Chile—Talagsaong Nasod, Talagsaong Kombensiyon
SILA miabot nga linibo ug tinagpulo ka libo sa Santiago, ang kaulohang siyudad sa Chile. Bisan sa populasyon nga kapin sa upat ka milyon, kini nga pag-abot dayag kaayo—kining tanang bisita nagtaod ug asul nga mga bads nga nagpahibalo sa 1993 “Diyosnong Pagtulon-an” nga Kombensiyon sa mga Saksi ni Jehova.
Kapin sa 400 ang naggikan sa halayong Hapon; kapin sa 700 ang gikan sa Tinipong Bansa. Kapin sa usa ka libo ang nagpanon pinaagi sa kahanginan ug sa dalan gikan sa kanait nga Argentina. Ang mantalaang La Tercera nag-ingon sa taho niini human sa kombensiyon: “Ang puti, moreno, ‘dalag,’ ug itom nga mga nawong naghatag ug pamatuod sa lainlaing mga rasa ug mga nasod nga gihawasan didto sa National Stadium. Dugang pa, ang mga lalaki ug mga babaye gikan sa Mexico, Brazil, Peru, Bolivia, Venezuela, Espanya, ug Hapon mailhan sa ilang kinaiyanhong sapot.” Ang mga delegado naggikan sa Alemanya, Australia, Belgium, Britanya, Canada, Holland, Paraguay, Pransiya, Switzerland, ug kadaghanan sa ubang mga nasod sa Habagatang Amerika. Kapin sa 4,500 ka langyawng mga bisita ang nagpanon ngadto sa Santiago sa semana sa Nobyembre 15, 1993. Unya labing kulbahinam, dihay 30,000 ka Saksing Chileano nga mibiyahe ug layo kaayo aron makaabot sa Santiago. Nganong ingon niadto?
Chile—Usa ka Talagsaong Nasod
Abi mo, sa geograpikanhong diwa, ang Chile maoy linain kaayong nasod. Unsay nakapahimo niining lahi ug talagsaon? Tan-awa ang mapa ug makita nimo ang usa ka nasod nga kapin sa 4,310 kilometros ang gitas-on apan ubos sa 440 kilometros sa kinalaparang bahin niini. Sa pagkatinuod ang aberids nga gilapdon niini kapin lang sa 180 kilometros. Ang kaulohan, ang Santiago, halos anaa sa tungatunga sa nasod. Tungod sa maong mga kinaiyahan daghang Chileanong mga Saksi ang kinahanglang mobiyahe ug ginatos ka kilometro uban sa ilang mga pamilya aron makaabot sa internasyonal nga kombensiyon—ug kini bisan pa sa limitadong salapi sa daghang kahimtang. Bisan pa niana nangabot sila nga linibo, nga ang ilang mga nawong mapahiyomon.
Ang Chile maoy usa ka nasod nga dagaya sa pagkadaiya, gikan sa mala nga Desyertong Atacama sa amihanan ngadto sa labong nga mga parasan sa rehiyong palibot sa Santiago ug padayon paubos ngadto sa habagatan diin ang daghag kahoy nga Andes mihanayhay ngadto sa Pasipiko. Sa kataposan, anaa ang mga glacier ug mga luuk nga mosangko sa rehiyon sa Antarctica.
Ang langyawng mga bisita nadani sa siyudad sa Santiago. Usa ka delegado naghisgot niana niining paagiha: “Ang hulagway nga makita mao ang kanunayng gimok ug kisaw, apan ang mga tawo maluluton ug mahigalaon. Wala pa gayod ako makakita sukad sa akong kinabuhi ug ingon ka daghang bus sa usa ka dalan. Ang dinosenang kompaniya sa bus nag-ilog sa pasahero. Ang gagmayng nga taksi nagdali bisan asa. Ang bugtong negatibong punto mao ang polusyon. Aron mamenosan kana, ang Santiago adunay mga lagda diin ang mga sakyanan magpulipuli sa pagbiyahe sa kadalanan usa ka adlaw matag semana, nga magpulipuli pinasikad sa numero sa lisensiya sa ilang sakyanan.” Siya midugang: “Laing makaiikag nga bahin mao ang hinlong pagkasapot nga kabataang nagtungha, ang tanan nakauniporme, nga walay eksepsiyon. Wala gayoy pag-indigay ug pagpit-os sa isigka-ingon didto nga makabaton sa kinaulahiang mga sapot ug mga sapatos nga guma nga may tatak sa linaing mga tigdesinyo! Ug walay naglago.”
Mainitong Pag-abiabi Alang sa mga Langyawng Bisita
Ang “Diyosnong Pagtulon-an” nga programa gisugdan sa Huwebes, Nobyembre 18. Ang langyawng mga delegado natingala sa dihang miabot sila sa Estadio Nacional nga estadyum sa saker. Sulod sa 270 metros nga paglakaw gikan sa ilang mga bus ngadto sa estadyum, misuot sila latas sa agianan nga nagdasok sa Chileanong mga Saksi—mga lalaki, mga babaye, ug mga bata—ang tanan buot nga moabiabi sa nagaduawng mga igsoon ug molamano kanila. Daghan ang nakakat-on pa gani sa yanong mga prase sa Ingles aron makaingon: “Welcome to Chile!” Sulod sa misunod nga upat ka adlaw, daghang panaghigalaay ang naporma bisan pa sa kababagan sa pinulongan. Ang mga kamera ug mga video rekorder madasigong gigamit sa daghang tawo. Nag-ilisay ug linibong handumanan, mga ngalan, ug mga adres.
Dili-Mabangbang nga Gidaghanon
Ang gilaomang kinadaghanang tumatambong alang niining maong kombensiyon maoy mga 60,000—ang 44,000 ka Chileanong mga Saksi, ang 4,500 ka bisita, ug dayon ang mga interesado. Handurawa ang katingala sa dihang ang tumatambong sa Huwebes ug Biyernes kapin na sa 50,000. Sa Sabado ang panon midaghan gikan sa 67,865 sa buntag ngadto sa 70,418 sa hapon. Sa Dominggo sa buntag, sa dihang ang programa naglakip sa drama maylabot sa pipila ka suliran nga giatubang sa mga Saksi karong adlawa, ang tumatambong miusbaw ngadto sa 80,981! Ang estadyum napuno, ug ginatos pa ang namati sa mga trompa sa gawas. Kini usa sa mga hinungdan nga naghimo sa kombensiyon nga talagsaon—ang kinadaghanang tumatambong sa tanang kombensiyon nga gihimo sa tibuok kalibotan sa “Diyosnong Pagtulon-an” nga serye. Usa ka sorpresa alang sa Chileanong mga Saksi ug usa ka timailhan sa kalaoman nga motubo ug mouswag ang ilang mga kongregasyon sa haduol nga umaabot.
Ang elektronik nga talihanan gigamit aron sa pag-anunsiyo sa matag pakigpulong sa Espanyol ug Ingles. Gipakita pa gani niini sa dihang ang tumatambong namakpak! Sa kataposan kana nagpasundayag sa mga panamilit sa daghang pinulongan, lakip sa Aleman, Hapon, Olandes, ug Pranses.
Bawtismo Nagdani sa Palaumagian sa Balita
Ang maong talagsaong hitabo dili mahimong dili-panumbalingon sa palaumagian sa balita sa Chile. Maayo kaayo ang pagbalita matag adlaw sa mantalaan, radyo, ug telebisyon. Kini ilabina sa dinaghang pagbawtismo nga gihimo sa Sabado. Dose ka gagmayng mga pool ang gipahiluna sa usa ka tumoy sa dulaanan sa saker. Panahon sa pakigpulong sa bawtismo, ang ginatos ka kandidato mibarog aron sa pagpakita sa ilang desisyon nga mosunod sa panig-ingnan ni Kristo pinaagi sa pag-alagad kang Jehova nga Diyos. Human sa pakigpulong, pag-ampo, ug awit, 24 ka ministro sa puting mga short ug mga T-shirt ang mipuwesto, duha sa matag pool. Ang babayeng mga kauban mitabang usab. Unya ang unang mga kandidato migula gikan sa ilisanan ug milakaw ngadto sa dulaanan, mga lalaki sa usa ka daplin, mga babaye sa lain. Daw duha ka walay-kataposang linya ang nagpadulong sa mga pool. Ang tanan mahapsay samtang ang mga letratista sa mantalaan mipuwesto. Sulod sa usa ka oras nakompleto ang bawtismo—1,282 ka bag-ong mga Saksi, Kristohanong mga ministro, ang nalusbog sa tubig, nga nagsunod sa panig-ingnan ni Jesus.
Usa ka Buloknong Panamilit
Maayo kaayo ang klima sa tibuok semana. Hinuon, kadto maoy tingpamulak sa Chile, dihang wala dahoma ang ulan. Ang temperatura sa Dominggo miusbaw ngadto sa kapin sa 20 grado Celsius. Halos ang kada pamilya nagdala ug mga payong ug mga parasol ingong panalipod batok sa naglagiting nga adlaw. Ang linibong buloknong mga parasol nagpahinumdom sa usa sa duot sa alibangbang nga mitugdon sa mga bulak. Ang kataposang pakigpulong natapos sa alas singko. Pagkatapos sa awit ug pag-ampo, halos walay milihok. Walay usa nga buot nga matapos ang kombensiyon. Ang mga grupo kalit nga miawit ug mga awit sa Gingharian; milanog ang mga palakpak gikan sa usa ka tumoy sa estadyum ngadto sa pikas; ang mga panyo giwarawara ug ang mga parasol dungang gipatuyok. Makapatandog kadto nga eksena—kining estadyum nga ang talan-awon sa likod niini mao ang Kabukiran sa Andes—napuno sa malipayon, mahigugmaong mga Kristohanon nga mapasalamaton sa “Diyosnong Pagtulon-an” nga nakapausab sa ilang mga kinabuhi.
Panahon sa programa sa Dominggo, duha ka Chileanhong mga langgam, ang queltehues, o habagatang lapwings, ang naglupadlupad latas sa dulaanan, nga usahay motuka sa pipila ka insekto o liso. Matag karon ug unya baldahon nila ang programa sa ilang basag nga mga tawag. Panahon sa kataposang pakigpulong, nga daw nahibaloan nila nga natapos na ang programa, sila hinayhinayng mipataas, miliyok aron makabuylo pataas, ug milupad. Sa walay duhaduha mobalik sila, maingon nga ang mga Saksi ni Jehova malipayng mobalik sa maong estadyum sa lain pang tuig aron sa pagpakig-ambit sa ilang kalipay ug pagtuo—sa Chile, un país singular, usa ka talagsaong nasod.
[Mga hulagway sa panid 17]
Kapin sa 80,000 ang mitambong sa kombensiyon sa Santiago
[Tibuok-panid nga hulagway sa panid 18]