“Magpadala Tag Kard”

“PAGKANINDOT kadto nga hinapos-sa-semana!” Sa pagkauli sa balay human moduaw sa mga higala, may malipayon kang mga handumanan niadtong hayahayng panahon. Maabiabihon kaayo ang inyong giabotan! Aron ipahayag ang inyong pagpabili, moingon ka ngadto sa imong pamilya: “Magpadala tag kard.”

Unya moadto ka sa lokal nga mga tindahan aron mopalit ug kard. Imong makita ang labihan ka daghan apan makapalibog nga mga laray. ‘Unsang kard ang pilion ko?’ ‘Hain niana ang adunay tukmang mga pulong?’ Dili baya sayon ang pagpili! Busa nganong dili ka mogama sa imong kaugalingong kard?

Paggama sa Imong Kaugalingong mga Kard

Kini mas sayon kay sa tingali gihunahuna nimo sa sinugdan. Ang gikinahanglan lang nimo mao ang palid sa way-sulat nga papel o nipis nga kard, igsusulat, ug, siyempre, usa ka mensahe. Uban sa desinyo nga gipili nimo, ikaw makadugang sa personal nga timaan. Sa unsang paagi? Aniay duha ka sugyot.

(1) Pilia ang usa ka hulagway nga imong gusto. Tingali kana usa ka esena gikan sa usa ka magasin nga imong matabas ug ikapapilit sa imong kard. Usa ka asawa nagsorpresa sa iyang bana pinaagi sa usa ka bag-ong kard aron handomon ang ilang ika-25ng anibersaryo sa kasal. Iyang gigunting ang duha ka gagmayng letrato sa iyang bana ug sa iyang kaugalingon ug gipatapot kana sa simpleng kard aron ipahayag ang iyang kalipay sa ilang giambitan nga kinabuhi.

(2) Gamita ang mga bulak. Sila maayog desinyo. Human ipita ug paugha kana, itaod kana sa imong kard sa pagdugang sa kahimuot ug pagkamaartihon.​—Tan-awa ang kahon.

Bisan unsang dekorasyon ang pilion nimo, sa walay duhaduha ang mensahe mao ang labing bililhon. Ang paggama sa imong kaugalingong mga kard mohatag kanimo ug higayon sa pagtagik sa mga pulong nga tinuod magpahayag sa imong mga gibati.

Usa ka Haom nga Mensahe

Si Haring Solomon sa kakaraanan “nangita ug mga pulong nga kahimut-anan ug nagsulat sa tukmang mga pulong sa kamatuoran.” (Ecclesiastes 12:10) Kanang piniling mga pulong mohimo sa imong sinulat nga mensahe “nga sama sa mga mansanas nga bulawan diha sa linala nga salapi” alang sa dumadawat.​—Proverbio 25:11.

Pilia ang mga pulong nga may kahimut-anang epekto. Ikaapil nimo ang pipila sa dinasig nga mga pulong sa Bibliya aron ipahayag ang imong tim-os nga mga gibati. Kana labing kahinangpan.

Kon unsaon nimo pagsulat kanang mga pulonga diha sa kard mohatag usab ug mensahe. Ang pagsulat niana nga hapsay ug klarong mabasa daghan ug ikasulti mahitungod kanimo, ang nagpadala.

Mga Okasyon sa Pagpadalag mga Kard

Ang mga kasal maoy malipayong mga okasyon nga nganha niana ang mga kaslonon tingali gustong modapit sa ilang mga higala ug mga paryente. Kon aduna silay salusalo human sa kasal, sila makapahayag ug pagtagad sa kaayohan sa mga manambong gikan sa layo pinaagi sa pagbutang diha sa imbitasyon ug timaan sa oras sa pagsugod ug pagkatapos niana.

Ang pagkatawo sa usa ka bata mahimong laing okasyon sa pagpadalag kard. Kini magpahibalo sa mga ginikanan sa bag-ong nahimugso nga miduyog ka sa ilang kalipay.

Gawas pa nianang mga okasyona, mahunahunaon gayod ang pagpahayag ug pasalamat tungod sa mga kalulot nga gipakita sa mga tawo kaninyo. Makapahupay ka usab sa masakiton ug niadtong naospital, nga magpasalig kanila sa imong gugma ug kabalaka. Ang imong sadyang pangomosta ug ang nindot nga hulagway nga gidala sa imong kard makatabang paghupay sa depresyon ug kabalaka. Sa pagkatinuod, sumala sa giingon sa karaang sanglitanan, “pagkamaayo gayod sa usa ka pulong sa hustong panahon!”​—Proverbio 15:23.

Kon layo o bisan duol, ipahayag ang imong pagduyog sa kasubo ngadto sa namatyan ug minahal. Ang pahinumdom sa talagsaong paglaom sa pagkabanhaw nga ginatanyag sa Bibliya mahimong angay.

Busa, sa dihang imong gibati nga natukmod aron ipahayag ang imong mga pagbati ngadto sa uban, nganong dili magpadalag kard? Siyempre, kini dili mopuli sa pagpakigsulting direkta ngadto sa tawo kon posible. Hinunoa, kini dugang nga higayon nga magmaluluton.

[Kahon sa panid 26, 27]

Usa ka Talagsaong Dekorasyon

Ang pagdekorar ug napiit nga mga bulak makapatahom sa imong mga kard. Kini yano, barato nga paagi sa paghatag sa imong mga kard ug linaing estilo. Diyutay ra kaayong kasangkapan ang imong gikinahanglan.

Pagpupo sa mga Bulak

◻ Seguroa nga ikaw gitugotan sa pagpupo sa mga bulak nga gusto nimo.

◻ Likayi ang pagpupo samtang nag-ulan.

◻ Ayaw pupoa ang larag nang mga bulak o mga dahon.

◻ Ayaw usiki ang mga bulak.

Ang pila ka bulak dili mapiit pag-ayo kon sila undanon (bluebells, mga liryo, orkids) o lainon ug porma (daffodils, lila, dagkong mga rosas, thistles).

Pagpiit sa mga Bulak

◻ Ibutang ang mga bulak tali sa mga palid sa papel nga molama nga gikimpitan tali sa duha ka palid nga plywood. Ang pagdugang ug pila ka hut-ong sa mantalaan motabang sa pagsuhop sa kaumog. Hugta ang mga kimpit sa kada adlaw samtang magkauga ang mga bulak.

◻ Hulat ug labing menos usa ka semana una buksan ang pang-ipit.

◻ Susiha sa daklit aron tan-awon kon ang mga bulak maayong pagkaipit, ug kon kinahanglan, usba ang posisyon ibabaw sa ugang papel.

◻ Tak-opi pag-usab nga hugot ang pang-ipit, ug pasagdi kana sa igang, ugang dapit sa duha o tulo pa ka semana una kuhaon ang mga bulak.

Pagtaod sa mga Bulak

◻ Gamit ug diyutayng papilit.

◻ Ampingi ang pagkupot sa naugang mga bulak, nga tingali gamiton ang pang-ibot ug buhok.