Mga Batan-on Nangutana . . .

Sa Unsang Paagi Makabulag Ako Gikan sa Dobleng Kinabuhi?

“Nagpakabungol ako sa tanang gisulti sa akong mga ginikanan,” miangkon si Ann.a “Ako rebelyoso ug misugod sa pagpamakak kanila. Sultihan ko sila nga namalit ako, apan sa tinuod ako nakigkita sa usa ka lalaki.”

SI Ann nagkinabuhi ug dobleng kinabuhi, ug sa wala madugay gisalikway niya dili lamang ang iyang mga ginikanan kondili usab ang iyang nabansay-sa-Bibliya nga konsensiya. Si Ann, abi god nimo, sekretong nakigsekso sa iyang trato. Siya nahinumdom: “Gisulayan nako pagpala si Jehova sa akong hunahuna sa bug-os.” Bisan pa niana, sa wala magdugay napugos siya sa pag-atubang niining makasubong kamatuoran nga ‘bisan unsay igapugas sa mga tawo, kini usab ang ilang pagaanihon.’ (Galacia 6:7) Si Ann namabdos. “Gihigugma ko ang akong anak sa tibuok kong kasingkasing,” matud niya, “apan dili unta angay maeksperyensiyahan kini sa usa. Minyo. Wala mag-inusara.”

Ikaw ba sa usa ka paagi nalit-agan sa dobleng kinabuhi​—nga gitago ang imong tinuod nga pagkatawo gikan sa imong mga ginikanan ug sa kaubang mga Kristohanon? Tingali ikaw nakighugoyhugoy lang uban sa pipila ka higala sa eskuylahan diin ikaw nahibalo nga wala maangayi sa imong mga ginikanan. O tingali ikaw nahulog sa mas seryosong kasaypanan, sama sa pagtabako, pag-abuso sa alkohol, o pakigsekso sa dili pa kasal. Sa bisan hain niini, sama kang Ann, panahon lang ang giagad sa dili pa motungha ang seryosong mga sangpotanan.b

Bisan pa niana, dili tugotan sa pila ka batan-on kining kamatuorana nga mopugong gayod kanila gikan sa ilang rebelyosong dalan. Sila sama sa tawo nga nagasud-ong sa iyang kaugalingon diha sa salamin ug “dihadiha makalimot kon unsang matanga siya nga tawo.” (Santiago 1:23, 24) Gilaoman namo nga lahi ka nga pagkatawo. Tingalig mihimo ka na ug pagsusi sa imong kaugalingon​—ug wala makauyon sa imong nakita. Buot kang magbag-o. Nakita nimo ang panginahanglan sa pagbag-o. Ang pangutana mao, unsaon nimo pagbag-o?

Paghinulsol​—Ang Unang Lakang

Una, kinahanglang himoon mo ang tinuyo nga desisyon nga magbag-o. Ang Buhat 3:19 nag-agda: “Busa, paghinulsol kamo, ug magbag-o aron mapala ang inyong mga sala, aron ang mga panahon sa kahayahay moabot gikan sa persona ni Jehova.” Ang paghinulsol, hinunoa, maoy labaw pa sa buhat sa salabotan. Ang paghinulsol nagkahulogang “pagbatig pagbasol, paghinulsol, o kasubo, tungod sa nabuhat sa usa.” Ang magsusulat sa Bibliya nga si Santiago mitambag: “Panagkaguol kamo ug pagbangotan ug panghilak. Ang inyong katawa himoa nga pagbangotan, ug ang inyong kalipay himoa nga kaminghoy. Ipaubos ang inyong kaugalingon sa mga mata ni Jehova.” (Santiago 4:9, 10) Unsaon nimo sa pagbati ug kaguol sa usa ka butang nga imong gikalipayan hangtod karon? Hunahunaa kon unsa ka dakong sayop kana. Hunahunaa ang gipahinabo nga kasakit niana sa Diyos. Hunahunaa ang mga suliran nga ihatag kanimo sa imong gitagong dalan ug sa mga bakak nga imong gisulti aron matago kana. Pahinumdomi ang imong kaugalingon nga ang Diyos nagadumot sa batasan sa panglimbong! (Salmo 5:6) Ang pagpamalandong niini nga mga kamatuoran makatabang kanimo sa pagsalikway sa daotang buhat sa hunahuna ug sa emosyon.

Hinuon, ang pagbasol lamang sa imong ginahimo dili pa igo. Usa ka batan-on nga ginganlag Robert, kinsa nalangkit sa sekretong buhat sa pag-abuso sa droga, miangkon: “Miserable kaayo ako. Nahibalo ako sa matarong gikan sa sayop. Sa gihapon, ako nagpadayon sa pagkinabuhi sa dobleng kinabuhi.” Busa ang maisogong lihok gikinahanglan! Sa 2 Cronicas 7:14, ang Diyos nag-ingon nga kon ang mga makasasala “magpaubos sa kaugalingon ug mag-ampo ug mangita sa [iyang] nawong ug motalikod gikan sa ilang daotang mga dalan, nan [siya mismo] magapatalinghog gikan sa mga langit ug mopasaylo sa ilang sala.”

‘Ang pagpangita sa nawong sa Diyos’ nagkahulogan sa pagduol kaniya diha sa pag-ampo, pagsugid sa imong sayop, ug pagpangayog pasaylo. Kini hayan dili sayon nga buhaton, apan ikaw sa walay duhaduha mobatig dakong kahupayan kay nakabuhat sa ingon. Matud sa salmista: “Sa nagpakahilom ako nagkaut-ot ang akong mga bukog tungod sa akong pag-agulo sa tibuok adlaw. Kay sa adlaw ug sa gabii ang imong kamot mabug-at ibabaw kanako. . . . Ang akong sala gisugid ko sa kataposan kanimo, ug wala nako tagoi ang akong kasal-anan.”​—Salmo 32:3-5.

Pagsulti sa Imong mga Ginikanan

Kinahanglang adunay usa nga masayod bahin sa imong mga problema. Apan kinsa? Miangkon ang usa ka tin-edyer nga ginganlag si Brian: “Usa sa akong labing dakong sayop mao ang pagpakigsulti sa akong mga problema ngadto sa akong mga higala kunohay imbes ngadto sa akong Kristohanong inahan. Apan nahadlok ako sa pagpakigsulti kaniya tungod sa gihunahuna ko nga iyang reaksiyon, busa midangop ako sa akong mga higala, nga dugang nagpalayo lang kanako gikan sa kamatuoran.” Ayaw himoa ang samang sayop. Itugyan ang imong kasingkasing ngadto sa imong diyosnong mga ginikanan. (Itandi ang Proverbio 23:26.) Sila may katungod nga masayod kon unsay imong ginabuhat. Ang kapitulo 2 sa librong Mga Pangutanang Gisukna sa mga Batan-on​—Mga Tubag nga Mosaler adunay daghang sugyot bahin sa kon unsaon sa pagduol sa imong mga ginikanan niining bahina.c

Siyempre, ayaw pagdahom nga sila malipay sa imong pagpamakak kanila. Apan ang mga ginikanan kanunayng may kusganong pagmahal sa ilang mga anak. Ang magsusulat nga si Clayton Barbeau miingon: “Dili ka nila isalikway tungod kay ikaw nakasala o nalangkit sa usa ka matang sa kasamok. Ang mga batan-on napamabdosan, natakdan sa sakit nga mapasa sa sekso, nagkaproblema tungod sa pag-abuso sa alkohol o droga o nalangkit sa ubang suliran ug nagtuo nga ang ilang mga ginikanan mosanong sa kalisang ug kasuko, dinamitahon ang balay, ug mobiya sa nasod. Apan sa dihang gisultihan nila ang ilang mga ginikanan, nakita nila nga gihalog o giagbayan sila sa ilang mga ginikanan, ug gisultihan, ‘Aw, may problema ka gayod, ug tan-awon nato kon unsay atong mahimo bahin niana.’” Oo, sa dihang mawala ang unang kakurat ug kasuko, ang kadaghanang ginikanan maningkamot nga mahimong mapaluyohon. Ilabina gayod kon ang imong mga ginikanan mahadlokon sa Diyos! Ang ilang dakong kabalaka angay nga, dili ang pagpakaulaw o pagpasakit kanimo, kondili ang pagtul-id sa mga butang. (Itandi ang Isaias 1:18.) Niining bahina basin maghikay usab sila aron ikaw makigsulti sa mga ansiano sa kongregasyon.​—Santiago 5:14, 15.

Tinuod, aduna unyay pila ka takos nga silot gikan sa imong mga ginikanan nga pagaantoson ug tingali pila ka mas higpit nga mga pagdili. Apan kini sa pagkatinuod makatabang kanimo aron malikayan ang pagkahulog pag-usab ngadto sa imong daang mga paagi. Gawas pa, ang pagpakigsulti sa mga butang uban sa imong mga ginikanan ug sa pagkakita sa ilang mahigugmaong kabalaka hayan mag-usab sa imong pagsabot bahin kanila. Hangtod karon, lagmit nasuko ka pa sa ilang mga balaod ug mga pagdili. Miadmiter ang usa ka dalagita nga ginganlag Paulette: “Lisod dawaton ang tambag ug mga giya nga gihatag kanato sa atong mga ginikanan. Apan ako nakaamgo nga kini maoy alang sa atong kaugalingong kaayohan ug sa malungtarong kalipay.”

Magbag-o sa Imong mga Panag-uban

Talagsa ra nga ang usa ka batan-on magpadayon sa dobleng kinabuhi sa iyang kaugalingon. Hayan daghan sa imong isigkaingon ang miduyog sa pag-aghat kanimo sa imong pag-alsa! Aron malikayan nga mahibalik sa imong sekretong kinabuhi, kinahanglang magbag-o ka ug imong mga kaubanan. Miingon ang salmista: “Wala ako molingkod uban sa mga tawo sa kabakakan; ug wala ako makig-uban niadtong nagatago sa ilang pagkatawo.” (Salmo 26:4) Ang pakigbulag sa daang mga higala dili sayon. Sama sa salmista gikinahanglan mo nga mag-ampo: “Gikan sa tawong limbongan ug daotan hinaot hatagan mo ako ug kaikyasan.” (Salmo 43:1) Lihok nga uyon niining pag-ampoa pinaagi sa pagpakigsulti sa imong daang mga kauban nga ikaw nagbag-o na ug determinado sa pagbuhat sa matarong. Inay nga usa ka sekretong tinun-an ni Jesus, ipadayag sa uban ang imong pagtuo. (Itandi ang Juan 19:38.) Kasagaran, ang daotang mga kauban mangita dayon ug ubang mga kauban.

Sunod, kinahanglang pulihan nimo ang daotang mga panagkauban sa maayong mga higala. Diyutay ra ba ang mga batan-on nga mahadlokon sa Diyos? Nan hunahunaa ang manalagnang Jeremias, kinsa miingon: “Ako wala molingkod diha sa katigoman sa mga nanagtiawtiaw ug misugod sa pagkalipay. Tungod sa imong kamot ako naglingkod nga nag-inusara.” (Jeremias 15:17) Labi pang maayo nga mag-inusara ka kay sa makig-uban sa mga batan-on nga magpaluya kanimo sa espirituwal. Apan, kasagaran, ang matuod nga mga higala makaplagan kon ikaw maningkamot gayod. Si Tammy, pananglitan, misugod sa pagpakig-uban sa iyang ig-agaw kinsa usa ka bug-os panahong magwawali. “Kami nahimong suod kaayo,” nahinumdom si Tammy. “Sa mga adlaw nga ako walay klase, ako mouban kaniya sa buluhatong pagsangyaw. Kini nakatabang kanako sa paghimog mga kausaban sa akong kinabuhi.”

Apan “ang labing maayong panalipod,” matud sa usa ka batan-ong Aleman, “mao ang maayong konsensiya, nga resulta tungod sa suod nga relasyon uban kang Jehova nga Diyos.” Usa ka dalagita nga nahulog sa pagkinabuhi sa dobleng kinabuhi miangkon: “Wala ko gayod maugmad ang suod nga relasyon uban sa akong Amahan, si Jehova.” Pinaagi sa pag-ampo ug personal nga pagtuon, siya misugod sa pag-usab sa mga butang. “Karon may relasyon na ako uban kang Jehova nga walay usa ang makaagaw,” siya mapasigarbohong miingon. Imong matagamtam usab ang maong suod nga relasyon uban sa Diyos. Siya mogiya ug mopaluyo kanimo, bisan kon nalisdan ka sa pag-usab sa imong daang mga panggawi. Ang Salmo 37:24 miingon bahin sa usa ka matinumanong alagad sa Diyos: “Bisan siya madagma, dili siya matumba, kay si Jehova magasapnay sa iyang kamot.” Oo, uban sa tabang ni Jehova, ikaw makabulag gikan sa pagkinabuhi sa dobleng kinabuhi.

[Mga footnote]

[Blurb sa panid 19]

“Gisulayan nako pagpala si Jehova sa akong hunahuna sa bug-os”

[Blurb sa panid 19]

Kinahanglang himoon mo ang tinuyo nga desisyon nga magbag-o

[Hulagway sa panid 20]

Ipatin-aw sa imong daang mga higala nga ikaw nagbag-o na ug dili na moduyog kanila sa daotang buhat