Gikan sa Among mga Magbabasa
Mga Tigulang Kinahanglan ko kamong pasalamatan tungod sa Agosto 8, 1993, nga artikulo sa Pagmata! nga “Pagtigulang Uban sa Pagsabot.” Ang artikulo nakapahilak kanako. Abi ninyo, ang akong mama duolan na sa 90 anyos. Di pa dugay mihukom siyang mogawas nga nag-inusara, bisan tuod dili unta siya angayng mobuhat niana, ug natumba ug napiang ang bukton. Maayo na siya apan dili mahimong biyaan nga mag-inusara. Wala na ako makatambong sa pipila ka Kristohanong mga tigom, ug usahay akong gibati nga akong gipahigawad si Jehova. Apan gipaluyohan ninyo ako pag-ayo. Sa dihang ako maguol, hunahunaon ko kining artikuloha.
B. T., Tinipong Bansa
Pagpasaylo Bag-o pa nakong nahuman pagbasa ang artikulong “Ang Hunahuna sa Bibliya . . . Unsa ka Bug-os ang Pagpasaylo sa Diyos?” (Disyembre 8, 1993) Mao gayod kini ang akong gikinahanglan. Kining artikuloha nakatabang kanako sa pagkasabot nga ang Diyos nagkuha sa mga sala, wala na kini sila, napapas, nabanlas. Samtang nagsulat ako niining sulata, gibati ko ang tinuod nga kalinaw sa hunahuna.
J. W., Tinipong Bansa
Makapahupay ang pagkahibalo nga si Jehova nakakita sa kasingkasing ug nga siya andam sa pagpapas sa atong mga sala. Kaniadto mibati akong dili gayod takos sa kapasayloan ni Jehova maong ako naguol. Naghunahuna gani ako sa paghikog. Ang suod nga mga higala sa kongregasyon nagtabang kanako. Apan nagkinahanglan gihapon ako ug pasalig, ug kining artikuloha nakatabang kanako.
K. H., Tinipong Bansa
Antiyohos Daghan kaayong salamat sa artikulong “Usa ka Pagtan-aw sa mga Antiyohos.” (Hulyo 8, 1993) Nasayod ako nga may suliran ako sa akong mga mata ug nga kinahanglang moduaw ako sa espesyalista sa mata, apan kanunay nakong gioktaba kana. Human mabasa ang inyong artikulo, nakigsabot ako sa doktor. Nalipay akong gihimo kana. Alang kanako kining artikuloha miabot sa tukmang panahon.
J. W., Inglaterra
Matinumanong Amahan ug Anak Lalaki Nabasa nako ang estoryang “Ang Matinumanong Panig-ingnan sa Akong Amahan” nga walay hunong. (Disyembre 22, 1993) Kining artikuloha nakadasig kanako sa paghimog dugang pa diha sa pag-alagad sa Diyos. Ang hugot nga determinasyon sa mga Davey (amahan ug anak), sa pag-alagad kang Jehova hangtod sa kamatayon, nakapabuhi sa determinasyon nga akong nabatonan sa dihang nabawtismohan ako duha ka tuig kanhi sa edad nga 18. Nanghinaot ako nga ang mga artikulong sama niini makatandog sa mga kasingkasing sa daghang ubang mga batan-on sa tibuok kalibotan.
C. M., Italya
Mga Alibangbang Buot kong pahimuslan kining higayona sa pagpasalamat kaninyo sa artikulong “Usa ka Adlaw sa Kinabuhi sa Usa ka Alibangbang.” (Oktubre 8, 1993) Ang akong asawa ug ako naglingawlingaw sa Zion National Park niadtong miaging bulan. Duyog kaming nagbasa niining artikuloha sa dihang usa ka alibangbang kalit nga mitugdong sa yuta ug mibukhad sa iyang mga pako. Wala gayod kami mahibalo kaniadto kon nganong gibuhat nila kana! Ang artikulo nakatabang gayod kanamo sa pagpabili sa mga kahibulongan sa linalang ni Jehova.
C. B., Tinipong Bansa
Sapoton nga mga Ginikanan Giapresyar nako ang artikulong “Mga Batan-on Nangutana . . . Nganong Sapoton Kaayo ang Akong mga Ginikanan?” (Nobyembre 8, 1993) Ang akong inahan karong bag-o sapoton. Ang artikulo nakatabang gayod kanako sa pagsabot nga ang mga suliran sa salapi, duyog sa ubang mga responsabilidad, maoy dagkong mga hinungdan sa iyang kasapoton. Karon labi pa akong motabang kon akong maarangan ug mohalog kaniya ug tug-anan siya nga ako siyang gimahal.
T. B., Tinipong Bansa
Kami mga ginikanan sa duha ka lalaki, mga edad 7 ug 12. Daghan sa mga isyu nga inyong gibangon niining artikuloha mitungha sa among panimalay di pa dugay, ug kami naningkamot—nga wala molampos—sa pagsaysay sa mga butang ngadto sa among mga anak lalaki. Kining artikuloha mao gayoy tubag sa among mga pag-ampo. Nakatabang na kini sa among kahimtang.
R. P. ug A. P., Tinipong Bansa