Gikan sa Among mga Magbabasa

Negatibong mga Pagbati Salamat kaninyo tungod sa kahibulongang serye sa artikulong nag-ulohang “Mahimo Nimong Buntogon ang Negatibong mga Pagbati.” (Oktubre 8, 1992) Ako dugay nang may suliran niini. Apan karon nga si Jehova migasa kanako niining mga artikuloha, nakaplagan nako sa kataposan ang kusog nga masuklan kining mga pagbatia. Ang paghanduraw sa kaugmaon nga iyang gitagana kanato ug ang mga panalangin nga atong tagamtamon unya usa ka dakong tabang.

C. I., Italya

Naguol ako tapos sa romantikong pagkalangkit sa usa ka tawo nga napamatud-ang bug-os malimbongon. Sa mga bulan akong gisakit ang akong kaugalingon sa negatibong mga kaisipan sama sa, ‘Danghag gayod ako nga mituo sa iyang mga binakak.’ O, ‘Ako dili maayong mohukom sa kinaiya.’ Kini mitultol sa matahapong panapos: ‘Dili na gayod ako mosalig ug lalaki.’ Ang praktikal nga paagi sa artikulo sa pagbaton ug positibong kaisipan nakatabang kanako sa pag-ayom sa pagtamod-sa-kaugalingon ug sa pagpahinumdom sa akong kaugalingon nga kining yugtoa usa lang ka edukasyonal nga kasinatian.

R. M., Tinipong Bansa

Akong gidayeg ang paghisgot ninyo sa ulohang negatibong mga pagbati. Bisan pa niana, dili tanang negatibong pagbati gipahinabo sa may-panimuot nga kaisipan. Ang wala-sa-panimuot nga mga kaisipan​—sama sa gipugngang mga panumdoman sa pag-abuso sa pagkabata—​makapatungha usab ug kusganong mga pagbati. Ang pila tingali mosulay sa pagpadapat niining impormasyona nga makadiskobre lamang nga ang pagbuhat niana dili makahatag kanilag mas maayong pagbati. Ang ilang suliran tingali mas halalom pa. Ang mga tawong mobati nga kinahanglang tugkaron ang ilang mental o emosyonal nga kahimsog​—kini ba kaha naglangkit sa propesyonal nga tabang o dili—​angayng dili hukmang naghingapin.

M. W., Tinipong Bansa

Salamat kaninyo tungod niining mga komentoha. Kinahanglang timan-an sa mga magbabasa nga ang mga artikulo wala ipunting sa mga indibiduwal nga nagaantos gumikan sa seryosong mga suliran sama sa hilabihang depresyon o sa mga sangpotanan sa pag-abuso sa pagkabata. Ang mga ingon makakuhag pila ka kaayohan sa pagpadapat sa mga sugyot nga mabasa didto; bisan pa niana, ingon sa gipahayag sa sinugdanan, ang mga artikulo mipunting sa “normal negatibong mga pagbati nga nasinatian sa tanan.” Mahitungod sa grabeng mga matang sa depresyon, ang artikulo midawat nga ang maong mga suliran “tingali nagkinahanglag propesyonal nga pagtambal.”​—ED.

Mga Luha Dili pa dugay ako nakatambong sa lubong sa usa ka matinumanong Kristohanon nga mialagad ingong usa ka ansiano sa among kongregasyon sulod sa daghang tuig. Sa dihang ang lungon ila nang gipagawas sa tigomanan, mihilak gayod ako. Kadaghanan sa uban nga mitambong, hinunoa, mikontrol sa ilang mga pagbati. Paglabay lang sa usa ka adlaw, akong nadawat ang Septiyembre 22, 1992, nga isyu sa Pagmata! uban sa artikulong “Nganong May mga Luha?” Kadto nakatabang kanako sa pagsabot nga ang mga luha dili ilhanan sa kahuyangan apan usa ka ekspresyon sa hilabihang emosyon. Daghan kaayong salamat tungod sa matulon-anong artikulo.

S. Z., Alemanya

Mga Kamot Ang artikulong “Ang Atong Kahibulongang mga Kamot” (Agosto 8, 1992) makaiikag sa hilabihan. Nasabtan na nako nga kahibulongan ang pagkahimo sa atong mga kamot. Apan kining artikuloha nakatabang kanako nga mabati ang pagkahalangdon sa atong Maglalalang.

K. Y., Hapon

Pag-ampo Salamat kaninyo tungod sa artikulong “Mga Batan-on Nangutana . . . Ginatubag ba sa Diyos ang Akong mga Pag-ampo?” (Septiyembre 22, 1992) Nakaplagan nako ang artikulo nga dako kaayog ikatabang. Kana nagtudlo kanako nga dili ako kanunay moampo alang sa petsepetseng mga hangyo sa materyal nga mga butang. Nasayran usab nako nga kinahanglang magmalahutayon ako sa pag-ampo tungod kay si Jehova dili kanunay motubag dayon. Ug mahimong siya dili mohatag kanato sa tubag nga atong gusto.

B. G., Tinipong Bansa