Gikan sa Among mga Magbabasa

Uniberso Angay akong magpasalamat kaninyo alang sa makakutaw-sa-utok nga impormasyon sa seryeng “Pagtuki sa mga Tinagoan sa Uniberso.” (Marso 22, 1992) Apan unsang awtoridad ang atong pasikaran sa pagsulti nga ang red giants, mga pulsar, ug black holes maoy mga yugto sa kinabuhi [ug kamatayon] sa mga bituon? Ang Isaias 40:26 nagahisgot mahitungod sa mga bituon nga “walay mausa kanila ang mawala.”

E. W., Sierra Leone

Kining tekstoha sa Bibliya wala maghisgot kon kaha ang mga bituon may magun-obong kataposan. Inay, kana nagpatataw sa dili matugkad nga kahibalo ug kaalam sa Diyos. Ingong Maglalalang, ang Diyos nasayod sa kahimtang sa matag indibiduwal nga bituon. Walay “mawala” kon bahin kaniya ang pagahisgotan. (Tan-awa “Ang Bantayanang Torre” sa Septiyembre 15, 1989, panid 31.)—ED.

Romansang Tin-edyer Daghan kaayong salamat kaninyo alang sa artikulong “Mga Batan-on Nangutana . . . Unsay Daotan sa Pakig-estoryahanay sa Usag Usa?” (Agosto 22, 1992) Ako nakigsulatay uban sa usa ka lalaki sa akong kongregasyon. Nag-estoryahanay usab kami sa telepono. Ugaling, sanglit walay usa kanamo ang may hustong pangedaron aron maminyo, kami nakahinapos nga dili na mogugol ug daghang panahon sa pagpakig-estorya sa usag usa. Nakapalipay kanako nga mabasahan nga ang among gihimo maoy hustong desisyon.

M. N., Hapon

Mora ug inyong nabasa ang akong hunahuna! Giisip baya nakog ugdang ang makigsulatay sa pila ka ulitawo. Maoy akong pagtuo nga gibinuangan nako ang akong kaugalingon sa paghunahuna nga kining mga sulata maoy pagdasig lamang kanila. Ang inyong artikulo miabot gayod sa hustong panahon.

D. B., Tinipong Bansa

Dose anyos ako ug misulat ngadto sa daghang tawo. Usa kanila maoy lalaki. Wala gayod mosantop kanako nga makabaton ako ug romantikong mga pagbati alang kaniya, apan usa ka adlaw misulat siya kanako ug mipahayag nga nahigugma siya kanako! Ang inyong artikulo miabot sa husto gayod nga panahon!

E. V., Tinipong Bansa

Artraytis Ang inyong artikulo nga “Pagkat-on sa Pagkinabuhi nga May Artraytis” (Hunyo 8, 1992) gibasa uban sa dakong kaikag. Apan ingon nga nagaantos sa artraytis, gibati nako nga kana wala maghulagway sa bug-os nga kagun-oban nga mapahinabo nianang sakita pinaagi sa iyang kadaiyang mga epekto: kabug-at, kasakit, kalapoy, dili-makatulog, ug kaluya. Nagpakita kamo ug letrato sa nakibag nga mga kamot nga mora bag kini ang kinagrabehang artraytis. Ang makitang mga pagkahiwi dili lamang mao ang butang nga among sugakuron. Ang akong kilid sa tuo mius-os sa akong tuong balikawang, ug tungod kay walay mausa ang makakita sa kadaot, ang mga tawo dili moila niana. Ang inyong artikulo nagdasig kanamo sa “pag-ugmad sa malaomong panglantaw,” apan kana usahay lisod nga himoon kon walay pagpaluyo sa uban.

M. J., Tinipong Bansa

Among gipasalamatan kining prangka nga mga komento. Ang among mubo nga artikulo sa pagkatinuod limitado ang gikobrehan. Dugang pa, kana gitumong sa unang bahin sa mga biktima mismo sa artraytis, nga nasayod pag-ayo sa mga epekto nianang sakita. Hinuon, uyon kami nga ang mga higala ug mga membro sa pamilya mas makatabang kon mahibalo sa magun-obong mga epekto sa artraytis ug angayng maningkamot nga magmatinabangon ug mapaluyohon.​—ED.

Daghan kaayong salamat kaninyo sa pagpatik sa artikulo. Ako 31 anyos ug nag-antos gumikan sa hilabihang kaul-ol sa artraytis. Ang kalapoy nakadalag kaluya, kaguol, ug kapakyasan. Bisan pa niana ako nakasagubang tungod kay ginatagamtam nako ang espirituwal nga kahimsog nga maoy bililhon kaayo alang kanako.

T. R., Tinipong Bansa

Dugay na akong naghulat kaninyo sa paghisgot niining ulohana, ug ako nalipay gayod sa pagbasa niana. Dugay na akong nag-antos sa kangutngot sa rayumahong artraytis sukad sa nag-edad ako ug nuybe. Bisan pa sa kamatuoran nga kami usahay makakaplag sa among kaugalingon nga kauban sa uban nga wala makasabot sa bug-os sa among suliran, si Jehova nagpakita sa iyang interes ug midasig kanamo pinaagi sa mga artikulo sama niini.

P. C., Italya