Ang Pagpamatay Diha sa Luby’s Cafeteria
MIYERKOLES, Oktubre 16, 1991, misugod sama sa ubang mga adlaw alang sa akong asawa, si Paula, ug ako. Karon malantaw namo kinig balik nga talagsaon sa bisan unsang adlaw nga among naagian sukad.
Niadtong hapona didto kami sa Luby’s Cafeteria sa Killeen, Texas, sa dihang gibangga sa usa ka tawong nabuang ang iyang trak diha sa bildo nga bentana ug misugod sa pagpamosil. Siya nakapatayg 22 ug nakasamad ug kapin sa 20 pa ka tawo, sa kataposan iyang giposil ang iyang kaugalingon sa ulo. Kadto mao ang labing daghang napatay nga pagpamosil sa kasaysayan sa T.B.
Si Paula ug ako maoy bug-os panahong mga ministro sa mga Saksi ni Jehova, ug kami mihapit sa Luby’s human sa usa ka buntag nga pagministro. Sayosayo mga 50 kami nga nagtagbo sa among dapit sa pagsimba, sa Kingdom Hall, ug gihisgotan ang among buluhaton sa buntag sa wala pa magsugod. Daghan ang misugyot nga magkita kami sa Luby’s sa pagpaniudto, apan nausab ang plano nilang tanan gawas kang Maria, Paula, ug ako.
Kami nakaabot sa Luby’s sa alas 12:25 s.h. ug milinya sa pagkuhag pagkaon. Sanglit hinay man miabante ang linya, si Maria, nga adunay tun-an sa Bibliya sa ala una, midesisyon sa paglakaw. Si Paula miadto sa kasilyas. Salamat na lang, siya mibalik dayon—kay sa pipila lang ka segundo sa ulahi, ang trak nabangga sa bentana nga mao pay iyang paglabay.
Ang tingog daw sama sa toneladang mga plato nga gihulog. Ang mga bildo, mga lamesa, ug mga lingkoranan, nanglupad sa tanang direksiyon. Dayon dihay tingog nga mibutobuto. Abi nakog mibuto ang trak. Nagtuo ang uban nga nagkaproblema ang drayber sa iyang sakyanan ug miduol aron tabangan siya. Apan iyang giposil sila. Dihay misinggit nga dili makatuo: “Gipamosil niya ang mga tawo!” Naniro na siya bisan wala pa siya makagawas sa trak.
Ang linya sa kan-anan U ug porma. Didto gayod kami sa kurbada sa U. Ang trak mihunong sa sinugdanan sa U nga nahimutangan sa lamesa sa kahera. Gibira ni Paula ang akong kamot, nga nag-ingon: “Manggawas ta dinhi.” Apan gibira ko siya sa paghapa sa salog. Ang mamomosil mipaingon sa linya, nangluthang samtang siya nagpaduol. Sa tibuok panahon, misinggit siya sama sa, “Takos ba kini niini Bell County? Takos ba kini niini Belton [ngalan sa siyudad]?” Kini gisal-otan ug mga pamalikas.
Siya miabot pipila ka piye gikan namo, padayong namosil samtang siya naglakaw. Wala gayod kami nakakita sa iyang nawong, apan duol kaayo siya nga among gibati nga ang salog miuyog dihang makaigo ang mga bala. Kaming duha ni Paula hilom nga nag-ampo kang Jehova. Kami naghapa nga walay lihok; kadtong milihok giposil. Akong gikuptan ang tuhod sa akong asawa, wala mahibalo kon siya buhi o patay ba.
Unya siya miatras, nagsigeg pamosil. Siya miabot sa laing kilid sa linyang U, mihunong duol sa akong tiil. Iyang giposil ang babaye sa akong likod. “Aniay usa alang kanimo,” siya miingon samtang iyang gipalantig ang bala ngadto kaniya. Sa wala pa siya mitiro, ang babaye miingon: “Nagpaingon na siya kanato.” Tingali gituyhad niya ang iyang ulo.
Kusog kaayo ang pagbuto sa posil nga abi nakog naigo ako. Unya akong nadunggan nga mitalikod ang mamomosil ug miadto sa kan-anan, 15 o 20 metros ang gilay-on. Ako nahibalo nga niadtong dapita, dihay bungbong nga nag-ali ug diyutay kanamo gikan sa iyang panan-aw. Busa sa kataposan mitindog ako sa pagtan-aw kon wala ba maunsa si Paula, ug mao usab kanay iyang gihimo, nga nag-ingon, “Manggawas ta!”
Nagdalidali kamig gawas sa pultahan sa atubangan, ug mga walo o napulo usab ang nanggawas. Giunhan kami sa usa ka babayeng tigulang nga dili kaayo makalakaw. Gipugos namo ang among kaugalingon nga magmapailobon bisan pa sa among kabalaka. Nagdagan kaming mitabok sa usa ka bukas nga luna nga ang gidak-on sama sa dulaanan sa potbol ug nakaabot diha sa usa ka apartment sa balay sa duol. Gitawag namo ang usa ka higala ug gihangyo siya sa pagtagbo kanamo sa dalan.
Samtang mibiya kami sa tinukod, among nakita ang mga polis nga nagsingabot gikan sa laing direksiyon. Nangabot na ang mga helikopter sa pagdala sa nangasamdan. Ginerbiyos gihapon kami, wala mahibalo kon hain ang mamomosil. Sa dihang miabot ang among higala, siya naghilak. Siya nakadungog sa balita sa radyo.
Pagsagubang sa mga Epekto Niini
Mipauli kami sa balay, ug ang mga higala padayong nangabot sa pakigkita kanamo. Pagkamakapahupay ang ilang presensiya! Sa pagkabuntag, sama sa among naandan, misugod kami sa among publikong ministeryo. Sa among pagpaingon, mipalit ako ug mantalaan, ug ang mga taho tin-aw nga nakapahinumdom nakog balik sa tibuok hitabo. Among naamgohan nga dili kami andam sa emosyon sa pag-atubang sa publiko, busa namauli kami.
Daghang semana human niadto, nerbiyoson kaming molakaw sa publikong mga dapit. Kas-a miadto kami sa restawran nga nanindag hamburger ug dihay nagpabutog paburot. Ginerbiyos kaayo kami niadto! Ang mga espesyalista sa mga tawong nakaagig mapait nga kasinatian miingon nga ang labing maayong terapiya niadtong matanga sa trahedya nga among naagian mao ang pagsulti kanunay bahin niana. Pagkadako sa among pasalamat sa mga pagduaw sa mga higala sa misunod nga mga adlaw, nga nakahatag kanamog higayon sa paghimo niini!
Ang usa sa among mga higala miingon kang Paula: “Ang ministeryo maoy moayo nimo.” Husto siya. Bisag si Paula nagpanuko sa pag-uban sa among publikong pagministeryo niadtong unang semana, mibalik dayon siya sa pultahan-ug-pultahan nga ministeryo ug nagadumalag mga pagtuon sa Bibliya human niadto.
Husto gayod ang Bibliya sa dihang mipasidaan kini nga ang usa nga magpalain sa kaugalingon makabatog mga suliran. (Proverbio 18:1) Among nahibaloan nga ang uban, apil ang mga tawo nga wala gani didto niadtong adlawa sa restawran, nagpalain sa ilang kaugalingon. Ingong resulta, bisan milabay na ang daghang bulan sa pagpamatay, sila nangahadlok gihapon sa paggawas sa publiko.
Ang ilabinang nakatabang kanamo sa pagsagubang niini nga kasinatian mao ang pagsabot sa mga tagna sa Bibliya. Ang atong mga adlaw gipaila diha sa Pulong sa Diyos nga mao “ang kataposang mga adlaw [dihang] ang kritikal nga panahon nga malisod sagubangon moabot.” (2 Timoteo 3:1) Busa ang mga trahedya sama sa pagpamatay diha sa Luby’s Cafeteria, ikasubong isulti, ang madahom. Gani, ang iladong eksperto, si Dr. James A. Fox, miingon nga ang napulo sa labing dagkong mga pagpatay sa kasaysayan sa Amerika, walo nahitabo sukad sa 1980.
Si Jack Levin, propesor sa sosyolohiya ug kaubang awtor sa librong Mass Murder, miingon nga kining pagpamatay sa masa nagpabanaag sa pagkahugno sa katilingban ug sa ekonomiya. “Bation sa mas daghan pang hamtong mga lalaki nga sila gilabyan na sa kinabuhi,” matud pa niya. “Sila nawad-an sa ilang mga trabaho o gibulagan. Ang mga sistema sa pagtabang nga mabatonan niadto nagakabungkag, sama sa pamilya ug sa simbahan.” Dayag mao kanay nahitabo sa mamumuno, ang 35-anyos nga George J. Hennard, nga gikan sa usa ka bungkag nga pamilya ug bag-o pang gikuhaag mga lisensiya sa pagkamarinero tungod kay gidudahan siya nga nag-abuso sa droga.
Oo, ang mga tawo nagkinahanglag pinasukad-sa-Bibliya nga paglaom sa matarong bag-ong kalibotan nga gisaad sa Diyos. (2 Pedro 3:13; Pinadayag 21:3, 4) Ang among pagsalig nga ang tanang mga trahedya karong adlawa sa dili madugay mahimong hanap nga panumdoman lamang nakalig-on kang Paula ug kanako latas niining masulayong panahon. Ang Diyos tinuod nga nakahatag kanamog kahupayan, sama sa gisaad sa iyang Pulong nga maoy iyang himoon. (2 Corinto 1:3, 4)—Sumala sa giasoy ni Sully Powers.
[Hulagway sa panid 23]
Giinspeksiyon sa mga polis ang sulod sa Luby’s Cafeteria diin gibangga sa mamomosil ang trak lahos sa bentana sa atubangan
[Credit Line]
Courtesy of Killeen Daily Herald
[Hulagway sa panid 24]
Wala hiilhing mga babaye sa gawas sa restawran diin ang mamomosil nakapatayg 23 ka tawo apil ang iyang kaugalingon
[Credit Line]
Courtesy of Killeen Daily Herald
Uban sa akong asawa, si Paula