Mga Mina sa Yuta—Usa ka Tibuok-Yutang Kapeligrohan
MATAG bulan linibong inosenteng mga lalaki, babaye, ug mga bata sa kapin sa 60 ka nasod ang napungkol, ug ang pipila namatay, tungod sa mga mina sa yuta. Gibanabana nga ang batok-tawong mga mina nakapatay o nakaangol sa mas daghang tawo kay sa kemikal, biyolohikal, ug nukleyar nga pakiggubat. Sumala sa Human Rights Watch nga organisasyon sa panukiduki, sa Cambodia lamang mga 30,000 ka tawo ang napungkol tungod sa mga mina.
Kining gagmayng mga bomba nalubong sa yuta sa panahon sa lainlaing gubat, ug kadaghanan niini wala gayod kuhaa. Gikalkulo nga mga 100 ka milyon niini nagpabiling nalubong sa kapin sa 60 ka nasod. Mobuto kini pinaagi lamang sa pagtunob ug inila sa pakiggubat tungod kay barato ug epektibo. Ang usa ka matang mobili lamang ug $3 (U.S.). Ang lain, nga mosabwag ug 700 ka boletas ug makapatay sulod sa 50 ka yarda, mobili lamang ug $27. Pinangita kini pag-ayo, taho sa The New York Times, nga karon 48 ka nasod ang nagagama ug nagabaligyag 340 ka lainlaing matang sa mina. Ug daghan pa ang ginalubong matag adlaw kay sa mga nakalot pinaagi sa mga paghawan sa mga mina.
Ang paghawan sa mina lisod ug dakog gasto, sanglit daghang kasundalohan wala maghupot ug rekord kon asa gipanglubong ang mga mina; ug kadaghanan sa mina gama sa kahoy, plastik, ug ubang materyal nga dili mamatikdan sa metal nga mga detektor. Ang senador sa T.B. nga si Patrick Leahy, nga nag-awhag nga idili ang pag-eksportar niining maong hinagiban, nag-ingon: “Sa Netherlands, nagakamatay gihapon ang mga tawo tungod sa mga mina sa Aleman niadtong Gubat sa Kalibotan II. Hunahunaa lang kon unsa kana ka grabe sa Afghanistan, Cambodia, Angola, Bosnia ug tanang ubang nasod nga gibutangan ug daghang mina.”
Ang umaabot lamang nga bag-ong kalibotan sa Diyos ang makasulbad sa maong mga suliran. Ang iyang Pulong nagasaad: “[Ang Diyos] nagapahunong sa mga gubat hangtod sa kinatumyan sa yuta. Gibali niya ang pana ug gibunggo ang bangkaw; ang mga karo [sa gubat] iyang gisunog sa kalayo.”—Salmo 46:9.