Gikan sa Among mga Magbabasa
Paghiusa sa mga Rasa Ang seryal nga “Magkahiusa ba Gayod ang Tanang Rasa?” (Agosto 22, 1993) nakatabang kanako sa pagkakita kon sa unsang paagi nagsugod ang rasismo ug kon sa unsang paagi gipasa kini gikan sa usa ka kaliwatan ngadto sa lain. Kini nakatabang usab kanako sa pagsabot kon nganong dili tanang Kristohanon nakabuntog sa tanan nilang mga pagpihig. Sa miagi nakaplagan ko kini nga makapahigawad kaayo. Apan karon nasabtan ko nga nagkinahanglan ug panahon ang pagkuha gikan sa kaugalingon sa maong daotang mga kiling. Ako nagpaabot sa matarong nga bag-ong kalibotan sa Diyos diin ang rasa dili na mahimong usa ka isyu.
C. W., Tinipong Bansa
Paghimog mga Kard Salamat sa artikulong “Magpadala Tag Kard.” (Agosto 8, 1993) Daghan nang katuigan nga tighimog kard ang akong lola ug gipadalhan niya kaming tanang mga apo. Ako 13 anyos ug nakahimo nag kaugalingong mga kard duolan nag duha ka tuig. Ang paggamit ug lab-as gipalup-itan nga mga bulak, ingon sa gisugyot sa inyong artikulo, misaler gayod. Akong nakita nga kon imong butangag diyutayng papilit ang ibabaw sa mga bulak ug unya baliboran kana ug sinawsinaw sa ibabaw, mohatag kana ug maanindot kaayong resulta.
J. B., Tinipong Bansa
Mga Depekto Pipila lamang ka artikulo bahin sa mga depekto ang ingon ka realistiko sa artikulong “Mga Batan-on Nangutana . . . Sa Unsang Paagi Masagubang Ko ang Akong Depekto?” (Hunyo 8, 1993) Human nga nakaalagad ug pipila ka tuig ingong usa ka ministro sa sangang buhatan sa mga Saksi ni Jehova sa Roma, Italya, ako nalangkit sa grabeng aksidente sa kotse nga nakadaot sa akong taludtod. Ang yanong mga lihok sama sa paglakaw ug pagkupot ug usa ka basong tubig sa kalit nahimong lisod. Sa kalit ako nanginahanglag tawo sa pagtabang kanako nga makabangon, sa pagbisti, pagsaka sa hagdanan, ug uban pa. Human sa hataas nga panahon sa kasuko, kaguol, pagkaluoy-sa-kaugalingon, ug hilom nga mga paghilak, sa kataposan nadawat nako ang situwasyon ug nakaamgo nga angay kong buhaton ang kutob sa akong mahimo ubos niining mga kahimtanga. Uban sa pagpaluyo sa dedikadong pisikal nga therapist, mga ginikanan, ug mga higala, miarang-arang ang akong kahimtang, ug ako nagpadayon sa pag-alagad sa Sanga. Tuohi ako, bisan pa sa mga depekto, ang usa mahimo gihapong aktibo kaayo ug mapuslanon!
A. E., Italya
Pangolektag Bato Ingong usa ka doktor, gibasa nako nga may dakong kaikag ang inyong artikulong “Talagsaong Matang sa Pagpangitag Bahandi.” (Hulyo 8, 1993) Apan, akong namatikdan nga sa dihang gihisgotan ninyo ang bahin sa paggamit ug maso, wala ninyo hisgoti ang pagsul-ob ug proteksiyon sa mga mata. Importante kaayo kini, sanglit ang gagmayng mga tipik sa bato dali nga mapungilan sa maso, ug kini peligroso kaayo sa mga mata.
G. T. W., Inglaterra
Among giapresyar kining makatabang nga pahimangno sa kahilwasan.—ED.
Igsisimhot Nalingaw gayod ako sa artikulong “Ang Atong Mapuslanong Igsisimhot.” (Hulyo 22, 1993) Tulo ka tuig nga milabay may gisulat ako bahin sa maong ulohan sa siyensiya sa eskuylahan. Daghang tawo ang wala gayod makaamgo kon unsa ka hinungdanon ang sistema sa igsisimhot. Salamat sa pagpakita sa daghan kaayong tawo kon unsa ka kahibulongan gayod ang igsisimhot.
L. T., Tinipong Bansa
Sugilanon sa Hayop Ako 20-anyos nga Zulu nga gusto kaayong makakat-on bahin sa mga kahibudnganan sa kalalangan. Giapresyar ko pag-ayo ang inyong artikulong “Ang Walay-Saba nga Mangdadagit.” (Marso 8, 1993) Taliwala sa mga Zulu, ang mga ngiwngiw giisip nga mga langgam nga daotan ug tilimad-on ug nga gituohan nga may koneksiyon sa pagpamalbal. Kon makakita ang mga tawo ug ngiwngiw, abogon nila kini. Ang inyong yano ug matulon-anong artikulo sa ingon giapresyar.
Z. P. M., Habagatang Aprika
Salamat sa artikulong “Nagaluksong mga Musikero sa Kalibotan sa Insekto.” (Abril 8, 1993) Ang mga alisiwsiw sagad giisip nga hampak. Apan ang artikulo nakapukaw sa akong kaluoy niining mga insektoha—ug nagpauswag usab sa akong pagtahod sa atong kutihan ug maalamong Maglalalang.
V. P., Brazil