiyos.

Ang samang pangunang mga lakang mapadapat diha sa pagpangandam alang sa pag-alagad sa kanataran. Hunahunaa dili lamang ang ulohan nga giplanohan nimong hisgotan kondili ang matang usab sa mga tawo nga imong sangyawan. Planoha pag-ayo ang imong introduksiyon. Pahimusli ang kasinatian sa hamtong nga mga magmamantala.

Basin mobati ka nga mahimo kang mas ugdang kon mogamit kag manuskrito sa dihang magahatag ug pakigpulong atubangan sa usa ka grupo sa mga tawo. Sa aktuwal, kini mahimong moresulta sa mas dakong kabalaka sa matag higayong ikaw mohatag ug pakigpulong. Tinuod nga ang pipila ka mamumulong mogamit ug daghan kaayong nota, samtang ang uban mogamit ug gamay ra. Apan ang makapausob sa sentro sa pagtagad sa imong hunahuna ug makapamenos sa imong kabalaka mao, dili mao ang mga pulong diha sa papel, kondili ang kombiksiyon diha sa imong kasingkasing nga ang imong naandam maoy mapuslanon kaayo alang sa imong mamiminaw.

Bansayag kusog ang imong pakigpulong. Ang maong pagbansay mohatag kanimog pagsalig nga ang imong mga hunahuna ikapahayag nimo sa mga pulong. Samtang magbansay ka, makaugmad ka sa mga paagi sa pagsag-ulo nga daling mapukaw inighatag nimo sa imong pakigpulong. Himoang realistiko ang imong pagbansaybansay. Handurawa ang imong mamiminaw. Lingkod sa usa ka lamesa o tindog, sama sa imong himoon sa dihang magahatag ug pakigpulong.

Pag-ampo kang Jehova alang sa tabang. Motubag ba siya sa maong pag-ampo? “Kini ang pagsalig nga atong nabatonan diha kaniya, nga, bisan unsay atong pangayoon sumala sa iyang kabubut-on, siya magpatalinghog kanato.” (1 Juan 5:14) Kon gusto nimong pasidunggan ang Diyos ug tabangan ang mga tawo nga makapahimulos sa iyang Pulong, seguradong tubagon niya ang imong pag-ampo. Ang maong pasalig dakog mahimo aron palig-onon ka sa pagtuman sa imong asaynment. Dugang pa, samtang ugmaron nimo ang mga bunga sa espiritu​—gugma, kangaya, pakigdait, kalumo, ug pagpugong-sa-kaugalingon​—maugmad nimo ang tinamdan sa hunahuna nga gikinahanglan sa pag-atubang sa mga kahimtang uban ang kaugdang.​—Gal. 5:​22, 23.

Batoni ang kasinatian. Kon kanunay kang makigbahin sa pag-alagad sa kanataran, dili ka na nerbiyoson kaayo. Kon kanunay kang mokomento diha sa mga tigom sa kongregasyon, mas sayonan kang makigsulti sa uban. Samtang modaghan ang mga pakigpulong nga imong ihatag diha sa kongregasyon, lagmit mahupayan ang kabalaka nga imong bation una pa sa matag pakigpulong. Gusto ba nimong makabaton ug mas daghang higayon sa pagpakigpulong? Nan pagboluntaryo nga mopuli diha sa tunghaan sa dihang ang uban dili makatuman sa ilang mga asaynment.

Human nimo mahimo ang mga lakang nga gilaraw sa itaas, imong makaplagan nga mapuslanon ang pagsusi sa mga simtoma nga tinong mopunting sa kakulang sa pagkamasaligon. Ang pag-ila sa mga simtoma ug pagkat-on kon unsaon pagsagubang niini motabang kanimo sa pagsulti uban ang kaugdang. Ang mga simtoma tingali pisikal o may kalabotan sa tingog.

Pisikal nga mga Simtoma. Ang imong kaugdang, o kakulang niana, gipakita sa imong pisikal nga barog ug sa paagi sa paggamit nimo sa imong mga kamot. Tagda una ang mga kamot. Ang mga kamot nga binaklid, nga nagtuskig diha sa mga kilid, o hugot nga nagkupot sa sanggaan sa basahon sa mamumulong; mga kamot nga sigeg kuotkuot sa bulsa, karawkaraw sa butones, hikaphikap sa aping, ilong, antiyohos; mga kamot nga nagduladula sa relo, lapis, singsing, o mga nota; mga kompas sa kamot nga kinalit o dili kompleto​—kining tanan magpasundayag sa kakulang sa kaugdang.

Ang kakulang sa pagsalig mapadayag usab pinaagi sa kanunayng pagbalhinbalhin sa mga tiil, pagkilingkiling sa lawas, pagtindog nga ang postura sobra ka tuhoy, paghuyhoy sa lawas, kanunayng pagpanilap sa ngabil, sigeng pagtulon, ug kusog ug mabaw nga pagginhawa.

Pinaagi sa makugihong paningkamot kining mga timailhan sa nerbiyos makontrolar. Tinagsaha pagbuntog kini. Ilha ang problema, ug hunahunaa daan kon unsay kinahanglang buhaton nimo aron mapugngan kini. Kon himoon nimo ang maong paningkamot, makahatag ka ug ebidensiya sa kaugdang diha sa imong pisikal nga pamarog.

Mga Simtoma nga Gipadayag sa Tingog. Ang mga ebidensiya sa nerbiyos nga gipadayag sa tingog mahimong maglakip sa labihan ka tagning o nagpangurog nga tingog. Tingali ikaw nagsigeg igham o nagsulting paspas kaayo. Kining mga problemaha ug mga manerismo mabuntog pinaagi sa pagpaningkamot nga kontrolahon ang tingog.

Kon ginerbiyos ka, hunong aron moginhawag pipila ka lalom nga pagginhawa sa dili ka pa moadto sa plataporma. Paningkamoti nga irelaks ang imong tibuok lawas. Inay sa paghunahuna bahin sa imong nerbiyos, ibug-os ang hunahuna nganha sa hinungdan nga ang mga butang nga imong giandam buot nimong ipakig-ambit sa imong mamiminaw. Sa dili pa mosugod sa pagsulti, sa daklit tan-awa ang imong mamiminaw, pamili ug mahigalaong nawong, ug pahiyom. Sultig hinay sa introduksiyon, ug unya ibug-os ang hunahuna nganha sa imong pakigpulong.

Kon Unsay Pagadahomon. Ayaw dahoma nga mahanaw ang tanang pagbati sa nerbiyos. Daghang mamumulong nga may daghang katuigan nga kasinatian sa plataporma nerbiyoson sa dili pa sila motindog atubangan sa mamiminaw. Bisan pa niana, nakakat-on sila sa pagkontrolar sa ilang nerbiyos. Usa sa maong mamumulong miingon: “Ako aduna gihapoy nerbiyos, apan kini kontrolado na karon.”

Kon tim-os kang maningkamot sa pagwagtang sa panggawas nga mga timailhan sa nerbiyos, isipon ka sa imong mamiminaw ingong ugdang nga mamumulong. Mahimong nerbiyoson ka gihapon, apan sila dili na gayod makamatikod niana.

Hinumdomi, ang pagsugwak sa andrenaline nga magpahinabog mga simtoma sa nerbiyos mohatag usab ug mas dakong kusog. Gamita kana sa pagsulti uban ang pagbati.

Dili kinahanglang maghulat hangtod nga moadto ka sa plataporma aron bansayon kining tanan. Kat-oni nga mahimong ugdang ug kontrolado ug sulti uban ang angayng pagbati sa imong adlaw-adlaw nga pagkinabuhi. Ang imong paghimo niana dakog ikatabang aron makabaton kag pagsalig diha sa plataporma ug diha sa pag-alagad sa kanataran, diin labing hinungdanon kini.