Laing Halandomong Okasyon sa Edukasyon sa Bibliya

HUWEBES, Oktubre 1, 1987, maoy laing halandomong okasyon sa edukasyon sa Bibliya nga gitanyag sa tibuok-yutang Sosyedad sa mga Saksi ni Jehova. Kini nagtimaan sa inagurasyon sa bag-ong Tunghaan sa Ministeryal nga Pagbansay. Ang unang klase sa 24 ka ulitawong mga igsoon mitaho alang sa linaing pagbansay diha sa haluag nga Pittsburgh Assembly Hall sa Coraopolis, Pennsylvania. Ang mainitog kasingkasing nga mga tagbalay lakip sa mga Saksi sa maong lugar mibukas sa ilang mga balay sa pagpapuyo niining mga estudyante alang sa ilang walo-ka-semanang pagbansay.

Nagparehistro ang mga estudyante sa buntag, nakadawat sa ilang librong tun-anan ug pangbukas nga mga instruksiyon. Sa ala 7:30 sa gabii, napuno ang Assembly Hall sa 1,518 ka malipayong mga Saksi nga naghinamhinam aron makabahin sa opisyal nga pagbukas niining bag-ong tunghaan.

Si Albert Schroeder, membro sa Nagamandong Lawas sa mga Saksi ni Jehova, mao ang tsirman. Tapos sa awit ug pag-ampo, iyang gipailaila si Robert Dawson, magtatan-aw sa siyudad sa Pittsburgh. Mainiton giabiabi ni Igsoong Dawson ang 24 ka estudyante sa Pittsburgh ug gidayeg ang 13 ka tagbalay nga mibulontaryo sa pagtaganag kapuy-an alang kanila. Gipahinumdoman niya ang mga tagbalay nga maoy ilang pribilehiyo ang pagpakitag gugmang nagaantos, nagatuo, ug nagalahutay sa tanang butang. (1 Corinto 13:7) Iyang gipahinumdoman ang mga estudyante nga, ingong mga dinapit, angayng magmapasalamaton sila, magmapaubsanon, ug magmatinabangon. Niining paagiha, ang paghigalaayng mosangpot molungtad sa tibuok kinabuhi.

Dayon gipailaila ang mga estudyante, ang matag usa mihatag sa iyang ngalan ug kon diin siya gikan ug kon unsay iyang kurso sa pag-alagad ni Jehova. Ang uban gikan pa sa Puerto Rico, sa Argentina, Canada, ug Hong Kong, ang nanghibilin gikan sa sidlakang bahin sa Tinipong Bansa. Gawas sa Ingles, ang pila kanila nagasultig Kinatsila, Pranses, Italyano, o Intsik.

Sunod gipailaila sa tsirman si James Hinderer ingong usa sa mga instruktor. Gipasukad ang iyang pahayag sa Mateo 7:24, 25, gipasiugda ni Igsoong Hinderer ang bili sa pagpadayon pinaagi sa pagbuhat sa mga butang, bansayon ang butang nakat-onan. Busa, ang mga estudyante magatukod sa ilang “balay” diha sa bato dili sa balas.

Si Randall Davis, ang laing instruktor, ang sunod nga mipakigpulong sa mga estudyante. Gipasukad ang iyang pahayag sa Isaias 54:13, siya miingon nga sila tudloan ni Jehova aron ilang mapaambit ang instruksiyon ngadto sa uban. Sila kinahanglang mosalig diha sa tinuod nga “magtatabang,” ang balaang espiritu ni Jehova nga Diyos.—Juan 14:26.

Mipahayag si Albert Schroeder nga ang gabii nagpahinumdom kaniya sa laing halandomong okasyon sa edukasyon sa Bibliya. Gibalik niya ang Pebrero 1, 1943, dihang ang usa ka gatos ka estudyante, upat ka instruktor (lakip kaniya), ug ang mga dinapit gikan sa Brooklyn nga nagtigom diha sa South Lansing, New York, sa pagbukas sa Watchtower Bible School of Gilead. Kapin sa 44 ka tuig sukad niadto, nakadawat ang Gilead School sa panalangin ni Jehova, sumala sa makita sa nakatag nga kapin sa 6,000 ka nabansay sa Bibliya nga mga misyonero sa tibuok yuta. Unya gipahayag ni Igsoong Schroeder ang nagkalainlaing mga subjects nga itudlo diha sa Tunghaan sa Ministeryal nga Pagbansay. Lakip niini mao ang mga Doktrina sa Bibliya, Teokratikanhong Organisasyon (nga nagahatag pagtagad sa mga responsibilidad sa mga magtatan-aw ug sa ministeryal nga mga alagad), Administrasyon sa Diyos, ug Pagpahayag sa Publiko. Gihatagan usab niyag pagtagad ang nagkalainlaing mga librong tun-anan, lakip sa Nangatarongan Pinasukad sa Kasulatan. Sa pagtapos, gipahayag ni Igsoong Schroeder ang katumanan sa Isaias 45:23, nga nag-ingon nga ang relihiyosong mga magsusupak, sa ingon, nangluhod sa Diyos tungod kay mapugos sila sa pagdawat nga ang mga Saksi ni Jehova husto diha sa mga natad sa medisina, sa balaod, ug sa kronolohiya sa Bibliya.

“Sumundog kang Pablo” mao ang temang gipili sa sunod nga mamumulong si Karl Klein sa Nagamandong Lawas. Iyang gipakita kon giunsa ni apostol Pablo sa masubsob sa pag-aghat sa uban sa pagsundog kaniya. Iyang nahimo kini, tungod kay siya nagsunod man kang Kristo. (1 Corinto 11:1) Ang mga estudyante gitambagan sa pagsunod kang Pablo sa iyang kahibalo ug sa hanas nga paggamit sa Kasulatan, diha sa iyang maisogon ug madasigong pagwali, sa iyang pagkawalay-kahakog, sa iyang pagkamakasaranganon ug pagkamaubsanon, ug sa iyang mapailobong paglahutay.

Si Theodore Jaracz, membro usab sa Nagamandong Lawas, mao ang mihatag sa pakigpulong sa inagurasyon, “Usa ka Bag-ong Tunghaan—Alang sa Unsang Katuyoan?” Nagsugod siya pinaagi sa pag-ingon nga kadtong mibuluntaryo alang niining maong tunghaan misugot sa pag-alagad bisan asa sila gikinahanglan diha sa tibuok-kalibotang natad. Kapin sa tulo ug un-kuwarto ka milyong mga Saksi diha sa kapin sa 54,000 ka kongregasyon, dunay dakong panginahanglan alang sa kuwalipikadong mga lalaki aron sa pagbantay, pagtudlo, ug sa pagpanguna diha sa dakong buluhaton sa pag-ebanghelyo. Sa dugay na kanhi, si Jehova mitagna nga siya motaganag “mga gasa diha sa mga lalaki.” (Salmo 68:18) Iyang gihimo kini sa panahon sa mga apostol, sumala sa gipahayag ni apostol Pablo diha sa Efeso 4:8-11. Karon, nagatagana usab si Jehova ug ‘mga gasa diha sa mga lalaki’ ug sa pagbansay sa pipila kanila pinaagi niining bag-ong tunghaan.

Dugang miingon si Igsoong Jaracz nga ang tanang mga estudyante dunay kinaiyanhong mga katakos, ug kini mapalambo ni Kristo. Apan kana nagkinahanglan ug pagkugi, ug gipahayag sa mamumulong ang pasalig nga maningkamot ang 24 ka estudyante. Iyang gipasiugda nga walay pagtipas gikan sa matarong nga mga sukdanan ni Jehova ug miingon nga kadtong nagapanguna makatabang pinaagi sa ilang kaugalingong pananglitan ug impluwensiya. Diha sa daghang bahin sa kalibotan karon, dunay dakong panginahanglan alang sa kuwalipikadong mga lalaki sa pagdawat sa responsibilidad sa organisasyon. Lakip na niini bisan ang dagkong mga kongregasyon nga duna lamay usa kun duha ka ansiano ug pipila lamang ang ministeryal nga mga alagad. Busa matin-aw nganong ang Tunghaan sa Ministeryal nga Pagbansay kinahanglang tukoron—aron sa pagbansay sa dili-minyong mga ansiano ug mga ministeryal nga mga alagad aron sa pag-alagad bisan asa diha sa tibuok-kalibotang natad. Ingong resulta sa ilang pagbansay, labi pa silang nasangkapan sa pag-atiman sa pag-uswag ingong mga magbalantay.

Ang tanang mga Saksi ni Jehova makapasalamat sa Diyos sa pagpaposible sa Tunghaan sa Ministeryal nga Pagbansay. Sa pagtapos, si Igsoong Jaracz miingon: “Segurado ako nga kitang tanan nahiusa sa mga hunahuna ug sa mga pagbati alang kang Jehova sumala sa gipahayag diha sa Salmo 79:13: ‘Kami nga imong katawhan ug mga karnero sa imong sibsibanan, magahatag kanimo sa pasalamat sa walay kataposan; among igapasidungog ang imong mga pagdayeg sa tanang mga kaliwatan.’” Dayon, pinaagi sa awit ug pag-ampo, kining halandomon kaayo ug malipayong okasyon natapos.