Gikan sa Among mga Magbabasa
Mga Batang Wala pa Matawo Ang artikulong “Ang Pagkat-on Mosugod Sulod sa Tiyan” nakapahimuot kanako. (Enero 22, 1992) Ako usa ka medikal doktor, ug karong bag-o nakahibalag ug usa ka magtiayon nga nangayo sa akong tambag mahitungod sa pagbatog aborsiyon. Sa paghatag sa akong mga komento, gidugang ko ang mga argumento nga gihimo diha sa inyong artikulo. Ang magtiayon mihukom nga ipanganak ang bata. Salamat kaninyo, ang usa ka gamayng bata mahimong mabuhi.
G. U., Ecuador
Mga Motorsiklo Gibasa ko nga maikagon ang inyong artikulong “Mga Motorsiklo—Unsa ka Makuyaw Sila?” (Abril 8, 1992) Ako karon nagasulod sa akong ika-55 ka tuig sa negosyo sa motorsiklo ug sa kanunay interesado sa pagkaluwas sa motorsiklo. Kasagaran nga kon usa ka motorsiklo ug usa ka kotse malangkit sa aksidente, kotse ang saypan; sa daghang panahon ang mga drayber dili makakita sa motorsiklo. Ipadayon ninyo ang inyong maayong buhat sa paghatag kanamo nianang makaiikag nga mga ulohan.
M. H., Tinipong Bansa
Madasigon kong ginasunod ang tanang panagana sa pagkaluwas nga inyong gihisgotan. Apan kini dili makabakwi sa labing peligroso nga hulga sa pagkaluwas sa siklista: UBANG MGA DRAYBER! Ako hapit maligsi pila ka tuig nga miagi sa usa ka tawo nga wala gani mohunong. Nahulog ako sa akong motorsiklo ug, bisan pa sa panalipod nga kagamitan, nakabaton ug grabeng mga samad. Ingong usa ka bana ug amahan sa duha ka matahom nga anak, mihukom ako nga labi pang maayo nga ibaligya ang akong motorsiklo.
J. B., Tinipong Bansa
Gisulayan namo ang paghatag ug timbag nga hulagway sa mga kalipayan ug kapeligrohan sa pagsakayg motorsiklo. Ang mga magbabasa gidasig sa “pagtulotimbang nianang mga bahin madanihon ug sa kaluwasan kontra sa usag usa” sa dihang maghunahuna sila sa pagsakay ug motorsiklo. Dili katungod sa uban ang pagsaway sa mga butang nga desisyonan sa personal.—ED.
Ang Uniberso Bag-o pa nakong nahuman ang pagbasa kauban sa akong mga anak ang mga artikulo bahin sa “Pagtuki sa mga Tinagoan sa Uniberso.” (Marso 22, 1992) Kining mga artikuloha nagpakita unsa ka madanihon gayod ang daghan kaayong kalalangan ni Jehova. Salamat sa tin-aw ug yanong paagi sa inyong pagsaysay sa lainlaing mga matang sa mga langitnong butang. Matag ulohan nga inyong gihisgotan gisaysay uban ang dakong katin-aw, giladmon, ug katakos.
N. B., Italya
Kanunay ko nga gipadaplin kining isyuha sa Pagmata! tungod kay kana dili usa ka ulohan nga akong gikaikagan. Lahi na karon ang akong pagbati. Inyong gihisgotan ang usa ka komplikado kaayong ulohan alang kanako ug—ingon nga kanunay ninyong ginabuhat—gipahayag kana sa paagi nga makasabot ang uban. Dili ko gusto nga ang artikulo matapos as dihang gisugdan ko kana sa pagbasa!
S. J., Canada
Tigtul-id sa Lansang Tungod kay luyahon ug lawas, ako dili makabatog direktang bahin sa proyekto sa konstruksiyon nga ginahimo diha sa mga pasilidad sa sangang-buhatan sa Watch Tower Society sa Selters/Taunus, Alemanya. Apan ang artikulo mahitungod sa tigulang nang si Adams Akuetteh, gitawag “ang tigtul-id sa lansang sa sangang buhatan sa Ghana” (Mayo 22, 1992), nakapahilak kanako!
T. R., Alemanya