Pagtabang Niadtong Adunay AIDS

“KAY Natakdan sa AIDS, Klerigo Gisirhan sa mga Pultahan” mao ang ulohan sa usa ka artikulo sa The New York Times. Ang mantalaan nag-asoy sa sugilanon sa usa ka klerigo sa Baptist kansang asawa ug duha ka anak natakboyan sa kagaw sa AIDS gumikan sa dugo nga giabuno diha sa iyang asawa niadtong 1982 (ang mga bata natakdan diha sa iyang tagoangkan). Unya, siya ug ang iyang pamilya gidid-an sa pagtambong sa nagkalainlaing mga simbahan sa Baptist tungod sa sakit. Nalugda, mihunong siya sa pagtambong ug miundang sa pagkaklerigo sa Baptist.

Ang kahigawad niining tawhana sa kapakyasan sa iyang iglesya nakapatugbaw ug daghang pangutana: Ang Diyos ba may kahangawa sa mga masakiton, lakip niadtong adunay AIDS? Sa unsang paagi sila matabangan? Unsang mga panagana ang kinahanglang himoon sa dihang magtaganag Kristohanong paghupay alang niadtong adunay AIDS?

Ang Gugma sa Diyos Alang sa mga Sinakit

Ang Bibliya nagpakita nga ang Labing Gamhanang Diyos nagpahayag ug lalom nga empatiya alang niadtong nag-antos. Sa dinhi pa sa yuta, si Jesus nagpakita usab ug kaluoy sa mga masakiton. Ug ang Diyos naghatag kaniyag gahom sa pag-ayo sa mga tawo sa tanan nilang mga sakit, sumala sa giasoy sa Bibliya: “Dakong mga panon sa katawhan ang nanuol kaniya, nga may uban kanilang mga tawong bakol, pungkol, buta, amang, ug daghang uban pa, ug gipamutang nila sila sa iyang tiilan, ug iyang giayo sila.”​—Mateo 15:30.

Siyempre, karong adlawa ang Diyos wala maghatag kang bisan kinsa dinhi sa yuta ug gahom sa pag-ayo sa mga tawo sa milagrosong paagi sama sa gihimo ni Jesus. Apan ang tagna sa Bibliya nagpakita nga sa dili madugay, sa bag-ong kalibotan sa Diyos, “wala nay molupyo nga magaingon: ‘May sakit ako.’” (Isaias 33:24) Ang Bibliya nagsaad: “[Ang Diyos] magapahid sa matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa.” (Pinadayag 21:4) Sa iyang dakong gugma alang sa mga tawo, ang Diyos nag-andam ug usa ka permanenteng tambal sa tanang sakit, lakip ang AIDS.

Ang Salmo 22:24 nag-ingon bahin sa Diyos: “Wala niya tamaya ni pagdumti ang kagul-anan sa sinakit; ug wala niya itago ang iyang nawong gikan kaniya, ug sa diha nga siya nagtuaw ngadto kaniya alang sa tabang siya nagpatalinghog.” Ang gugma sa Diyos mabatonan niadtong kinsa sinserong mangayo kaniyag tabang.

Kinsay Matakdan sa Kagaw sa AIDS?

Ang AIDS sa panguna maoy usa ka sakit sa estilo sa kinabuhi. Daghang natakdang tawo mouyon sa maghanduraw sa Salmo 107:17, nga nag-ingon: “Kadtong mga buang, tungod sa ilang kalapasan ug tungod sa ilang kasal-anan, sa kataposan mohatag ug kasakit sa ilang kaugalingon.”

Sa dihang talikdan sa usa ka tawo ang mga sukdanan sa Bibliya ug makigsekso sa gawas sa kahikayan sa Diyos sa kaminyoon, ang risgo nga matakdan sa AIDS o makatakod sa uban mahimong tinuod kaayo. Lain pa, kon ang mga tawo maghulamay ug mga dagom aron sa pag-indiyeksiyon ug mga droga subay sa ugat, sila mahimong maimpeksiyon sa AIDS ug mahimong makapasa sa kagaw ngadto sa uban. Dugang pa, daghan ang natakboyan sa AIDS pinaagi sa mga pag-abuno sa dugo gikan sa naimpeksiyon nga mga tighatag ug dugo.

Hinuon, ikasubo ang makapakurat nga gidaghanon sa walay-sala nga mga tawo nga naimpeksiyon sa kagaw sa AIDS, ug sa daghang paagi. Pananglitan, daghang maunongong mga kapikas sa kaminyoon, bisan dili nila sala, natakdan sa AIDS pinaagi sa pagpakigsekso sa ilang naimpeksiyon nga kapikas sa kaminyoon. Unya usab, ilabina sa pipila ka dapit, ang makapabalaka nga porsintahe sa mga masuso ang nakakuha sa kagaw sa AIDS gikan sa naimpeksiyon nga mga inahan, nga naghimo sa bag-ong natawong bata nga may AIDS nga usa sa labing makapaguol sa mga biktima. Lain pa, ang medikal nga mga kawani ug ang uban pa nakakuha sa sakit tungod sa mga aksidente sa dihang nagsusi silag nahugawang dugo.

Sa bisan unsang paagi nga nakuha sa usa ka tawo ang AIDS, tin-aw ang Kasulatan nga ang Diyos dili mao ang responsable sa pagpasa niining makamatayng sakit. Bisan tuod karong adlawa ang kadaghanan niadtong natakboyan sa AIDS sa personal maoy responsable sa pagkatakod nila ug nakatakod sa uban pinaagi sa kagawian nga dili-uyon sa mga sukdanan sa Bibliya, ang mga porsintahe nagakausab, nga nagpakita ug mas dakong gidaghanon sa inosenteng mga biktima, sama sa mga masuso ug maunongong mga kapikas.

Ang World Health Organization nag-ingon nga ang mga babaye sa tibuok kalibotan sa pagkakaron natakdan sa kagaw sa AIDS nga halos sama ka subsob sa mga lalaki ug nga sa tuig 2000, ang kadaghanan sa bag-ong mga impeksiyon maoy sa babaye. Ang mga kawani sa panglawas sa Aprika nag-ingon nga 80 porsiento sa mga kaso sa AIDS didto “ginapasa pinaagi sa heteroseksuwal nga pakigsekso, ug halos ang tanang uban pa ginapasa gikan sa inahan ngadto sa anak panahon sa pagsabak o sa pagpanganak.”

Hinuon, bisan pag ang Diyos supak sa bisan unsang paglapas sa iyang kasugoan, lakip ang mga paglapas nga moresulta sa maong pag-antos, siya daling mopaabot sa iyang maluluy-ong kamot ngadto sa tanang naapektahan. Bisan kadtong natakdan sa AIDS tungod sa sayop nga mga buhat makabaton ug kaayohan sa kaluoy sa Diyos pinaagi sa paghinulsol ug sa paghunong sa pagbuhat ug daotan.​—Isaias 1:18; 1 Corinto 6:9-11.

Kon Unsay Nahibaloan sa Pagkakaron

Ang AIDS maoy tibuok-kalibotang suliran sa panglawas. Bisan pag ang mga siyentipiko magpasalig sa mga tawo nga “ang HIV dili daling mapasa nga kagaw,” dili kaayo makapahupay kini alang sa minilyon kinsa aduna na niana ug sa dili-maihap nga minilyon nga makakuha niana sa umaabot nga mga tuig. Ang mga kamatuoran nagpakita nga kana nagakaylap sa tibuok yuta.

Sa pagsumaryo sa kasagarang mga paagi sa pagpasa, ang usa ka publikasyon nag-ingon: “Halos ang tanang HIV nga mga impeksiyon mapasa pinaagi sa seksuwal nga kontak o pinaagi sa pagkaladlad sa naimpeksiyon nga dugo.” Sa pagpalandong sa mga konklusyon sa kadaghanan diha sa medikal nga propesyon, ang usa ka taho nag-ingon: “Aron mahitabo ang usa ka impeksiyon, kinahanglan adunay pagsuhop sa pluwido sa lawas (hapit sa tanang panahon sa dugo o binhi sa lalaki) gikan sa naimpeksiyon nga tawo ngadto sa wala maimpeksiyon nga lawas sa usa ka tawo.”

Hinuon, ang mga pulong nga “halos ang tanan” ug ang “hapit sa tanang panahon” nagdawat sa posibilidad sa mga eksepsiyon. Busa bisan pag ang kadaghanan sa mga mekanismo sa pagpasa sa AIDS nailhan karong adlawa niadtong anaa sa medikal nga natad, sa diyutay kaayong porsintahe sa mga kaso, ang mekanismo sa pagtapot sa kagaw tingali wala pa mahibaloi. Busa, aduna gihapoy panginahanglan sa pagbantay.

Unsaon Nimo Pagsanong?

Mga 12 ka milyon ngadto sa 14 ka milyong tawo sa tibuok kalibotan ang naimpeksiyon sa kagaw sa AIDS. Ug ang mga banabana mao nga daghang minilyon pa ang maimpeksiyon sa tuig 2000. Busa, lagmit ikaw, o tingali sa dili madugay, makauban niadtong aduna niining sakita. Pananglitan, sa bisan unsang dakong siyudad, ang ordinaryong pakigkontak sa maong mga tawo mahitabo matag adlaw diha sa mga trabahoan, sa mga restawran, mga sinehan, mga dulaanan, mga bus, mga subwey, mga ayroplano, ug mga tren, maingon man sa ubang publikong pakigkontak.

Busa, sa dugang, ang mga Kristohanon mahimong makahibalag, ug matukmod sa pagtabang, sa mga nag-antos sa AIDS kinsa buot motuon sa Bibliya, motambong sa Kristohanong mga tigom, ug mouswag ngadto sa pagpahinungod sa Diyos. Sa unsang paagi ang mga Kristohanon mosanong niini nga mga panginahanglan sa mga biktima sa AIDS? Aduna bay mga panagana nga praktikal alang sa kaayohan sa nag-antos ug alang niadtong anaa sa Kristohanong kongregasyon?

Pinasikad sa bag-ong mga hunahuna, ang ordinaryong kontak dili magpasa sa AIDS. Busa daw makataronganon nga ang usa dili kinahanglang sobrang mahadlokon nga makauban ang mga tawo nga adunay AIDS. Ug sanglit ang mga nag-antos sa AIDS luya kaayo ug sistema sa imyunidad, kita kinahanglan mag-amping nga sila dili mataptan sa komon nga mga impeksiyon sa kagaw nga basin anaa kanato. Ang kadaot ngadto sa ilang lawas gikan sa maong komon nga mga sakit tingalig dako.

Tungod sa makahulga-sa-kinabuhi nga kinaiya sa AIDS, maalamon ang pagbutang sa hunahuna sa pila ka makataronganong mga panagana kon mag-abiabi sa usa nga nag-antos ug AIDS nganha sa atong personal nga asosasyon o kanang sa Kristohanong kongregasyon. Una, bisan walay himoong publikong pagpahibalo, mahimo natong pahibaloon ang usa sa mga ansiano sa kongregasyon bahin sa kahimtang aron nga siya maandam sa paghatag ug maluluton ug angayng pagtubag kang bisan kinsa nga mangutana bahin sa maong butang.

Sanglit ang kagaw mapasa pinaagi sa dugo sa tawong naimpeksiyon, tingali makataronganon sa mga kongregasyon sa pagbansay sa kon unsay gitawag nga unibersal nga panagana sa dihang maglimpiyo sa mga kasilyas ug sa mga inawas, ilabina kon ang dugo nalangkit diha sa pag-awas. “Ang unibersal nga panagana” maoy terminong gigamit sa medikal nga propesyon aron sa pagbatbat sa hugpong sa mga balaod diin ang tanang dugo gikan sa kang bisan kinsang tawo giisip nga nahugawan ug lagmit nga peligroso ug busa dumalahon sa linaing paagi. Sanglit ang Kingdom Hall maoy publikong pasilidad, hayan maalamong mabatonan kanunay ang mga gamit sa paglimpiyo nga adunay kahon sa Latex o vinyl nga mga guwantes aron makataganag hustong pag-atiman ug paghinlo kon adunay usa ka aksidente. Ang 10 porsientong solusyon sa igpaputi (Clorox) kasagaran girekomendar aron sa paglimpiyo sa mga inawas nga dugo.

Sa tanan natong pakiglabot sa uban, lakip na sa mga biktima sa AIDS, ang mga Kristohanon gisugo sa pagsunod sa panig-ingnan ni Jesus. Ang iyang kaluoy alang niadtong mga sinakit, apan mga sinsero sa ilang tinguha sa pagpahimuot sa Diyos, takos sa atong pagsundog. (Itandi ang Mateo 9:35-38; Marcos 1:40, 41.) Hinuon, sanglit sa pagkakaron wala pay tambal alang sa AIDS, angay nga ang usa ka Kristohanon mohimog makataronganong mga panagana samtang siya magtagana ug malulutong tabang ngadto niadtong nag-antos gumikan niana.​—Proverbio 14:15.

Mga Biktima sa AIDS Makatabang Usab

Ang maalamong nag-antos sa AIDS makaamgo nga ang uban sensitibo bahin niining sakita. Busa, ingong pagtahod sa mga pagbati niadtong buot nga motabang, mas maayo sa biktima sa AIDS nga dili magsugod sa publikong mga pasundayag sa pagbati sama sa paggakos ug paghalok. Bisan pag diyutay o walay posibilidad nga ang maong mga lihok makapasa sa sakit, kini nga pagpugong magpakita nga ang biktima mahunahunaon sa uban, busa sa baylo mobungag samang konsiderasyon.a

Sa pagkaamgo nga daghan ang nahadlok sa wala mahibaloi, ang tawo nga adunay AIDS angay nga dili dayon masilo kon siya dili dapiton dihadiha sa pribadong mga balay o kon daw ang usa ka ginikanan nagdili sa usa ka bata sa pagpakigsuod kaniya. Ug kon ang usa sa mga Pagtuon sa Libro sa Kongregasyon ginahimo sa Kingdom Hall sa mga Saksi ni Jehova, tingali maalamon alang sa usa nga adunay AIDS nga mopili sa pagtambong didto, inay sa pribadong balay, gawas kon kanang tawhana nakighisgot sa kahimtang uban sa tagbalay.

Ang mga tigdala sa AIDS kinahanglan usab nga magbaton ug mabinantayong kabalaka alang sa uban kon, pananglitan, ang ilang ubo nagdalag plema ug nahibaloan nga adunay tesis. Nianang panahona buot nilang ipadapat ang mga lagda sa panglawas sa komunidad bahin niining kahimtanga maylabot sa mga paagi sa paglain sa masakiton.

Ang laing kahimtang diin ang inosenteng tawo matakdan maoy pinaagi sa pagpakigminyo sa usa ka tawo nga wala mahibaloi nga adunay kagaw sa AIDS. Ang panginahanglan sa pagpanagana sa maong mga kahimtang tingali ilabinang kinahanglanon kon ang usa o ang duha sa umaabot nga kapikas mahilayon o nakagamit ug mga dagom sa pag-abuso sa droga sa wala pa makadangat sa tukmang kahibalo sa Pulong sa Diyos. Sanglit adunay nagatubong gidaghanon sa mga tawo nga adunay asymptomatic nga impeksiyon sa HIV (sa ato pa, wala pay makitang mga simtoma), angay alang sa usa ka indibiduwal o sa mabalak-ong mga ginikanan ang paghangyo nga ipaeksamin ang dugo sa umaabot nga kapikas sa dili pa magsabot nga magminyo o sa kaminyoon. Tungod sa malaglagon, makamatayng kinaiya niining sakita, ang umaabot nga kapikas sa kaminyoon dili angay masilo kon himoon ang maong hangyo.

Kon ang pagsusi napamatud-ang positibo, dili angay alang sa naimpeksiyon sa pagpugos sa gitinguhang kapikas sa pagpadayon sa panagtrato o sa panagsabot nga magminyo kon ang gidahom nga kapikas buot nang motapos sa relasyon. Ug maalamon alang kang bisan kinsa nga kanhi nagkinabuhi sa hataas-ug-risgo nga estilo sa kinabuhi, mahilayon o naggamit ug mga droga subay sa ugat, nga moboluntaryo sa pagpasusi sa dili pa magsugod sa pagpangulitawo. Niining paagiha, ang mga kahiubos malikayan.

Busa, ingong mga Kristohanon buot natong molihok nga may kaluoy ug dili isalikway ang mga tawo nga adunay AIDS, nga nagaila, hinuon, nga ang mga pagbati sa matag tawo magkalainlain bahin niining sensitibong ulohan. (Galacia 6:5) Sa sakit nga sama sa AIDS, dili tanang butang ang nahibaloan, busa tingali adunay mga pagduhaduha sa bahin sa daghan sa pagpakiglabot sa mga isyu nga nalangkit. Ang timbang nga panglantaw bahin sa butang mao ang pagpadayon sa pag-abiabi sa mga biktima sa AIDS diha sa Kristohanong kongregasyon ug ang pagpakita ug gugma ug pagkamabination ngadto kanila, samtang sa samang panahon mohimog makataronganong mga panagana aron sa pagpanalipod sa atong kaugalingon ug sa atong mga pamilya gikan sa sakit.

[Footnote]

[Kahon sa panid 13]

Naluoy Ako Kaniya

Usa ka adlaw samtang nagsangyaw ako sa dalan, giduol ko ang usa ka batan-ong babaye nga mga 20 anyos ang edad. Ang iyang dako kapehog kolor nga mga mata masulob-on kaayo. Sa paningkamot nga makasugod sa pagpakigsulti kaniya mahitungod sa Gingharian sa Diyos, gitanyagan ko siyag usa sa mga tract diha sa akong kamot. Sa walay pagpanuko gipili niya ang Kahupayan Alang sa Naguol. Gitan-aw niya ang tract ug dayon mitan-aw kanako ug miingon sa yano: “Ang akong igsoong babaye bag-o pang namatay tungod sa AIDS.” Sa wala pa ako matapos sa pagpahayag sa akong kaluoy, siya miingon: “Ako usab himalatyon tungod sa AIDS, ug ako adunay duha ka gagmayng bata.”

Naluoy ako kaniya, ug gibasahan ko siya gikan sa Bibliya bahin sa kaugmaon nga gisaad sa Diyos sa katawhan. Siya misagbat: “Nganong magtagad ang Diyos kanako karon sa dihang wala gayod ako magtagad kaniya?” Ako siyang giingnan nga gikan sa pagtuon sa Bibliya, siya makasabot nga ang Diyos mag-abiabi sa tanang sinserong maghinulsol ug mosalig kaniya ug sa halad lukat sa iyang Anak. Siya mitubag: “Nakaila ko nimo. Ikaw gikan sa Kingdom Hall niining karsadaha​—apan ang tawo ba nga sama kanako abiabihon sa inyong Kingdom Hall?” Ako siyang gipasaligan nga siya abiabihon.

Sa dihang sa kataposan mipadayon na siya sa paglakaw, nga naggunit sa librong Ang Bibliya​—Pulong sa Diyos o sa Tawo? ug sa iyang tract, ako naghunahuna, ‘Hinaot makaplagan niya ang kahupayan nga ikahatag lamang sa Diyos.’