Gikan sa Among mga Magbabasa

Alpine Iceman Mao pay pagkahuman nakog basa sa “Ang Misteryo sa ‘Alpine Iceman.’” (Mayo 8, 1995) Angkonon ko nga sa una nakong pagkadawat niini, wala gayod ako maghunahuna nga magustohan nako ang ulohan. Apan nakaplagan nako ang artikulo nga makaiikag kaayo! Giapresyar nako ang paagi nga gipakita niini nga ang naandang panghunahuna bahin sa “primitibong” tawo dili husto.

J. S., Tinipong Bansa

Ang madanihong ulohan nakatabang kanako sa pagpahimutang sa magasin uban sa usa ka tawo nga akong nahimamat sa tren. Sa misunod nga semana nahibalag ko siya pag-usab, ug siya miingon nga iyang nakaplagan nga ang artikulo maoy “taas-ug-kalidad” ug maayong pagkabalay. Gidawat niya ang kinaulahiang isyu sa Ang Bantayanang Torre.

G. C., Hapon

Menopos Sa inyong seryeng “Usa ka Mas Maayong Pagsabot sa Menopos” (Pebrero 22, 1995), inyong gihisgotan ang paggamit ug “mga lanang gikan sa utanon o prutas, lana nga bitamina E, ug mga panghaplas sa pagpadanlog” ingong tambal sa pagkauga sa kinatawo sa babaye. Ingong kuwarto-anyo nga estudyante sa narsing, naaghat ako sa paghisgot nga ang ginama-sa-lana ug ginama-sa-prutas nga pagpadanlog magtaganag sanayanan sa kagaw. Ang matunaw-sa-tubig nga mga pagpadanlog sa ingon mas maayo.

H. W., Tinipong Bansa

Giapresyar namo ang pagkadawat niining nunot-sa-panahong impormasyon.​—ED.

Sa edad nga 45, misugod ako sa pagkaagom sa pagpanginit. Giantos nako kini sulod sa katuigan nga walay tambal. Busa mihilak ako sa gibati nako ang mahigugmaong kahangawa nga makita diha sa inyong artikulo. Nakatabang kini kanako sa pagsabot nga mas maayo pa sa menopos, ug nagtubag kini sa daghan nakong mga pangutana.

S. T. B. A., Brazil

Mga Dula sa Kompiyuter Nalipay ako sa pagkakita sa artikulong “Kini Bang Dulaa Alang Kanimo?” (Mayo 8, 1995) Ingong usa ka ginikanan, nalisang ako sa matugotong tinamdan sa pipila kinsa naghunahuna nga kining mga dulaa maoy dili-makadaot nga kalingawan. Adunay daghang edukasyonal ug dili-mapintas nga mga dula nga mahimong dulaon.

K. G., Tinipong Bansa

Ako usa ka tigtasal sa software sa kompiyuter, ug bag-o pa lang akong gihatagan ug kopya sa dulang Doom II aron tasalan. Akong nakaplagan nga ang dula naggamit sa demonyohanong mga simbolo, sama sa bali nga mga krus ug mga bituon. Nanghinaot ako nga ang mga tawo makaamgo kon unsa ka daotan kining mga dulaa.

R. B., Tinipong Bansa

Sayong Pagminyo Salamat sa artikulong “Mga Batan-on Nangutana . . . Pagminyog Sayo​—Molampos Kaha Kami?” (Abril 22, 1995) Ingong mga magtatan-aw sa kongregasyon, gihikay namo nga mohimog pagduaw ingong magbalantay sa usa ka batan-ong magtiayon kinsa may suliran sa kaminyoon. Nahibulong akog dako sa dihang miabot kining maong isyu! Mao gayod kini ang among gikinahanglan sa pagtabang niadtong batan-ong magtiayon. Among gikonsiderar ang entirong artikulo maingon man ang tanang teksto sa Bibliya nga gisitar.

M. C., Brazil

Pagsiksik sa Ilalom sa Dagat Giapresyar namog dako ang artikulong “Luwas nga Pagsiksik sa Kalibotan Ilalom sa mga Balod.” (Mayo 8, 1995) Bag-o pa lang kaming miuli gikan sa biyahe ngadto sa Pulang Dagat ug nakaplagan ang inyong tambag nga mapuslanon kaayo. Dili lang kay gisiksik namo ang usa ka matahom nga kahiladman sa dagat kondili nakadaginot usab kamig daghang salapi!

V. C. ug K. B., Italya

Ang akong bana ug ako usahay may mga suliran mahitungod sa mga kalihokan sa paglingawlingaw sa among duha ka anak lalaki. Ang akong bana interesado sa pagbuso, ug usa ka eskuylahan sa pagbuso ang bag-ong gibuksan sa among dapit. Human mabasa ang inyong artikulo, nahimuot ako nga makabaton ako ug hinlong konsensiya sa dihang sila moapil.

C. P., Alemanya

Paglabang-Buhi sa Komunismo Daghang salamat sa artikulong “Kapin sa 40 ka Tuig Ilalom sa Komunistang Pagdili.” (Abril 22, 1995) Ang akong kasingkasing natandog pag-ayo sa dihang nabasa nako kini. Nagpakita kini kanako kon sa unsang paagi si Jehova naghatag sa gikinahanglang pagpaluyo sa tukmang panahon aron ang usa ka tawo makahupot sa integridad.

S. A. A., Ghana