Pagbutyag sa mga Sekreto Niini
SAMTANG magkatigulang ang mga babaye, ang menopos maoy usa ka panghitabo sa ilang mga kinabuhi. Apan, kini wala gayod hisabti. Sumala sa librong The Silent Passage—Menopause, gituohan sa doktor sa mga sakit sa babaye sa ika-19ng siglo nga ang menopos “makapagubot sa sistema nerbiyos sa babaye ug maghikaw sa kababayen-an sa ilang kinaiyanhong katahom.”
Nagmalahutayon kanang sayop nga mga ideya. Ingong sangpotanan, nahadlok ug nabalaka ang daghang babaye bahin sa pag-abot sa menopos. Ang pagbuntog sa mga suliran sa panghunahuna nga nalangkit niini gipunting ingong “usa sa labing lisod nga mga tahas sa kinabuhi sa usa ka babaye,” diha sa librong Natural Menopause—The Complete Guide to a Woman’s Most Misunderstood Passage.
Sa mga katilingban diin ang pasiugda gibutang sa pagkabatan-on ug sa batan-ong panagway, ang pagsugod sa mga simtoma sa menopos mahimong magsibya sa usa ka sayop nga ideya: ang hinanaling pagkatapos sa pagkabatan-on ug ang pagsugod sa pagkatigulang. Busa, gikahadlokan sa pipila ka babaye ang menopos tungod kay daw naghawas kini sa sinugdan sa bag-o, dili-maayong yugto sa kinabuhi. Ang pipila nag-isip pa gani niini ingong “inanay nga kamatayon.”
Ang modernong kababayen-an sa kawalay-alamag dili na kinahanglang mag-antos samtang maagian nila kining yugtoa sa kinabuhi. Ang mga sekreto sa menopos ginabutyag na. Ang dugang pagdukiduki ginahimo, ug ang mga terapiya ginaugmad aron mahimong sayon ang kausaban. Ang mga magasin, mga mantalaan, ug mga libro nagahatag ug bug-os nga pagtagad sa topiko, nga nagatagana ug mga katin-awan alang sa mga pangutana nga ang pipila maulaw sa pagsukna sa nangagi. Ang medikal nga propesyon, usab, mas nahibalo sa mga suliran nga mahimong maagoman sa kababayen-an.
Nganong gihatag ang tanang pagtagad sa maong ulohan? Tungod kay ang mas maayong pagsabot sa menopos makawagtang sa mga kahadlok, mga patuotuo, ug mga kapakyasan nga anaa sa daghang babaye. Diha sa daghang nasod ang mga babaye mas tag-as ug kinabuhi, ug sila nagtinguha sa pagbuak sa daw tinuyong kahilom bahin sa ulohan ug mahibalo. Gusto nila ang sayon hisabtan, prangka nga mga tubag. Angay lamang, sanglit daghan kanila ang adunay kapig un-tersiya pa sa ilang kinabuhi human sa menopos.
Ang mga sumbanan sa populasyon sa Tinipong Bansa nagtagnag 50-porsientong pag-uswag latas sa sunod nga dekada sa gidaghanon sa mga babayeng anaa sa edad sa pagmenopos. Ang maong mga babaye gustong masayod bahin sa mga kapeligrohan sa panglawas, sa kalit nga mga panginit sa lawas, sa kalit nga mga kausaban sa buot, sa mga kagil-as, ug sa pisikal ug emosyonal nga mga kausaban. Ngano bang mahitabo man kining mga butanga? Ang mga katakos ba sa babaye sa pagkinabuhig matagbawong kinabuhi matapos sa panahon sa menopos? Ang menopos ba makapausab sa personalidad sa usa ka babaye? Ang sunod nga mga artikulo motukib niining mga pangutanaha.