Gikan sa Among mga Magbabasa
Komunikasyon Salamat kaninyo alang sa nindot nga serye nga “Komunikasyon sa Kaminyoon.” (Enero 22, 1994) Bayente sayis anyos na akong minyo. Pipila ka tuig sa miagi, ang akong kaminyoon nadaot pag-ayo, ug kami hapit nang magkabulag. Ang suliran mao ang kakulang sa among komunikasyon. Akong gidukiduki ang mga publikasyon sa Watch Tower Society ug gisulayan pagpadapat ang akong nabasahan. Ang akong bana usab misugod sa pagtuon sa Bibliya. Apan kining maong mga artikulo naghatag kanako ug dugang mga bahin nga pagaugmaron. Kini nagtabang kanako sa pag-ugmad sa pagsabot ug nakadasig kanako sa pagpadapat sa mga sugyot.
Y. K., Hapon
Mga Batan-on Nangutana Ang artikulong “Mga Batan-on Nangutana . . . Unsay Ikasulti Bahin sa Pag-istambay? (Hunyo 22, 1993) nakagiya gayod kanako sa hustong direksiyon. Nagpuyo ako sa usa ka dapit nga ang pag-istambay sagad kaayo. Nagtuo ako nga daghang batan-ong sama kanako makabenepisyo gikan niining maong materyal.
T. S., Nigeria
Ang artikulong “Nganong Sapoton Kaayo ang Akong mga Ginikanan?” (Nobyembre 8, 1993) sa linain nakapainteres kanako tungod kay aduna koy amahan nga masuko kanako tungod sa buhaton sa akong igsoon. Usahay mouban ako sa akong amahan sa trabahoan, ug karon nasabtan nako kon unsa ka dako ang iyang ginasagubang nga kalisod.
A. K., Tinipong Bansa
Daghang salamat kaninyo alang sa mga artikulong “Ako ba Normal nga Nagatubo?” ug “Nganong Kusog Kaayo ang Akong Pagtubo?” (Septiyembre 22 ug Oktubre 8, 1993) Ako 11 anyos, ug may mga tawo nga nag-ingon nga ako gamay kaayo sa akong edad. Ang mga artikulo talagsaon gayod.
J. R. P., Alemanya
Ako 11 anyos ug maoy tumong sa masakit nga mga komedya tungod sa akong gitas-on. Salamat kaninyo sa pagtabang kanako nga masabtan nga wala ako mag-inusara niining bahina ug nga ako normal. Mas tulin lang ang akong pagtubo kay sa uban. Natabangan gayod ako niining mga artikuloha.
E. Q., Inglaterra
Maayo untang nabatonan ko kining artikuloha sa panahon nga nag-ulitawohay pa ang usa sa among anak nga lalaki ug kusog nga mitubo ngadto sa iyang presenteng 206 sentimetros nga gitas-on. Dili nako ikasulti kaninyo kon pila ka beses nahitabo nga ang unang butang isulti sa mga tawo mao, ‘Pagkataas nimo oy!’ o, ‘Unsay klima diha sa itaas?’ imbes, ‘Hello, komosta ka?’ Dili na kinahanglang isulti, kini nagpalisod sa pag-ulitawohay. Kinahanglan natong tabangan ang mga batan-on nga mobating komportable diha sa mga lawas nga ilang napanunod. Ang inyong artikulo giapresyar gayod.
M. D., Tinipong Bansa
Matinumanong Amahan Salamat kaninyo sa makapadasig nga artikulong “Ang Matinumanong Panig-ingnan sa Akong Amahan.” (Disyembre 22, 1993) Ang akong kaugalingong amahan namatay nga matinumanon halos duha na ka tuig ang milabay. Ang iyang mga bitiis nanghupong pag-ayo nga sa kataposang bulan sa iyang kinabuhi dili siya makalakaw. Apan iyang sangyawan ang tanang tawo nga moduol sa iyang higdaanan hangtod sa iyang kataposang adlaw. Siya nakagugol ug duolan sa 20 ka oras sa pagsulti sa uban bahin sa iyang pagtuo sa panahon sa iyang kataposang bulan. Ang artikulo nagpahinumdom kanako nga ‘ang samang mga butang maylabot sa mga pag-antos nagakahitabo diha sa tibuok kapunongan sa mga igsoon.’—1 Pedro 5:9.
D. P., Tinipong Bansa
Mga Pag-abuno ug Dugo Buot kong ipahayag ang akong pasalamat alang sa artikulong “Mga Saksi ni Jehova ug ang Medikal nga Propesyon Nagtinabangay.” (Nobyembre 22, 1993) Kini nagpakita sa kahangawa ni Jehova alang sa atong pisikal ingon man sa atong espirituwal nga kaayohan. Ako naabunohan ug dugo sa pinuwersang paagi mga 13 ka tuig nang milabay human sa pagpanganak. Busa nasabtan nako ang bili sa pagbaton ug Kristohanong mga lalaki kinsa gibansay sa pagtabang kanato sa dihang gikinahanglan. Ako naglaom ug nag-ampo nga ang uban dili makasinati sa akong nasinatian.
K. T., Tinipong Bansa