Iyang ’Gihinumdoman ang Iyang Maglalalang sa mga Adlaw sa Iyang Pagkabatan-on’
“SI Adrian kanunayng nalabihag tagad sa ginikanan,” matud sa iyang amahan. “Sa nagkuwatro anyos iyang gidasmag ang kotse sa pamilya sa kahoy, nga nagpaulahi sa tanan sa tigom sa kongregasyon. Sa nagsingko anyos nangolekta siyag dinosenang baki ug gidala sa balay. Mikabat ug daghang adlaw ang paghipos niining mga bakia. Nahisama kami sa usa ka pamilyang Ehiptohanon panahon sa Biblikanhong hampak sa mga baki.
“Sa nag-11 anyos siya, nakakita siyag tulo ka itoy sa raccoon sa daplin sa kalsada ug gidala kini sa eskuylahan sulod sa iyang bag sa libro. Sa pagsulod sa magtutudlo, nagkaguliyang ang klase—ang mga bata nagtapok sa bag sa libro ni Adrian, nga maukyabong nag-estoryahay. Mitan-aw ang magtutudlo, nakita ang mga raccoon, ug nagsakay kaniya ug sa iyang mga binuhi ngadto sa usa ka pasilidad nga nag-atiman sa nailo nga mga hayop. Mihilak si Adrian sa pagtuo nga mawala ang iyang mga itoy, apan humag pasiyo sa pasilidad ug nakita ang mga itoy sa milo ug ubang mga nailo nga giatiman pag-ayo, iyang gibilin ang iyang mga raccoon didto.”
Mipadayon ang iyang amahan: “Dili daotang bata si Adrian. Lihokan lang siya kaayo. Daghan kaayog mahunahunaan nga makapalingaw sa kinabuhi.”
Ang inahan ni Adrian mipakitag laing dagway kaniya—suod sa pamilya, dili laagan, usa gayod ka mahigugmaong bata. Siya miasoy: “Ang mga bata sa tunghaan nakaila kaniya ingong tawo nga dili mopasakit kang bisan kinsa. Usa ka batang babaye sa iyang klase ang hinayg panabot hinuon dili kulango. Sakay siya sa bus sa tunghaan uban kang Adrian. Gihimo siyang kataw-anan sa ubang mga bata, apan miingon ang iyang inahan kanamo nga kanunayng gitratar ni Adrian ang iyang anak nga babaye nga may pagtahod ug linaing kalulot. May pagkaseryoso usab siya—mahunahunaon kaayong bata nga may halalom nga mga pagbating dili kanunayng ipahayag. Apan sa dihang ipahayag niya kini, iya kaming pakuratan sa mga pulong nga nagpakitag halalom nga pagsabot sa mga butang.”
Siya mihinapos sa iyang pagtimbangtimbang sa iyang anak: “Ang iyang sakit nagpahamtong kaniyag dali ug nagpatunghag halalom nga espirituwalidad diha kaniya.”
Siya Malig-on—Walay Dugo!
Iyang sakit? Oo. Misugod kini niadtong Marso 1993, sa nag-14 anyos si Adrian. Usa ka kusog-motubong tumor ang nadiskobrehan sa iyang tiyan. Ang mga doktor buot ug biopsy apan nahadlok nga sobrang magdugo ug miingon nga ang pagdugang ug dugo basin kinahanglanon. Si Adrian miingon ug dili. Lig-on siya. Siya miingon, nga may mga luha sa iyang mga mata: “Mawad-an akog pagtahod sa kaugalingon kon ako dugangan ug dugo.” Siya ug ang iyang pamilya mga Saksi ni Jehova, kinsa dili magpadugang ug dugo tungod sa mga katarongan sa Bibliya nga gitala sa Levitico 17:10-12 ug Buhat 15:28, 29.
Samtang sulod sa Dr. Charles A. Janeway Child Health Centre sa siyudad sa St. John’s, Newfoundland, nga naghulat sa pag-biopsy—nga pagahimoon nga walay dugo—si Adrian gihangyo sa oncologist nga si Dr. Lawrence Jardine sa pagpahayag sa iyang kaugalingon bahin sa dugo.
“Tan-awa,” matud ni Adrian, “walay sapayan kon mga Saksi ni Jehova o dili ang akong mga ginikanan. Dili gihapon ako magpadugang ug dugo.”
Si Dr. Jardine nangutana, “Nasayod ka ba nga mahimo kang mamatay kon dili ka magpadugang ug dugo?”
“Oo.”
“Ug andam ka nga himoon kana?”
“Kon kana ang mahitabo.”
Ang iyang inahan, nga didto usab, nangutana, “Nganong kana man ang imong baroganan?”
Mitubag si Adrian: “Ma, dili kana maayong bugti. Ang pagsupak sa Diyos ug palugwayan ang akong kinabuhi alang sa pipila ka tuig karon ug unya tungod sa akong pagsupak sa Diyos mawad-an ug paglaom nga mabanhaw ug mabuhing walay kataposan sa iyang paraisong yuta—kana dili gayod maalamon!”—Salmo 37:10, 11; Proverbio 2:21, 22.
Gihimo ang biopsy niadtong Marso 18. Kini nagpakita nga si Adrian may dakong tumor nga lymphoma. Ang sunod nga biopsy sa utok sa bukog nagpamatuod sa kahadlok nga siya may leukemia. Niining tungora si Dr. Jardine misaysay nga usa ka programa sa mabug-osong pagtambal pinaagig chemotherapy uban ang mga pagdugang ug dugo ang bugtong paagi nga mahimong mabuhi si Adrian. Hinunoa, si Adrian sa gihapon midumili sa pagpadugang ug dugo. Gisugdan ang pagtambal pinaagig chemotherapy, nga walay mga pagdugang ug dugo.
Ugaling, niining tungora samtang gihimo ang delikadong ang-ang sa pagtambal, dihay kahadlok nga ang Child Welfare Department hayan mangilabot ug mokuhag mando sa korte alang sa katungod sa pag-atiman ug sa gahom sa paghatag ug mga pagdugang ug dugo. Ang balaod nagtugot kang bisan kinsa nga 16 anyos o kapin pa sa paghimo sa iyang kaugalingong desisyon sa pagtambal. Ang bugtong paagi alang kang bisan kinsa nga ubos ug 16 nga makabatog katungod mao ang pag-isip kaniya nga usa ka batan-ong hamtong.
Sa Korte Suprema sa Newfoundland
Busa sa buntag sa Dominggo, Hulyo 18, ang temporaryo nga direktor sa Child Welfare misang-at ug kaso sa korte aron makuha ang katungod sa pag-atiman. Sa madali, usa ka banggiitan ug tinahod kaayong abogado, si David C. Day, Q.C., sa St. John’s, Newfoundland, ang gikuha aron mohawas kang Adrian. Niadtong hapona mismo, sa 3:30, nagtigom ang Korte Suprema sa Newfoundland, si Maghuhukom Robert Wells ang nanguna.
Sa sesyon sa hapon, gipatin-aw pag-ayo ni Dr. Jardine sa maghuhukom nga iyang giisip si Adrian ingong usa ka batan-ong hamtong nga may halalom nga pagtuo batok sa paggamit ug dugo ug nga siya, si Dr. Jardine, nakasaad kang Adrian nga dili niya ilakip ang pagdugang ug dugo sa bisan unsang pagtambal. Gipangutana ni Maghuhukom Wells ang doktor kon pananglitan ang korte momando nga dugangan ug dugo, iya ba kanang himoon? Si Dr. Jardine mitubag: “Dili, dili ko kana himoon sa personal.” Gilakbitan niya ang gibati ni Adrian nga mameligro ang iyang paglaom sa Bibliya sa kinabuhing walay kataposan. Ang sinserong pamatuod niining talagsaong doktor makapakurat ug makapadasig ug nakapahilak sa mga ginikanan ni Adrian sa kalipay.
“Palihog Tahora Ako ug ang Akong Kagustohan”
Sa dihang nagtigom pag-usab ang korte sa Lunes, Hulyo 19, gipresentar ni David Day ang mga kopya sa affidavit ni Adrian—nga masakiton kaayo aron moatubang sa korte—nga iyang giandam ug gipirmahan nga nagpahayag sa iyang kaugalingong mga kagustohan labot sa pagtambal sa iyang kanser nga walay paggamit ug dugo o mga produkto sa dugo. Niana si Adrian miingon:
“Maghunahuna kag daghang butang sa dihang ikaw may sakit, ug kon ikaw may kanser, nasayod ka nga ikaw mamatay ug maghinuktok ka labot niana. . . . Dili ako mouyon sa dugo o motugot nga kana gamiton; dili gayod. Ako nasayod nga mahimong ako mamatay kon walay gamitong dugo. Apan kana maoy akong desisyon. Walay nagsulsol kanako niana. Misalig akog dako kang Dr. Jardine. Nagtuo ako nga siya maoy tawo nga motuman sa iyang pulong. Matud niya nga tambalan niya akong mabug-oson nga wala gayoy gamitong dugo. Gisultihan niya ako sa mga riyesgo. Nasabtan ko kana. Nasayod ako sa mahimong mahitabo. . . . Gibati nako nga kon ako dugangan ug dugo kana daw paglugos kanako, paghilabot sa akong lawas. Dili nako gusto ang akong lawas kon kana mahitabo. Dili ko gustong mabuhi kon ingon man lang niana. Dili ko gusto ang bisan unsang pagtambal kon gamiton ang dugo, bisan ang kalagmitan sa paggamit niana. Suklan ko ang paggamit ug dugo.” Ang affidavit ni Adrian gitapos uban niining hangyoa: “Palihog tahora ako ug ang akong kagustohan.”
Sa tibuok bista si Adrian naghigda sa iyang kuwarto sa hospital, ug si Maghuhukom Wells mahigalaon kaayong miduaw aron makita siya didto, nga presente si David Day. Sa pag-asoy niadtong maong interbiyo, si Gn. Day miingon labot sa madanihon ug malugsanong mga pahayag ni Adrian ngadto sa maghuhukom bahin niining maong tema, nga sa lintunganay nag-ingon: “Nasayod ako nga ako grabe, ug nasayod ako nga mahimo akong mamatay. Pipila ka mediko miingon nga makatabang ang pagdugang ug dugo. Dili ko motuo niana, uban sa tanang kapeligrohan nga akong nabasa labot niana. Makatabang man kana o dili, ang akong pagtuo maoy supak sa dugo. Tahora ang akong pagtuo ug kamo nagtahod kanako. Kon dili ninyo tahoron ang akong pagtuo, bation nako nga gihilabtan. Kon tahoron ninyo ang akong pagtuo, atubangon ko ang akong sakit nga may dignidad. Pagtuo na lamang ang nahibilin kanako, ug karon kini ang labing hinungdanong butang nga akong gikinahanglan sa pagsukol sa sakit.”
Si Gn. Day may kaugalingong mga pulong mahitungod kang Adrian: “Siya usa ka kliyente nga makaarang sa pagdumala sa iyang grabeng balatian nga mapailobon, uban ang kalig-on, ug kaisog. Dihay determinasyon sa iyang mga mata; dayag nga pagsalig sa iyang tingog; kasibot sa iyang panggawi. Labaw sa tanan, ang iyang panulti ug kompas naghatag ug mensahe kanako sa usa ka lig-ong pagtuo. Ang iyang talagsaong kinaiya maoy pagtuo. Ang walay kaayohan nga sakit nagpugos kaniya sa pagtukod ug mga taytayan tali sa batan-ong mga damgo ug sa hamtong nga katinuoran. Ang pagtuo mitabang kaniya sa paghimo niana. . . . Siya prangka ug, sa akong hunahuna, matinud-anon. . . . Nasayod ako sa posibilidad nga ang iyang mga ginikanan [nagbaod] kaniya sa ilang pagsupak sa paggamit ug dugo sa medikal nga pagtambal kaniya. . . . Ako kombinsido [nga] iyang gigamit ang iyang kaugalingong hunahuna sa pagpahayag nga gusto niya ang pagtambal nga walay dugo.”
Sa laing okasyon si Gn. Day mipahayag mahitungod sa mga pagtuo ni Adrian nga “mas bililhon alang kaniya kay sa kinabuhi mismo” dayon midugang: “Kining malig-ong batan-ong lalaki, atubangan sa maong mga suliran, nagpabale-wala sa tanang suliran sa akong kinabuhi. Siya masilsil sa akong panumdoman hangtod sa kahangtoran. Siya usa ka batan-ong hamtong nga may dakong kaisog, salabotan, ug intelihensiya.”
Ang Desisyon—Si Adrian Usa ka Batan-ong Hamtong
Pagka-Lunes, Hulyo 19, natapos ang bista, ug si Maghuhukom Wells mipakanaog sa iyang desisyon, nga sa ulahi gipatik sa Human Rights Law Journal, sa Septiyembre 30, 1993. Mga bahin niini mosunod:
“Tungod sa mosunod nga mga katarongan, ang mga aplikasyon sa Direktor sa Child Welfare gitaktak; ang bata wala magkinahanglag proteksiyon; ang paggamit sa dugo o mga produkto sa dugo alang sa mga katuyoan sa mga pagdugang ug dugo o pag-indyeksiyon wala mapamatud-ing hinungdanon, ug sa partikular nga mga kahimtang niining maong kaso, mahimo pang makadaot.
“Gawas kon ang kausaban sa mga kahimtang magkinahanglag dugang mando, ang paggamit sa dugo o mga produkto sa dugo sa pagtambal kaniya gidili: ug ang bata gideklarar nga usa ka batan-ong hamtong kansang kagustohan sa pagdawat ug medikal nga pagtambal nga walay dugo o mga produkto sa dugo pagatahoron. . . .
“Walay duhaduha nga kining maong ‘batan-on’ maisogon gayod. Nagtuo ako nga siya gipaluyohan sa usa ka mahigugmaon ug mahangawaong pamilya, ug nagtuo ako nga iyang ginaatubang ang iyang kasakit uban ang dakong kaisog. Bahin sa iyang relihiyosong pagtuo mao nga sayop alang kaniya ang paggamit ug mga produkto sa dugo pinaagi sa pagpasulod niini sa iyang lawas, alang sa bisan unsang mga katuyoan . . . Nakahigayon ako sa pagbasa sa affidavit nga gihimo ni A. kagahapon, ug nakahigayon ako sa pagpaminaw sa iyang inahan, kinsa nagpamatuod, ug nakahigayon sa pagpakigsulti kang A. mismo.
“Ako kombinsido nga siya hugot nga nagtuo nga ang pagdawat sa dugo sayop ug kon pugson sa pagdawat sa dugo niining mga kahimtanga nga diin among gihisgotan mahimong pagpanghilabot sa iyang lawas, usa ka pagpanghilabot sa iyang pribasiya, ug pagpanghilabot sa iyang tibuok nga pagkatawo, sa sukod nga kini makaapektog dako sa iyang kusog ug katakos sa pagsagubang sa makalilisang nga pagsulay nga iyang pagaagian, bisan unsa pay sangpotanan.
“Ako uyon nga mihimo gayod ug makataronganong pagsabot ang doktor sa dihang siya miingon nga ang pasyente kinahanglang may kooperatibo ug positibong panghunahuna labot sa pagtambal pinaagig chemotherapy ug ubang mga pagtambal sa kanser aron makabaton ug bisan unsang paglaom, bisan unsang tinuod nga paglaom, sa kalamposan, ug nga ang usa ka pasyente nga sa pinugos gidapatan ug usa ka butang nga supak sa iyang labing hugot nga mga pagtuo mahimong usa ka pasyente kansang katakos alang sa pagtambal makunhoran ug dako. . . .
“Nagtuo ako nga ang nahitabo kang A. nagpahamtong kaniya ngadto sa sukod nga dili mahitabo sa usa ka 15-anyos nga wala mag-atubang ug wala magkinabuhi sama sa iyang gikinabuhian ug kinahanglang moatubang ug nagaatubang niana. Nagtuo ako nga ang iyang kahimtang sama ka lisod sa kahimtang nga akong mahunahunaan, ug natahap ako nga ang ilang pagtuo maoy usa sa mga butang nga nagpalig-on kaniya ug sa iyang pamilya. Sa akong hunahuna ang nahitabo nakapahamtong kang A. nga saylo sa bisan unsang normal nga pagdahom o pagkahamtong sa usa ka 15-anyos. Nagtuo ako nga ang bata nga gikasulti ko niining buntaga lahi kaayo gikan sa usa ka normal nga 15-anyos, tungod niining mapait nga kasinatian.
“Nagtuo ako nga siya hamtong gayod sa sukod nga makapahayag ug usa ka makusganong panglantaw, ug kini gipahayag niya kanako . . . Ako kombinsido usab nga tukma . . . alang kanako nga tagdon ang iyang kagustohan, ug ako kining himoon. Iyang kagustohan nga dili pagagamiton ang mga produkto sa dugo, ug ako kombinsido usab nga kon kining kagustohana supakon tungod sa pila ka paagi sa Direktor ubos sa usa ka mando niini nga Korte, nga ang iyang labing maayong mga tinguha sa dayag ug sa tinuod kaayo nga diwa madaot . . . Dugang pa, kon pananglit—ug kini posible gayod—siya mamatay gumikan niining maong sakit, siya mamatay gihapon bisag gidugangan ug dugo diha sa panghunahuna nga, maylabot sa iyang relihiyosong mga pagtuo, makapasubo kaayo, makaluluoy gayod, ug dili gayod tilinguhaon. Kining tanang butang akong gitimbangtimbang. . . .
“Niining tanang kahimtang, gibati ko nga tukma alang kanako nga dumilian ang hangyo nga gamiton ang mga produkto sa dugo diha sa pagtambal kang A.”
Mensahe ni Adrian Kang Maghuhukom Wells
Kadto maoy usa ka talagsaon mahunahunaong mensahe nga gipadala niining batan-ong lalaki, kinsa nahibalong siya himalatyon, ngadto kang Maghuhukom Robert Wells, nga gihatag pinaagi ni Gn. David Day, ingon sa mosunod: “Sa akong hunahuna mahimo akong walay pagtagad kon dili ko himoon, alang sa akong kliyente kinsa akong nakasulti sa makadiyut human sa imong pagbiya sa hospital karong adlawa, ang pagpasalamat kanimo gikan sa kahiladman sa iyang kasingkasing, nga usa gayod ka dakong kasingkasing, tungod sa imong walay langan nga pagdumala niining maong butang ug uban ang kamabination ug kadili-mapihigon. Siya mapasalamaton gayod kanimo, Akong Ginoo, ug buot kong ang rekord mopakita niana. Salamat kanimo.”
Ang inahan ni Adrian miasoy pag-usab sa paniklop nga mga panghitabo sa estorya.
“Human sa bista gipangutana ni Adrian si Dr. Jardine, ‘Hangtod kanus-a na lang ako?’ Ang tubag sa doktor: ‘Usa o duha ka semana.’ Nakita nako ang akong anak nga miluhag usa ka tulo sa luha, nga milusot sa hugot pagkapiyong nga mga mata. Miduol ako sa paghalog kaniya, ug siya miingon: ‘Ayaw, Ma. Nagaampo ako.’ Human sa pipila ka gutlo, ako nangutana, ‘Unsay imong hunahuna labot niini, Adrian?’ ‘Ma, mabuhi ra bitaw ko, bisag ako mamatay. Ug kon duha na lang ka semana ang nahibilin sa akong kinabuhi, gusto kong pahimuslan kini. Busa angayng magkalipay ka.’
“Gusto niyang moduaw sa sanga sa Watch Tower sa Georgetown, Canada. Iya kanang gihimo. Naligo siya sa swimming pool didto uban sa usa niya ka higala. Mitan-aw siyag usa ka dula sa besbol sa Blue Jays nga tem ug nagpaletrato uban sa pipila ka magdudula. Labing importante, sa iyang kasingkasing siya nagpahinungod sa iyang kaugalingon sa pag-alagad kang Jehova nga Diyos, ug karon gusto niya kanang simbolohan pinaagig pagtuslob sa tubig. Niining tungora misamot ang iyang kahimtang, ug gibalik siya sa hospital ug dili na makagawas gikan didto. Busa ang mga nars sa kamaayo mihikay alang kaniya aron magamit ang usa ka dili-tayaon nga mga tangke sa lawak sa physiotherapy. Siya gibawtismohan didto niadtong Septiyembre 12; namatay siya kinaugmaan, Septiyembre 13.
“Ang iyang haya gidugok sa kinadaghanang tawo nga sukad nahitabo sa punerarya—mga nars, mga doktor, mga ginikanan sa mga pasyente, mga klasmet, mga silingan, ug daghan sa iyang espirituwal nga igsoong mga lalaki ug mga babaye gikan sa iyang kaugalingon ug sa laing mga kongregasyon. Ingong ginikanan, wala gayod namo hiamgohi ang tanang kahibulongang mga hiyas nga nadayag diha sa among anak nga lalaki samtang iyang giantos ang daghan niyang mga pagsulay o ang kamaayo ug kamahunahunaon nga maoy bahin sa iyang nagatubo Kristohanong personalidad. Ang dinasig nga salmista nag-ingon: ‘Ang mga batang lalaki maoy panulondon gikan kang Jehova.’ Walay duhaduha usa siya niini, ug kami nagalaom nga makita siya sa bag-ong kalibotan sa pagkamatarong ni Jehova, nga pagatukoron sa dili madugay karon diha sa usa ka paraisong yuta.”—Salmo 127:3; Santiago 1:2, 3.
Hinaot dahomon nato ang katumanan sa saad ni Jesus alang kang Adrian sa Juan 5:28, 29: “Ayaw kahibulong niini, tungod kay ang takna nagasingabot diin kadtong tanan nga anaa sa handomanang mga lubnganan makadungog sa iyang tingog ug managpanggula, kadtong mga nagbuhat ug maayong mga butang ngadto sa pagkabanhaw sa kinabuhi, kadtong mga nagbuhat ug ngil-ad nga mga butang ngadto sa pagkabanhaw sa paghukom.”
Pinaagi sa pagdumili sa mga pagdugang ug dugo nga gituohang makapalugway sa iyang presenteng kinabuhi, si Adrian Yeatts nagpakita nga usa siya sa daghang batan-on nga nag-una sa Diyos.
[Kahon sa panid 5]
‘Ang Kinabuhi Anaa sa Dugo’
Ang dugo komplikado kaayo, nga moabot sa matag selula sa lawas. Diha sa usa ka tulo, 250,000,000 ka pulang selula sa dugo ang magdala ug oksiheno ug magkuha sa carbon dioxide; 400,000 ka puting selula sa dugo ang mangita ug molaglag sa wala-kinahanglanang mga manunulong; 15,000,000 ka platelet ang modugok dayon diin adunay samad ug mosugod sa pagtibug-ok aron isira ang samad. Kining tanan naglutaw sa tin-aw, kolor-garing nga plasma, nga nalangkoban mismo sa ginatos ka mga sambog nga hinungdanon kaayo diha sa taas nga listahan sa mga obra sa dugo. Ang mga siyentipiko wala makasabot sa tanang ginahimo sa dugo.
Dili ikatingala nga si Jehova nga Diyos, ang Maglalalang niining milagrosong pluwido, nagpahayag nga ‘ang kinabuhi anaa sa dugo.’—Levitico 17:11, 14.
[Kahon sa panid 7]
Walay-Dugo nga Transplant sa Kasingkasing
Niadtong Oktubre, ang tres-anyos nga si Chandra Sharp giadmit sa hospital sa Cleveland, Ohio, T.B.A., nga may kasingkasing nga dili lamang kay midako kondili luyahon na. Kulang siyag sustansiya, nauknol ang iyang pagtubo, nuybe kilos lamang ang iyang timbang, ug gikinahanglan niya ang transplant sa kasingkasing. Gitagalan na lamang siyag pipila ka semana nga mabuhi. Ang iyang mga ginikanan miuyon sa transplant apan dili sa pagdugang ug dugo. Sila mga Saksi ni Jehova.
Kini dili usa ka isyu sa siruhano, si Dr. Charles Fraser. Ang The Flint Journal sa Michigan mitaho niadtong Disyembre 1, 1993: “Si Fraser miingon nga ang Cleveland Clinic ug ang ubang mga sentro medikal hanas na sa paghimog daghang operasyon—lakip ang mga transplant—nga dili magpasulod ug dugo sa laing mga tawo ngadto sa pasyente. ‘Kami nakakakat-on ug dako mahitungod sa kon unsaon sa pagsanta sa pagdugo, ug kon unsaon sa pagkati sa heart-lung machine ug mga solusyon gawas sa dugo,’ matud ni Fraser.” Dayon siya midugang: “Ang pipila ka linaing mga hospital sulod sa mga dekada mihimog dagkong mga operasyon sa kasingkasing nga walay mga pagdugang ug dugo. . . . Kanunay namong gipaningkamotan ang pagdisdis nga walay (pagdugang ug) dugo.”
Sa Oktubre 29, gihimo niya ang transplant sa kasingkasing diha kang Chandra nga walay dugo. Usa ka bulan sa ulahi si Chandra gikataho nga maayo na.