Gikan sa Among mga Magbabasa
Mga Dulaan Mao pay pagkahuman nakog basa sa maayong artikulo nga “Mga Ginikanan—Piliang Maalamon ang mga Dulaan sa Inyong Anak.” (Septiyembre 8, 1994) Ingong usa ka ginikanan, gipabilhan ko pag-ayo ang impormasyon. Bisan pa, buot kong idugang ang usa ka sugyot nga pahimangno. Palihog pasidan-i ang mga magbabasa nga ang gagmayng kabataan mahimong malumos sa mga balde o mga timba bisan gamay ra ang sulod nga tubig.
E. V., Tinipong Bansa
Giapresyar ang pahinumdom.—ED.
Ang akong anak nga lalaki ug ako naghisgotay bahin sa iyang tinguha nga mopalit ug dulaan nga gibati kong dili angay alang kaniya. Sanglit bata, naglisod siya sa pagdawat sa akong pangatarongan. Samtang kami nag-estoryahay, among gibuksan ang koreyo, nga naglakip sa kinabag-ohang Pagmata! Nakurat kaming duha sa pagkakita sa ulohang “Nasayod Ka ba kon Unsay Ginadulaan sa Imong Anak?” Siya nakadayeg sa artikulo ug misugod sa pagkasabot sa akong pangatarongan.
W. F., Tinipong Bansa
Salamat sa mga artikulo. Ako hapit nang mag-13 anyos ug malipay sa mga kalihokan sa gawas sa balay, mga arte ug binatid nga mga buhat, ug pagpatokar ug piano. Sa bata-bata pa ako, naghimo akog kaugalingon nakong mga dulaan. Gusto ko ang paghimo niining mga butanga kay sa mga dula sa video tungod kay maghatag kini kanako sa pagbating may nahimo. Naglaom ako nga kining mga artikuloha makatabang sa ubang kabataan nga masayod kon unsa ka makalingaw kining mga butanga.
C. S., Tinipong Bansa
Hippopotamus Salamat sa pagpatik sa artikulong “Hippopotamus Mitabang!” (Oktubre 8, 1994) Ako natandog kaayo sa dihang nabasa ko ang mahitungod sa paagi sa pagtabang sa hippopotamus sa impala. Hangtod karon, ang usa ka hippo sa akong pagsabot maoy usa lamang ka dakog lawas nga anaa sa tubig nga magbuka sa dako kaayong baba aron ipakita ang dagko kaayong mga ngipon. Dili ako makaingon nga nagustohan ko ang maong mga mananap, apan kining artikuloha nakausab sa akong hunahuna.
Y. H., Hapon
Sugilanon sa Usa ka Sundalong Israeli Mao pay pagkahuman nako sa artikulong “Gibansay sa Pagpatay, Karon Ako Nagatanyag ug Kinabuhi.” (Septiyembre 8, 1994) Daghang panahon nga ako natukmod sa pagsulat kaninyo aron ipahayag ang akong apresasyon, apan wala pa gayod sukad nga gibati kong napugos sa pagbuhat niini sama karon. Sagad ako nahibulong bahin sa pagsanong sa mga Hudiyo sa maayong balita sa Gingharian ni Jehova. Karon inyong natagana ang talagsaon makapalipay sa kasingkasing nga sugilanon bahin kang Rami Oved. Pagkadakong kalipay nga mabasa ang kadaogan sa Pulong sa Diyos batok sa tanang kababagan!
J. S., Tinipong Bansa
Ang sugilanon nakatandog sa akong kasingkasing, sanglit ang akong banay maoy Hudiyo usab ug kagikan. Kini malisod alang sa daghang tawo kon pilion nila ang kamatuoran sa Bibliya kay sa ilang mga pamilya, apan kini mas ilabinang malisod alang sa mga Hudiyo, sanglit ang ilang mga pamilya mag-isip kanimo nga patay na alang kanila. Ang mga pamilya sa akong mga ginikanan mikalma na, hinunoa, sa dihang ilang naamgohan nga dili gayod isalikway sa akong mga ginikanan ang kamatuoran aron lang sa pagpahimuot kang bisan kinsa!
F. K., Tinipong Bansa
Operasyon sa Mata Akong gibasa ang artikulong “‘Radial Keratotomy’—Unsa Kana?” nga may dakong kaikag. (Septiyembre 22, 1994) Sanglit magpaopera ako niining paagiha sa pipila ka bulan, akong giapresyar gayod ang nagpatin-aw nga impormasyon. Kini mas kompleto kay sa impormasyon nga gihatag sa mga espesyalista sa mata.
G. C., Italya
Nag-antos nga Kabataan Ang inyong seryal nga “Unsa ang Paglaom Alang sa mga Bata?” (Mayo 8, 1994) maoy matinud-anon ug maayo kaayong pagkasulat. Ang pagbasa sa grabe kaayong mga kasinatian ug ang makamatayng mga sakit, ingon man usab ang grabe kaayong mga kahimtang sa pagkinabuhi nga daghang kabataan ang nag-antos, nagpasubo sa akong kasingkasing. Apan ako nalipay nga mabasa ang mahitungod sa matuod nga paglaom alang sa kabataan nga matuman sa dihang ang Gingharian sa Diyos magamando na sa katawhan.
D. G., Papua New Guinea