Masaker sa Port Arthur—Nganong Nahitabo Kadto?

SINULAT SA KORESPONSAL SA PAGMATA! SA AUSTRALIA

DOMINGGO sa hapon, Abril 28, 1996, ang panahon hayahay sa Port Arthur Historical Site, usa ka iladong sentro sa turista sa Tasmania, Australia. Ang Broad Arrow Café nagdasok sa mga tawong naniudto. Sa mga 1:30 s.h., usa ka 28-anyos nga bulawg-buhok nga batan-ong lalaki nga nakahuman na ug kaon sa gawas nga kan-anan sa restawran misulod sa tinukod ug misugod sa pagpamusil.

Ang mga suki nangalup-og nga patay sa ilang mga lingkoranan, nga nag-ugom pa ug pagkaon. Ang polisya nag-ingon nga “nahisama kadtog pagpamatay sa panggubatan.” Sa dihang gituohan sa mamumusil nga patay na ang tanan​—nakapatay na siyag 20​—kalmado siyang migawas. Sa pipila ka segundo, nakapatay siyag mas daghan kay sa nahitabo sa miaging upat ka tuig sa tibuok islang estado sa Tasmania!

Apan, ang mamumusil nagpadayon sa iyang pagpamatay, minarama nga nagpatay sa mga biktima. Pananglitan, padulong sa gawasanan sa makasaysayanhong dapit, nakita niya si Nanett Mikac kuyog sa iyang mga batang babaye. Gipatay niya si Nanett ug ang iyang tres-anyos. Dayon, sa dihang misulay pag-ikyas ang sayis anyos, iyang giukoy siya ug gipusil hangtod namatay samtang ang bata nagpangurog luyo sa usa ka kahoy.

Human niana, sa kolektahanan sa bayad sa gawasanan sa makasaysayanhong dapit, ang mamumusil nagpatay sa tulo ka sakay sa BMW (kotse) ug nagdagit sa kotse. Sa unahan lang ug diyutay, nakasugat siyag duruha ka tawo sa laing kotse. Pinugos niyang gipasoḱ ang lalaki sa kargahanan sa BMW ug gibuno ang kaubang babaye niini. Dayon, mipadagan siya sa unahan padulong sa Seascape Cottage nga balay-bisita​—nga miabot sa mga 2:00 s.h. Didto, iyang gisunog ang BMW ug gipangbihag ang kinidnap nga lalaki ug ang tigulang nga magtiayon nga nanag-iya sa balay-bisita. Nakapatay siyag 12 ka tawo sukad nga mibiya sa restawran, nga mikabat nag 32 ang gipamatay. Daghang uban pa ang nasamdan.

Pagsangyaw sa Dominggo sa Hapon

Sa kasamtangan, si Jenny Ziegler ug iyang pamilya, nga sakop sa Kongregasyon sa Port Arthur sa mga Saksi ni Jehova, nagtagbo sa 1:30 s.h. isip pagpangandam sa pagpakig-ambit sa ministeryo. Ang pamilya mipadulong dayon sa Port Arthur Historical Site. Si Jenny buot moduaw kang David Martin, ang mahigalaong tag-iya sa Seascape Cottage nga balay-bisita. Di pa dugay, siya ug ang lain pang Kristohanong babaye nakapahimulos ug usa ka panaghisgot sa Bibliya uban kaniya.

Sa pasadog diyutay sa alas 2:00 s.h., samtang si Jenny, ang iyang bana, ug ilang mga anak nagpadulong sa balay-bisita, ilang namatikdan ang aso gikan sa gisunog nga kotse sa nataran. Ang mga polis nagpahunong nila ug gipabalik sila sa ilang agi. “Nagsugod na kamig katahap sa kahimtang,” matod pa ni Jenny. “Daw katingad-an ang kamingaw sa dalan.”

Bisan pa niana, wala gihapoy kalibotan kon unsay nahitabo, ang pamilya misimang gikan sa haywey paingon sa usa ka baybayon aron ipadayon ang ilang giplanong pagsangyaw. Didto, daw way kuydawo ang tanan: Ang kabataan naglangoylangoy, ang mga tawo naglakawlakaw ubay sa baybayon, ug may tigulang nga magtiayon nga nanglingkod sa ilang kotse nga nagbasa. “Giduol sila sa akong bana, ug ang nindot nga panaghisgot misunod,” si Jenny miingon. “Iyang gisuginlan sila nga daw adunay problema sa haywey ug gisugyotan nga kon mobiya na sila sa baybayon, moagi sila sa laing dalan. Nakigsulti ako makadiyot sa usa ka batan-ong lalaki, ug mibiya dayon kami human niana.”

Ang mga Ziegler mipadayon sa pagsubay sa dalan paingon sa Port Arthur Historical Site. “Dinhi, nagbabag sa entrada padulong sa lugar,” misaysay si Jenny, “ang daghang kotse. Sa ulahi among nasayran nga sila nag-ali aron di makita ang mga lawas sa mga tawong gipangluthang. Usa ka tawo mipahibalo kanamo: ‘May tawong naghuramentado pagpamusil; seguro 15 ang patay!’ Gipinahan kaming mobiya dayon.”

Usa ka Makalilisang nga Kataposan Niadto

Ang kakuyaw wala pa matapos, ingon pa ni Jenny: “Ang pagpauli sa balay nakapakulba pag-ayo kay wala kami nasayod kon hain ang mamumusil. Matag panahong makasugat kamig kotse, naghunahuna kami basig siya na ang sakay. Bisag luwas na kaming nakaabot sa balay, gibati namong daling maatake, kay nagpuyo kami sa hilit nga lugar diin ang tawong suheto niining dapita daling makatago. Sanglit ang among Kristohanong mga igsoong lalaki ug babaye nasayod kon diin kami moadto nianang hapona, nakadawat dayon kamig mga tawag nga nagsusi sa among kahimtang.

“Samtang among gipamalandong ang nahitabo, among naamgohan nga kon nasayosayo lang kamig abot ug pipila ka minuto aron duawon ang tag-iya sa balay-bisita, lagmit naapil kami sa mga gibuno. Nakuyawan kaming naghunahuna nga basin ang mamumuno nagpunting na kanamo sa iyang riple samtang nakigsulti kami sa polis didto!”

Kapin sa 200 ka polis ang ngadtongadto miliyok sa balay-bisita nianang gabhiona sa Dominggo, nga nanghupo aron di-maigo sa panalagsang pangluthang sa mamumuno. Pugsanon siyang nangayog helikopter aron gamiton sa iyang pag-ikyas, apan nianang gabhiona ang negosasyon napakyas. Sa pagka-8:00 s.b. sa Lunes, ang aso nakitang gautbo gikan sa balay. Ang mamumusil migawas nga buhi, bisan tuod nakaagom siyag mga sunog. Ang tulo ka bihag, lakip na ang tag-iya sa balay-bisita nga buot untang duawon sa mga Ziegler, sa ulahi nakaplagang patay sa naugdawng abo sa balay, nga nagpausbaw sa gidaghanong namatay ngadto sa 35.

Nganong Nahitabo Kadto?

Mga pito ka semana sayosayo niana, niadtong Marso 13, usa ka mamumusil sa Dunblane, Scotland, misulod sa gimnasyum sa usa ka eskuylahan ug nangluthang sa 16 ka kabataan ug ilang magtutudlo. Uyon sa karaang sanglitanan sa telebisyon nga, “Kon dugo ang iula, kini pangunang balita,” kini nahimong internasyonal nga balita. Ang pipila ka eksperto sa pamatasan nagsugyot nga ang mamumusil sa Australia hayan misulay sa pagpalabaw sa gidaghanong gipatay sa pagbuno sa Dunblane. Makapaikag, sa Tinipong Bansa, ang gikaingong Zodiac nga mamumuno, kinsa sa daghang katuigan nanghasi sa New York City, miingon nga gisulayan niyang palabwan ang ubang mamumuno nga iyang nabasahan.

Ang laing hinungdan nga matod pa sa daghan nakatampo sa epidemya sa pagpamatay mao ang sekso ug kapintasan nga gipakita sa mga pelikula ug mga video. Ang Herald Sun sa Australia nagtaho: “Ang total nga 2000 ka mapintason ug pornograpikong mga video nakuha gikan sa balay sa gidudahang tigpatayg-daghan sa Port Arthur nga si Martin Bryant. . . . Ang pagkadiskobre sa tagoanag video nahimo sa dihang gipunting ang pagtagad nganha sa papel sa mapintasong mga salida sa masaker sa Port Arthur.” Sa susama, ang Daily News sa New York nagtaho nga “duha ka kahon sa pornograpikong mga video nahimutang sa usa ka kama” sa miangkong Zodiac nga mamumuno.

Sa dihang nahibaloan ang masaker sa Port Arthur, ang pipila ka estasyonan sa telebisyon dihadiha nagbag-o sa ilang gieskedyul nga mga programa. Human niana, ang kolumnistang si Penelope Layland misulat sa artikulong “Pagkasalingkapaw sa TV Bahin sa Kapintasan ug Kasubo” ug miingon: “Ang tinuod, ang di-pagpasalidag kapintasan maoy panggawas ug temporaryo lamang. Ugma, sunod semana, sunod bulan, mobalik na usab kini sa naandan.”

Apan, aron masabtan pag-ayo kon nganong ang kapintasan kaylap kaayo karon, kinahanglang paklion nato ang Bibliya. Kanhiay pa kining nagtagna nga “sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya . . . walay pagpugong-sa-kaugalingon, mabangis, walay gugma sa pagkamaayo.” (2 Timoteo 3:1-5) Busa, ang pag-uswag sa kapintasan karon nagdugang lamang sa ebidensiya nga kita ania na sa kataposang mga adlaw ug nga ang kataposan niining sistemaha sa mga butang hapit na.​—Mateo 24:3-​14.

Sama sa gihunahuna tingali sa daghan, ang mga demonyo​—ang tuman-ka-daotan dili-makitang espiritung mga puwersa​—nalangkit sa epidemya sa linuog, hinayop nga kinaiya. (Efeso 6:12) Human ihubit ang pagtambog ni Satanas nga Yawa ug iyang mga demonyo gikan sa langit, ang Bibliya nag-ingon: “Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” (Pinadayag 12:7-9, 12) Ania kita mismo nianang panahona sa kaalaotan, ug si Satanas ug ang iyang mga demonyo naggamit sa bisan unsang paagi nga ilang mahimo aron agdahon ang mga tawo sa pagbuhat sa mas daghang buhat sa kapintasan.

Apan, si Satanas, iyang mga demonyo, ug ang ilang tuman-ka-daotang kalibotan sa di-madugay mahanaw, ug ang pagmando sa Gingharian sa Diyos magpasulod sa usa ka bag-ong kalibotan sa pagkamatarong. (Daniel 2:44; Mateo 6:9, 10; 2 Pedro 3:13; 1 Juan 2:17; Pinadayag 21:3, 4) Si Jenny miingon: “Sa pagkakaron, kami ‘naghilak uban sa mga tawong nanghilak,’ apan maoy among tinguha nga ipaambit ang among paglaom sa Gingharian niadtong nanimuyo sa komunidad nga nasubo pag-ayo niining trahedyaha.”​—Roma 12:15.

[Hulagway sa panid 17]

Ang Broad Arrow Café, diin nagsugod ang pagmasaker

[Map Credit Line sa panid 16]

Mountain High Maps® Copyright © 1995 Digital Wisdom, Inc.