Kon sa Unsang Paagi ang Pipila Nakakat-on Pagbuntog sa Negatibong mga Pagbati
ANG tanan usahay may daotang mga pagbati. Tungod sa bug-at nga mga suliran, sama sa grabeng sakit, kagulangon, o kamatayon sa mga minahal, ang pipila tingalig adunay lalom ug dulot negatibong mga pagbati nga magdaot sa ilang mga kinabuhi.
Ugaling, bisan taliwala sa ulahing gihisgotan, anaa silang nakakat-on pagpugong nianang mga pagbatia mao nga nagmalamposon sila sa pagpadayon sa ilang adlaw-adlawng mga kalihokan. Ang mosunod maoy mga panig-ingnan kanila, sumala sa pag-interbiyo sa magasing Pagmata!
Si Janis nagdawat ug medikal nga pagtambal alang sa usa ka sakit nga nagaapektar sa iyang mga pagbati. Ugaling, siya nag-ingon: “Nadiskobrehan ko nga ang labing epektibong paagi sa pagsagubang sa suliran mao ang pagpugong sa akong mga panghunahuna. Gihimo ko kini pinaagi sa pagbuhat ug mga butang alang sa uban, sama sa paghurno ug panahi. Naningkamot ako ilabina sa paghunahuna sa maanindot nga mga kaagi ug sa umaabot nga mga panghitabo nga akong gipanan-aw. Tungod sa akong sakit, walay usa niini ang sayon. Usahay mas sayon ang pagpadaog ug mobatig daotan. Apan ang maayong mga sangpotanan takos sa panlimbasog.”
Human sa 45 ka tuig nga panagtiayon, ang bana ni Ethel namatay. Bisag wala niya sayloi ang palakaw sa pagbangotan, si Ethel nakaarang sa pagpugong sa iyang mga pagbati. Siya misaysay: “Napuliki ako sa pagbuhat ug mga butang alang sa uban. Pananglitan, ako nagakalipay sa pagtudlo sa uban mahitungod sa mga katuyoan sa Diyos sumala sa makita diha sa Bibliya. Usa ka batan-ong babaye nalipay kaayo sa maayong mga butang iyang nakat-onan nga ang iyang apresasyon nakatabang nako nga mahimong mas malipayon. Samtang itumong ko ang akong pagtagad sa positibong mga butang diha sa Bibliya aron itudlo sa uban, kana nagatabang sa pagpalagpot sa negatibong mga panghunahuna sa akong kaisipan. Usab, ang batan-ong mga babaye moduol kanako aron magpatabang sa lainlaing mga suliran, ug ang paghisgot mahitungod sa positibong mga butang nga ilang mahimo diha sa ilang mga kinabuhi nagatabang usab kanako sa pagbuntog sa negatibong mga pagbati.”
Sulod sa daghang katuigan si Arthur may puliki, aktibong kinabuhi. Dayon, tungod sa usa ka grabeng sakit, kinahanglang mohunong siya sa sekular nga trabaho ug ihunong ang tanang kalihokan sa gawas sa balay. Sulod sa daghang bulan si Arthur mibating way-pulos ug magul-anon. Giunsa niya pagsagubang ang maong mga pagbati? “Gihunong ko ang paghunahuna sa butang dili na nako mabuhat. Inay hinuon, gitumong ko ang pagtagad sa butang akong mabuhat sa pagtabang sa ubang mga tawo sa pagpauswag sa ilang kaugalingon ug pagdasig kanila sa dihang sila magul-anon. Kay anaa ra sa akong balay, kanunay nakong gamiton ang telepono. Samtang napuliki ako sa pagtabang ug pagdasig sa uban, ako wala nay panahon sa pagkaluoy sa akong kaugalingon.”
Human sa sunodsunod nga krisis, apil ang pagkamatay sa iyang bana, si Nita hisabtan nga nakasinati sa grabeng kasubo ug depresyon. Sa nahaigong panahon nakakat-on siya sa pagpugong sa maong mga pagbati: “Sa dihang moabot kanako ang pagbati sa kasubo, ako mangitag makapalig-ong gawasanan. Pugson ko ang akong kaugalingon sa pagbaktas, pagtelepono sa usa ka malulutong higala, pagpamatig musika, o pagbuhat sa bisan unsa nga akong nasayran gikan sa kasinatian nga mohupay sa depresyon. Sulayan ko ang pagtagad sa akong kaugalingon nga maluluy-on sama sa akong pagtagad sa usa ka buotang higala.”
Si Mary adunay bug-at medikal nga mga suliran sulod sa 32 ka tuig. Kay naa lang sa wheelchair, siya mogawas lamang sa balay aron sa pagpakigkita sa doktor. Unsay ginahimo ni Mary aron siya dili madaog sa kaluya? Siya misaysay: “Mapaluyohon kaayo ang akong bana. Usab, sige akog basa ug makapalig-ong balasahon. Ako regular nga nagatelepono sa akong mga higala, ug sa makadaghan akoy manguna sa pagdapit kanila sa akong balay. Ako malingaw sa ilang mga pagduaw ug dili mogamit sa maong mga okasyon sa pagreklamo o pagkaluoy sa kaugalingon. Dili ko gugolon ang panahon sa paghunahuna sa negatibong mga butang sa akong kinabuhi kay ako gipaboran ug daghan kaayong positibong mga butang.”
Si Margaret sa kinaiyanhon matinud-anon ug panghunahuna. “Sa dihang mopaibabaw ang negatibong mga pagbati,” siya miingon, “mangita ako sa panag-uban sa positibog panghunahuna—dili usa ka mithianon—apan usa nga nakaila pag-ayo kanako ug mopahinumdom kanako sa akong mga kalamposan ug magdasig kanako.”
Si Rose Marie may lima na ka dagkong operasyon latas sa katuigan, ug siya ug iyang bana may pito ka namatay sa ilang mga pamilya sa bag-o pang yugto sa usa ka tuig ug tunga. Sa pagkatinuod, ang kabug-at niini nagpahinabog negatibong mga pagbati. Bisan pa niana, sila wala maghunahuna nianang mga butanga. Kay mga Saksi ni Jehova, sila gilig-on sa positibo ug makapalipayng paglaom nga ginahatag sa Bibliya mahitungod sa usa ka matarong bag-ong kalibotan nga haduol na diin ang Diyos “magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni may kasakit pa.” Bisan ang mga patay pagabanhawon, kay sumala sa giingon ni Jesus, “ang takna nagsingabot nga ang tanang anaa sa handumanang mga lubnganan makadungog sa [tingog sa Anak sa Diyos] ug managpanggula.”—Pinadayag 21:4; Juan 5:28, 29.
[Hulagway sa panid 9]
Si Janis nagapugong sa iyang mga pagbati pinaagi sa pagbuhat sa mga butang alang sa uban, paghunahuna sa maanindot nga mga kaagi, ug pagpanan-aw sa umaabot nga mga panghitabo