Usa ka Bag-ong Tunghaan sa Aprika

Sinulat sa koresponsal sa Pagmata! sa Nigeria

NIADTONG Hulyo 1990 usa ka sulat ang gibasa nga nagpahinabog dakong kalipay taliwala sa kapin sa 400 ka boluntaryo, mga Saksi ni Jehova, nga nagpuyo ug nagtrabaho sa sangang buhatan sa Watch Tower Society sa Igieduma, Nigeria. Ang Tunghaan sa Ministeryal nga Pagbansay, nga gisugdan sa Tinipong Bansa niadtong 1987, moabot sa Aprika, ug ang unang mga klase pagahimoon sa Igieduma!

Sa misunod nga mga bulan, ang pamilyang Bethel nangandam alang sa unang klase.a Ang mga estudyante ug mga instruktor nagkinahanglag mga puy-anan. Ang naglungtad nga mga lawak alang sa mga bisita dili pa igo; 15 ka dugang lawak ang gikinahanglan. Busa ang mga Saksi nag-usab sa mga lawak-pundohanan aron mahimong madanihong mga lawak-puy-anan. Kini naglakip sa pagbaldosa sa salog, pagpintal sa mga bungbong, ug pagtaod ug mga kurtina. Ang pandayanan naghimo ug nagmontar ug mga katre, mga aparador, ug mga talad-sulatanan. Sa kataposan, gipasulod ang mga silya, mga suga para sa pagbasa, ug mga butanganan sa libro. Ang mga butanganan sa libro gipuno sa teokratikanhong mga publikasyon.

Dugang pa, ang lawak alang sa pamilya gihimong lawak-klasehanan ug librarya alang sa mga estudyante. Usa sa mga lawak alang sa masakiton nahimong temporaryong opisina alang sa mga instruktor ug gisangkapan ug mga talad-sulatanan, mga lamesa, ug ubang kasangkapan sa opisina. Kasamtangan, sa dihang ang balita mahitungod sa nagasingabot nga pagtungha gipahibalo sa tibuok nasod diha sa mga kombensiyon ug mga asembliya sa mga Saksi ni Jehova, ginatos ka aplikasyon miabot gikan sa umaabot nga mga estudyante.

Sa unang semana sa Pebrero 1992, andam na ang tanan. Duha ka instruktor, si Michael Purbrick ug Peter Nicholls, miabot gikan sa Britanya aron sa pagtudlo sa unang klase. Dugang pa sa 22 ka estudyante, tulo ka umaabot nga mga magtutudlo miabot usab, si Isaiah Mnwe, Isaiah Olabode, ug Pius Oparaocha. Sila mga Saksing Nigeriano kinsa pagabansayon aron sa pagtudlo sa nagsunod nga mga klase.

Katuyoan sa Tunghaan

Sa tibuok Bethel, dihay kahinangop ug kahinam. Ngano? Tungod sa maayong epekto sa tunghaan diha sa paghimog tinun-an nga buluhaton sa Nigeria. Dugay na kanhi si Jehova nagtagna nga siya magtagana ug “mga gasa diha sa mga tawo.” (Salmo 68:18) Gibuhat niya kini sa apostolikanhong kapanahonan, segon sa gisulat ni apostol Pablo sa Efeso 4:8-11. Karong adlawa, si Jehova nagtagana usab ug mga gasa diha sa mga tawo. Ang Tunghaan sa Ministeryal nga Pagbansay maoy mahigugmaong tagana sa pagsangkap sa pipila niining mga tawhana nga modawat ug dugang organisasyonal nga mga kaakohan.

Sa nasod, adunay kapin sa 160,000 ka Saksi sa kapin sa 3,000 ka kongregasyon. Ang pipila niining mga kongregasyona adunay usa o duha lamang ka ansiano ug pila ka ministeryal nga mga alagad. Ang ubang mga kongregasyon adunay halapad nga mga teritoryo diin ang maayong balita wala pa malukop ug sangyaw. Busa, adunay dakong panginahanglan sa takos nga mga tawo dili lamang aron sa pagpanguna sa pagwaling buluhaton apan sa pagbantay usab sa panon ug pagpanudlo diha sa mga kongregasyon.

Ang tumong sa Tunghaan sa Ministeryal nga Pagbansay mao ang pagbansay sa mga igsoong lalaki aron mag-atiman niining maong mga responsibilidad. Human sa paggraduwar, pipila sa mga estudyante mosugod sa espesyal payunir nga buluhaton o sa nagapanawng buluhaton, mga dapit sa pag-alagad diin adunay dakong panginahanglan sa Nigeria. Ang uban mamalik sa ilang mga kongregasyon aron sa paghatag ug tabang ug pagdasig sa lokal nga mga igsoon. Pagkadakong panalangin ang maong takos nga mga lalaki nganha sa mga kongregasyon nga ilang gialagaran!

Talagsaong Pagbansay

Bisan kon ang Tunghaan sa Ministeryal nga Pagbansay maoy sumpay sa Tunghaan sa Bibliya sa Watchtower sa Gilead, nga nagbansay sa mga misyonaryo alang sa langyawng pag-alagad, ang kurikulum niini maoy talagsaon. Sulod sa walo-ka-semana nga pagtungha, ang mga estudyante magahimo ug bug-os nga pagtuon sa Bibliya. Sila mainampingong magtagad sa lainlaing mga pagtulon-an sa Bibliya, lakip ang mga tambag bahin sa pagpasibsib nga buluhaton ug mga giya sa pagdumala sa mga suliran diha sa Kristohanong pagkinabuhi. Sila usab makakat-on kon unsay gitudlo sa Kasulatan mahitungod sa administratibo, hudisyal, ug organisasyonal nga mga butang. Sila makadawat ug linaing pagbansay sa publikong pagsulti ug makadawat ug personal nga pagtagad gikan sa mabinationg mga instruktor, kinsa motabang kanila diha sa ilang espirituwal nga pag-uswag.

Tanantanan, ang aberids nga estudyante makadawat ug 45 ka asaynment, ug siya makapahimulos sa 256 ka oras nga instruksiyon. Dugang pa, siya mogugol ug 140 ka oras nga magtrabaho sa homwork ug 14 ka oras nga magkuha ug mga pasulit.

Bisan kon ang pangunang basahon nga tun-anan mao ang Bibliya, ang mga estudyante gihangyo nga dalhon sa tunghaan ang ilang personal nga mga kopya sa 16 pa ka ubang libro, mga giya sa pagtuon sa Bibliya nga gipatik sa Watch Tower Society. Panahon sa pagtungha, ang mga estudyante mohimog bug-os nga panukiduki sa ubang mga publikasyon nga mabatonan diha sa nasangkapan pag-ayo nga librarya sa Bethel. Dayag, sila kinahanglang maayo nga mga magbabasa.

Gawas pa sa buluhaton sa tunghaan, ang mga estudyante motrabahog 45 minutos kada adlaw sa usa sa walo ka departamento sa Bethel: pagpanglimpiyo, lawak kan-anan, pagmentinar sa tugkaran, pag-atiman sa balay, kusina, labhanan, shipping, ug trucking. Sila magpulipulig trabaho aron nga sa pagkatapos sa walo ka semana nga kurso, ang kada usa may kasinatian niining tanang departamento. Usa ka estudyante mikomento: “Ang akong pagtrabaho sa lainlaing departamento nagtabang kanako nga makasabot nga si Jehova mao ang tigdumala sa buluhaton.” Ang lain miingon: “Ang mga magtatan-aw andam nga motudlo ug motul-id diha sa gugma.” Ug ang lain mikomento: “Ang buluhaton sa Bethel maoy buluhaton nga kinahanglang sulayan ug tan-awon sa tanan nga kini maayo.”

Sa unsang paagi ang mga igsoong lalaki misanong sa pagbansay nga ilang nadawat? Ang usa miingon: “[Kadto maoy] labing maayo sa tanang tunghaan.” Ang lain pa madasigong mipahayag: “Pagkalabaw kaayong kahikayan!” Uban sa mga kasingkasing nga napuno sa kalipay ug pagpabili, ang mga estudyante sa unang klase misulat: “Ang among tinguha mao . . . ang pagtukod sa among kinabuhi palibot sa mensahe sa maayong balita.”

Mga Komento Gikan sa Kanataran

Sulod sa unang bahin sa 1992 ug 1993, ang unang upat ka klase sa Tunghaan sa Ministeryal nga Pagbansay sa Nigeria gihimo. Sa usa ka sulat sa pasalamat ngadto sa Nagamandong Lawas, ang mga estudyante sa ikaduhang klase misulat: “Sa pagkatinuod, wala pa kami makatambong ug bisan unsang tunghaan nga mas maayo niini. Ang kurso mas maayo pa kay sa programa sa unibersidad. Busa sayon ang pag-uyon kang William Phelps nga ‘ang kahibalo sa Bibliya nga walay kurso sa kolehiyo labi pang bililhon kay sa kurso sa kolehiyo nga walay Bibliya.’ Niining tanan, ang inyong tiunayng interes kanamo maoy dayag. Busa kami determinado sa paghimo sa bug-os-panahong buluhaton nga among karera.”

Sa unsang paagi ang mga graduwado gidawat sa ilang bag-ong mga asaynment? Usa ka nagapanawng magtatan-aw misulat bahin sa duha ka graduwado sa unang klase kinsa nag-alagad ingong espesyal nga mga payunir: “Ang mga tigom karon madanihon na, makapadasig, makalingaw, ug makahuloganon. Ang mga kalihokan sa pag-alagad sa kanataran nagauswag . . . Ang kongregasyon nalipay kaayo . . . Sa dihang giinterbiyo nako ang pila ka igsoon maylabot sa epekto niining mga espesyal payunir, ang nagdumalang magtatan-aw mitubag nga may luha sa kalipay, nga nag-ingon: ‘Kami nagpasalamat kang Jehova ug sa iyang organisasyon tungod sa pagpadala ug maayo ug epektibong mga magtatabang sa among kongregasyon.’”

Kinsa ang Mokuwalipikar?

Ang pagtambong sa Tunghaan sa Ministeryal nga Pagbansay sa bisan unsang nasod maoy kahibulongang pribilehiyo sa pag-alagad, usa ka kahibulongang panalangin gikan kang Jehova. Walay duhaduha, kining maong pagbansay nagtabang sa mga estudyante nga mouswag sa ilang pagbarog ingong espirituwal nga mga tawo ug nagsangkap kanila aron magamit nga mas bug-os pa ni Jehova.

Masabot, ang mga kinahanglanon maoy taas. Aron mokuwalipikar, ang mga aplikante kinahanglang nag-alagad na ingong ansiano o ministeryal nga alagad sa Kristohanong kongregasyon sulod sa labing menos duha ka tuig. Gipalabi kadtong anaa sa regular payunir nga buluhaton. Ang tanan kinahanglang dili-minyo ug taliwala sa 23 ug 50 anyos ang edad. Kinahanglang wala sila mabadlong sa hudisyal o napalagpot sulod sa miaging lima ka tuig. Ang mga aplikante kinahanglang makabasa, makasulat, ug makasultig larino sa Ingles, ug kinahanglang anaa sila sa maayong panglawas, nga wala magkinahanglag linain nga pag-atiman o diyeta.

Talagsaon, kadtong nagboluntaryo kinahanglang andam, kinabubut-on, ug makaalagad bisan asa sila lagmit gikinahanglan. Kini wala lamang magkinahanglan ug lig-ong tinguha sa pagbuhat sa kabubut-on sa Diyos apan usab sa espiritu ni Isaias, kinsa andam nga mitanyag sa iyang kaugalingon sa pagbuhat ug linaing buluhaton, nga nag-ingon: “Ania ako! Ipadala ako.”​—Isaias 6:8.

Ikaw ba may samang espiritu? Ikaw ba anaa sa posisyon nga mokab-ot niining maong pribilehiyo sa pag-alagad? Kadtong nagbuhat sa ingon wala magbasol. Misulat ang usa ka graduwado sa eskuylahan kinsa nag-alagad na karon ingong nagapanawng magtatan-aw: “Alang kanako, ang Tunghaan sa Ministeryal nga Pagbansay maoy gasa nga walay ikatandi. Kana mao ang kinapungkayan sa akong espirituwal nga kinabuhi. Kon ako may kahigayonan sa pagkinabuhi pag-usab, dili gayod ako mopili ug laing dalan sa kinabuhi.”

[Footnote]

[Mga hulagway sa panid 16, 17]

Mga instruktor nga sila si Isaiah Mnwe ug Pius Oparaocha

Instruksiyon sa lawak-klasehanan

Grupo sa diskusyon sa lawak-klasehanan

Pagpanukiduki sa librarya

[Mga hulagway sa panid 18]

Pagtrabaho sa Labhanan ug Departamento sa Shipping