Mga Magmamantala sa Gingharian Nagtaho
Ang Chile Nagmauswagon Tungod sa Miuswag nga Kalamdagan
SAMA sa pagdan-ag sa mga bidlisiw sa adlaw ibabaw sa kabukirang Andes sa panahon sa banagbanag, ang kahayag sa kamatuoran sa Bibliya unang miabot sa Chile sa 1930. Niadtong tuiga, usa sa dedikadong mga alagad ni Jehova miabot gikan sa Argentina uban ang maayong balita. Karong adlawa, ang kahayag sa Pulong sa Diyos nagadan-ag ug nakaabot sa halayong mga suok sa yuta.
Bisan tuod ang unang sangang-buhatan sa Chile naestablisar sa 1945, ang bag-o, dakodakong tinukod sa sanga napatindog sa 1970, dihang ang gidaghanon sa mga magmamantala sa Gingharian miabot ug 7,000. Sa sunod napulo ka tuig, ang dugang kalamdagan gikan sa Pulong sa Diyos nakatandog sa daghang masanongong mga kasingkasing. Sa sinugdanan sa katuigang 1980 gikinahanglan kaayo ang dugang pagpadako sa sangang-buhatan. Busa, sa Septiyembre 1982 napalit ang 17.5-akre (7 ektarya) nga yuta sa gawas sa Santiago. Ug human sa dakong pasiunang buluhaton, ang pagkalot nagsugod sa Hunyo 1984.
Makalipay ang pagtan-aw nga ang mga igsoon sa Chile, batag tigulang, misuportar sa proyekto pinaagi sa ilang daghang amot. Kaliboan pa naghatag sa ilang panahon ug mga abilidad. Ang pipila nga may teknikal nga pagbansay mitabang sa inhenyeria. Ang uban mingtrabaho sa pagpanday, pagsulda, paggamag kortina, ug pagpatahom sa tugkaran, o pagtanyag sa yanong buhat sa gugma pinaagi sa pagpangibot sa mga sagbot, pagtulod sa mga karetilya, ug pagkalot sa mga kanal. Sa pagkamatuod, ang mauswagong kahayag sa Pulong sa Diyos nakatandog sa mga kasingkasing sa iyang katawhan ug nagdasig kanila sa pagtanyag sa ilang kaugalingon sa kinabubut-on.—Salmo 110:3.
Ang panaghiusa ug kaandam namatikdan sa mga tagagawas. Daghang salesman ug bisan mga estudyante ug propesor sa unibersidad nangadto sa puwestong gitukoran aron sa pagpaniid ug pagkakat-on. Ang usa ka kontraktor buot magpatrabaho sa tanang trabahante sa pagsemento aron motabang sa usa ka supermarket nga iyang gitukod. Ang usa ka salesman mikomento kon unsa ka lahi ang mga trabahante—walay panghimaraotay, walay pagbagdoybagdoy. Sa gisultihan nga ang tanan maoy mga Saksi ni Jehova ug tua didto ingong mga boluntaryo, siya mitubag: “Dili ka makakitag ingon niini sa laing dapit. Kamo taga laing kalibotan.”
Sa kataposan, sa Agosto 1986 ang mga magbubuhat sa sangang-buhatan sa Chile namalhin ngadto sa bag-ong tinukod sa Puente Alto. Ug sa Oktubre 25, nga didto si A. D. Schroeder sa Nagamandong Lawas sa mga Saksi ni Jehova, ang madasigong panon sa 933 nagpahayag sa ilang tibuok-kasingkasing nga pagpaluyo sa pagdedikar sa bag-ong mga tinukod ngadto sa pag-alagad kang Jehova. Sa pagkaugma, ang usa ka espesyal nga okasyon gihimo sa nait nga estadyum, ug 18,012 ang midugang sa ilang sí ngadto sa resolusyon.
Gikinahanglan ba gayod ang maong pagpadako? Pasagding ang mga hitabo ang motubag. Sa gipalit ang yuta niadtong 1982, may 17,500 ka magmamantala sa Gingharian sa Chile. Karon adunay kapin sa 29,000! Ug uban sa duolag 40,000 ka pagtuon sa Bibliya sa balay nga ginadumala, ang kataposan dili pa makita. Busa pasagdi nga ang kahayag gikan sa Pulong sa Diyos mosidlak nga labi pang masanagon niining tabunok nga teritoryo sa tiilan sa Andes, sa kadayegan ni Jehova ug sa panalangin sa iyang katawhan.—Daniel 12:3.