Kabulakan—Kahibulongan sa Kalalangan

KAHIBULONGAN gayod ang pagtanom sa mga lisong nagkadaiya ang matang diha sa sama rang yuta ug dayon sa ulahi pagtan-aw sa kabulakan nga sarisari ug matahom! Ang ilang anindot kaayong mga pasunding sa bulok ug ilang kahumot tinuod makalipay!

Tinuod, moingon tingali ang pipila nga ang bulok ug kahumot sa kabulakan kinahanglanon aron danihon ang mga insekto sa pag-pollinate sa mga tanom. Apan kon kana lang ang hinungdan sa maong katahom, kadaiya, ug kahumot, nganong ang kabulakan dako mang tinubdan sa kalipay sa mga tawo? Nganong kana sila dako usab nga tinubdan sa kalinaw sa hunahuna ug kaayohan kanato?

Sa walay duhaduha, ang mga kasingkasing magmaya inigkakitag kabulakan. Ang buloknong pungpong sa bulak dihadiha makapasanag sa adlaw sa usa ka asawa o inahan, makapalipay sa usa ka higalang masakiton, makapangaya sa magul-anong kasingkasing, makapagitib sa panaghigala ug makapalambo sa gugma. Ang pag-agi sa kapatagan nga inadornohan sa kabulakan tinuod makapatugob. Ug unsang bentanaa ang wala mapatahom o kusina nga naarang-arang o salas nga nabag-o tungod kay adunay matahom, delikado nga kabulakan? Dili gayod unta nindot kaayo ang kalibotan kon wala ang kabulakan!

Ang 250,000 ka klase sa kabulakan dili ingong sulagmang mitungha. Sila maoy usa ka pagpahayag sa gugma sa atong Maglalalang, si Jehova nga Diyos, alang sa tawhanong pamilya. Ug bisan pag karong adlawa ang yuta gidaot sa tawo, ang panahon moabot sa dili madugay dihang kini igapasig-uli nga Paraiso nga mao ang katuyoan sa Diyos alang niini. Unya, sumala sa ginatagna sa dinasig nga Pulong sa Diyos: “Ang kamingawan ug ang mamala nga yuta maglipay, ang desyerto magsadya ug mamulak; sama sa rosas kini mamulak sa kadagaya, ug magsadya uban ang kalipay ug pag-awit.”—Isaias 35:1, 2, Revised Standard Version.

[Mga Letrato sa panid 16, 17]

Patuo nga pagbiyo gikan sa itaas nga wala: antulanga, African daisy, hybrid tea rose, water lily