Mapuslanong mga Impormasyon Alang sa Di-Kinaiyanhong mga Ginikanan
ANG Buhatan sa Senso sa T.B. nagtagna nga sa tuig 1995 ang mga pamilyang may hinablos modaghan pa kay sa kinaiyanhong mga pamilya. Nianang panahona, 59 gikan sa matag 100 ka kabataan magkinabuhi sa “nagkasagol nga pamilya” (mga pamilyang may inaina o amaama) sa dili pa sila mag-edad ug 18 anyos. Ang mosunod maoy mga sugyot nga motabang sa nagakadaghang di-kinaiyanhong mga ginikanan.
Hatagi Kinig Panahon: Kinahanglang hinumdoman sa mga ginikanang di-kinaiyanhon nga ang mga hinablos nagkinahanglan ug panahon sa pagdawat sa bag-ong ginikanan. Ang propesyonal sa kahimsog sa kaisipan nga si Mavis Hetherington nagsaysay nganong ang unang mga bulan—o mga tuig—mahimong malisod kaayo: “Sa sayong mga ang-ang sa pagminyo pag-usab, ang mga hinablos maoy masupilon, sapoton, negatibo ug masuko dili lang sa ilang ama-ama apan sa ilang inahan usab. Sila masuko . . . sa ilang inahan tungod kay nagminyo pag-usab.” Ang di-kinaiyanhong mga ginikanan kinahanglang mosabot sa pagbati sa mga kabataan, bisan tingali malisod kini.—Tan-awa ang Proverbio 19:11.
Tukora Una ang Maayong Relasyon: Si Joy Conoll, sa iyang librong Stepfamilies, maalamong nagpasidaan nga ang di-kinaiyanhong mga ginikanan maanaa sa labi pang maayong kahimtang sa pagtul-id sa mga kinaiya sa ilang mga hinablos human sila makatukod ug maayong relasyon uban kanila. Sa kasamtangan, labing maayo nga ang kinaiyanhong ginikanan maoy mopahamtang sa gikinahanglang disiplina. (Itandi ang Proverbio 27:6.) Sa laing bahin, ang sinagop nga mga ginikanan makahatag sa mga kabataan ug pagbati nga adunay butang sa ilang kinabuhi nga nagpabilin pinaagi sa pagpaluyo sa mga buluhaton nga dugay na nilang gikalingawan— sama sa pagpamaseyo o pagduladula nga magkauban. Apan, dili gayod gamiton sa mga amaama ang panahon sa pagpangaon ingong mga okasyon sa pagbadlong sa pamilya.
Likayi ang Pagkamapihigon: Kon mahimo, likayan sa amaama o sa inaina, ang bisan unsang timailhan sa pagkamapihigon ngadto sa iyang kinaiyanhong mga anak, bisan unsa kini ka lisod usahay.—Itandi ang Roma 2:11.
Pakigsuod nga Mabinantayon: Usa ka bag-ohayng pagtuon sa mga pamilyang may hinablos nakakaplag nga kasagaran ilabinang lisod sa mga amaama ug sa hinablos nga mga babaye nga magkauyon. Usa ka awtor nagpahayag niana niining paagiha: “Ang mga amaama maningkamot sa pagpakigsulti, ug ang hinablos nga babaye dili gustong makigsulti. Ang mga amaama maningkamot sa pagdisiplina, apan ang hinablos nga mga babaye mosukol.” Ang awtor naglakbit-asoy: “Daw walay bisan unsang mabuhat sa amaama, sa sinugdan, ngadto sa hinablos nga mga babaye ang molampos.” Busa ang labihang pagpailob ug empatiya gikinahanglan. Samtang ang mga hinablos nga babaye mopabili sa binaba nga pagdayeg gikan sa ilang amaama, sagad sila samokan sa pisikal nga mga lihok sama sa paghalog. Ang amaama kinahanglang makaamgo nga ang hinablos nga babaye tingali mobating ingon niini. Kon mao man, kinahanglang labaw niyang ipasiugda ang binaba nga pagdayeg ug ang pakig-estoryahay kay sa pisikal nga pasundayag sa pagbati.—Itandi ang Proverbio 25:11.
Pagbantay sa Kasina: Ang kasinatian nagpakita nga daghang hinablos nga mga babaye mokiling sa pag-isip sa inaina ingong kaindig. Ang usa ka inaina nga makapanglantaw ug mobati sa pagbati sa hinablos nga babaye sa ingon maalamong magsanta sa dili-kinahanglanong panagtigi alang sa pagtagad. Dakog mahimo ang amahan sa paghupay sa kabalaka pinaagi sa pagpasalig sa iyang anak nga babaye sa iyang padayong pagmahal kaniya ug pagtahod. (Proverbio 15:1) Ang mga tigdukiduki nagpasidaan nga ang inaina sagad maningkamot pag-ayo ug sulod lang sa mubong panahon aron nga dawaton ingong inahan sa ilang bag-ong hinablos nga mga babaye. Sa makausa pa, ang pailob mao ang yawi.
Ang pagkahimong di-kinaiyanhong ginikanan dili sayon. Apan mahimo kini, ingon sa gipakita sa linibong mga panig-ingnan. Ug hinumdomi, ang Bibliya naghatag sa kinamaayohang tambag alang sa kalamposan sa bisan unsang kahimtang sa pamilya sa dihang kini miingon: “Sul-obi ang inyong kaugalingon sa gugma, kay kini maoy hingpit nga bugkos sa panaghiusa.”—Colosas 3:14.