Kagamhanan sa Kalibotan—Ang Hiniusang Kanasoran ba ang Tubag?
SA KATUIGANG dili pa dugay naangkon sa Hiniusang Kanasoran ang napasig-uling pagsalig ug pagdayeg sa kalibotan. Alang sa minilyon ang minubo nga “HK” nakapukaw ug bayanihong mga larawan: mga sundalo nga nagkalog asul maisogong misulong sa gubot nga mga dapit sa kalibotan sa pagpatunhay sa kalinaw, ang mga trabahante sa hinabang nagdalag pagkaon diha sa gigutom nga mga kagiw sa Aprika, ug ang dedikadong mga lalaki ug babaye sa walay kahakog nagtrabaho sa pagtukod ug usa ka bag-ong kalibotan nga kahikayan.
Sumala sa siyam-ka-bulan nga imbestigasyon nga gihimo sa The Washington Post, ingon sa gitaho diha sa International Herald Tribune, ang kamatuoran sa likod sa bayanihong larawan maoy “usa ka dako, dili makontrolar nga burokrasya, nga nailalom sa mga pag-abuso ug mga kakulangan nga nagdaot sa pagkaepektibo niini.” Ang pagtuon, nga gibase sa libolibong mga panid sa dokumento ug mga interbiyu uban sa bag-o ug sa nangaging opisyales sa HK, mibutyag sa mosunod nga hulagway.
Tabang sa Aprika: Ang HK nagbubo ug binilyong dolyares sa gikinahanglan kaayong tabang ngadto sa Aprika, usa ka kontinente nga gigusbat sa gubat, kagutom, kakabos, ug sakit. Daghan kaayong kinabuhi ang naluwas.
Bisan pa, libolibong kinabuhi ug milyon-milyong dolyares ang napildi tungod sa dili maayong pagdumala, pagpasagad, ug, usahay, korapsiyon. Ang HK nagpadala ug hinabang ngadto sa gihampak sa gutom nga Somalia, diin daghang tawo ang nangamatay adlaw-adlaw. Apan si Aryeh Neier, ehekutibong direktor sa Human Rights Watch, gikutlo sa Tribune nga nag-ingon: “Ang Hiniusang Kanasoran ug ang nagkalainlaing organisasyon niini mapinasagdanon kaayo ug walay-katakos nga sila halos walay nahimo sa paghupay sa kalisod sa Somalia.”
Gipasangil usab sa report nga ang ubang mga opisyal sa HK nalangkit sa pagpasimang sa hinabang nga pagkaon ngadto sa lain, pagdispalko sa pundo alang sa hinabang, pagpatunghag pagkaon ug mga butang pinaagi sa panikas, sa black-marketing, ug pagmaniobra sa balor sa salapi sa ubang nasod. Ang mga imbestigador sa HK nakakita ug mga ebidensiya sa maong panikas sa dili momenos pito ka nasod sa Aprika.
Pagpatunhay sa Kalinaw: Ang pagpatunhay sa kalinaw mao ang pangunang tumong sa HK, bisan pa sa katuigan sukad nga gitukod kini niadtong 1945, dihay kapin sa usa ka gatos ka dagkong mga gubat, ug 20 ka milyong tawo ang nangamatay sa gubat. Apan, sukad sa 1987 gisugdan sa HK ang 13 ka kampanya sa pagpatunhay sa kalinaw, nga sama ka daghan sa tibuok kasaysayan niini una pa niana.
Bisan kon ang uban tingali mangatarongan nga ang bili niini nga mga kampanya mas maayo pa kay sa makalilisang nga kabayaran sa gubat, daghan ang nagreklamo nga ang kahimtang misobra na. Pananglitan, ang mga kampaniya sa pagpatunhay sa kalinaw midangat ug daghang dekada, nga gigastohan ug ginatos ka milyong dolyares samtang ang mga negosasyon dili gihapon malamposon. Ang misyon sa HK sa pagpatunhay sa kalinaw sa Cambodia migahin ug kapin sa $1 ka milyon alang sa mga TV ug VCR sa mga sundalo ug laing $600,000 alang sa mga magasin ug mga suskrisyon sa mantalaan.
Kausaban: Adunay kaylap nga singgit alang sa kausaban sulod sa HK, apan ang mga opinyon nagkalainlain sumala sa kon unsay usbon. Ang pobreng kanasoran nagpangayo ug mas dakong tingog diha sa paagi sa paghimog desisyon ug buot magpadako sa mga programa sa ekonomiya ug sa pangatilingban. Buot sa industriyalisadong mga nasod nga kunhoran kining mga programaha ug taposon ang korapsiyon, dili-maayong pagdumala, ug pag-usik-usik.
Miingon ang senyor nga opisyal sa HK: “Aron adunay tinuod nga kausaban, kinahanglang buhaton mo ang usa ka butang nga imposibleng buhaton diha sa burokrasya: Kinahanglang hinloan nimo ang dapit. Aron mahimo ang usa ka butang nga makahuloganon, kinahanglang kagison mo ang 45 ka tuig nga mitapot nga sisi, ug daghan kaayo kana nga sisi.”
Bisan kon ang mga Kristohanon nakakita sa panginahanglan ug usa ka organisasyon aron sa pagdumala sa kalihokan sa katawhan, sila wala magtuo nga ang Hiniusang Kanasoran mao ang tubag. Hinunoa, sila naglantaw sa Gingharian sa Diyos, ang kagamhanan nga gisugo ni Jesus sa iyang mga sumusunod nga maoy iampo.—Mateo 6:10.