Gikan sa Among mga Magbabasa
Madyik Karon nga akong nabasa ang artikulong “Ang Hunahuna sa Bibliya . . . Makuyaw ba ang Paghimog Madyik?” (Septiyembre 8, 1993), nasabtan ko nag maayo kon nganong sayop gayod ang madyik. Ang tawgon sa usa nga pag-awhag sa espiritu aron pagtagna sa umaabot dili pa dugay nga nauso sa akong tunghaan. Ang uban moingon kanako, ‘Dili ka ba moduyog kanamo?,’ ug bisan tuod ako mibalibad, ako nahibulong kon nganong kini sayop. Misulay ako sa pagpangitag tubag apan wala makakaplag ug usa nga makatagbaw kanako. Sa moundang na unta ako sa pagpangita, anaa ang inyong artikulo. Kini naghatag ug makatagbaw nga tubag. Salamat sa pagpatik niini.
M. K., Hapon
Mga Kartuning Nagustohan ko ang inyong artikulong “Makadaot ba ang Mapintas nga mga Kartuning sa TV?” (Disyembre 8, 1993) Nalipay gayod ako niana tungod kay daghang kabataan ang naimpluwensiyahan nianang mapintas nga mga programa. Ako 13 anyos.
D. L., Tinipong Bansa
Paghiusa sa Kalibotan Ako natandog gayod sa mga serye nga “Unsay Magpausa sa Kalibotan?” (Disyembre 22, 1993) Ako naguol sa nagapadayong balita gikan sa Bosnia ug Herzegovina ug gikan sa Somalia—kon sa unsang paagi ang mga tawo napugos sa pagkinabuhi ubos sa mga kahimtang sa gubat, kagutmanan, ug kamatayon. Bisan pa, kini nga mga serye nagpakita sa matuod nga sulbad ug kon sa unsang paagi kini sa aktuwal nagasaler taliwala niining kalisdanan sa kalibotan. Sanglit usa sa delegado sa internasyonal nga kombensiyon sa mga Saksi ni Jehova sa Polandia balik niadtong 1989, nakita ko nga ang mahigugmaon, hiniusang panag-igsoonay nga natagamtam sa mga Saksi ni Jehova maoy samag usa ka modernong milagro.
H. K., Hapon
Pag-abis sa Babaye Buot kong ipahayag ang akong kinasingkasing nga pasalamat kaninyo sa pagpatik sa artikulo bahin sa sirkunsisyon sa babaye (“Minilyon Nagaantos—Matabangan ba Sila?”) diha sa inyong Abril 8, 1993, nga isyu. Sukad nabasa kining artikuloha, naluoy ako kaayo sa walay-mahimong mga biktima niining batasana. Kini gipasiugda sa mga ginikanan nga gigiyahan sa sayop nga mga pagsabot bahin sa seksuwalidad sa babaye. Apan dili gugma ang pagpaagom sa mga bata niining dili makataronganong batasan nga sagad may seryosong mga sangpotanan sa lawas ug sa hunahuna.
J. O. K., Nigeria
Pagpaniid sa Kalibotan Buot ko lang mosulat ug sultihan kamo nga pagkadalayegon gayod sa buluhatong inyong ginabuhat. Ang bahin sa “Pagpaniid sa Kalibotan” nahimong usa ka dakong tabang sa dihang gikinahanglan ko nga mosulat ug mugbong mga taho sa mga balita alang sa eskuylahan.
J. W., Tinipong Bansa
Ako 14 anyos, ug regular akong nagabasa sa Pagmata! Naikag kaayo ako sa tanang artikulo. Usa ka partikular nga seksiyon nga buot kong pasalamatan kamo, hinunoa, mao ang “Pagpaniid sa Kalibotan.” Nakakat-on ako ug daghang nagkalainlaing mga butang gikan niana. Nunot kanunay kini sa panahon, ug sagad ako makakitag mga butang diha niana nga among ginahisgotan sa among eskuylahan. Giapresyar ko usab ang kamatuoran nga dili kamo nagahatag sa inyong kaugalingong opinyon labot niining mga butanga. Nagpasayon kini sa pagpaambit sa impormasyon sa ubang mga tawo nga dili na kinahanglang makiglalis pa.
T. M., Tinipong Bansa
Paghanduraw Ako nagsulat sa pagpasalamat ug dako kaninyo alang sa impormatibong mga artikulo sa “Mga Batan-on Nangutana . . .” bahin sa paghanduraw. (“Daotan ba ang Paghanduraw?,” Hulyo 8, 1993, ug “Sa Unsang Paagi Makahunong Ako sa Sobrang Paghanduraw?,” Hulyo 22, 1993) Human mabasa ang ikaduhang artikulo, naamgohan ko nga ako sobrang tighanduraw sa daghan nang katuigan. Dinagmalan ako sa bata pa, ug ang akong paagi sa paglingkawas (paghanduraw) sa hinayhinay nahimong usa ka bilanggoan sa hunahuna diha sa pagkahamtong. Ang paghanduraw nakadaot sa akong kalamposan sa trabaho ug sa dihang nagmaneho. Kini gani nakadaot sa akong kaminyoon. Salamat sa inyong mga artikulo, ako, uban ang dako nga disiplina, paningkamot, ug pag-ampo, misugod sa pagpasig-uli sa akong mga gahom sa pagpamensar ug katakos sa panghunahuna.
L. G., Tinipong Bansa