Hingpit nga Panglawas Alang sa Tanan

SAMA sa panggawi, kalikopan, ug pag-atiman sa panglawas, ang atong biyolohikanhong kahulmahan makaapektar usab sa atong panglawas. Ang maong kahulmahan naimpluwensiyahan sa kaliwat ug mga sakit nga ato tingaling maugmad sa ulahi tungod sa pagkabaton ug henetikong disposisyon ngadto niana.

“Ang biyolohikanhong kahulmahan diin ikaw natawo,” matud sa usa ka propesyonal sa panglawas, “magtino sa katibuk-an kon ikaw mabuhi nga maayo, mabuhi nga dugay, o mabuhi ba.”

Sa bisan unsang paagi nga mabatonan nato kini, ang labad sa ulo, nanikig nga kaunoran, nahagong mga nerbiyos, nangagabok nga mga bukog, masakitong mga kasingkasing, ug ubang mga sakit magpahinumdom kanato matag adlaw nga ang atong panglawas madaot sa daot nga lawas ug hunahuna. Unsa ang lintunganayng hinungdan niining makaylapong mga suliran sa panglawas?

Ang Lintunganayng Hinungdan

Ang usa ka medikal nga doktor nga ginganlag Lucas nga nabuhi sa unang siglo K.P. nagtubag niining maong pangutana diha sa usa ka dinasig nga biograpiya nga iyang gisulat bahin kang Jesu-Kristo. Usa ka adlaw, misulat si Lucas, usa ka paralitiko ang gidala ngadto kang Jesus sa paglaom nga mamaayo siya. Giingnan ni Jesus ang paralitiko: “Ang imong mga sala gipasaylo na.” Unya, sa pagpakita nga siya gayod may gahom sa pagpasaylo sa mga sala, si Jesus nagsugo sa tawo: “Bangon ug alsaha ang imong gamayng higdaanan ug pauli ka ngadto sa inyo.” Gibuhat kadto sa tawo! Ingong resulta, “ang hilabihan nga kalipay mihawid sa tanan gayod” nga nakakita sa pag-ayo, ug “sila naghimaya sa Diyos.”​—Lucas 5:​17-26.

Unsang salaa ang gipasabot ni Jesus? Ang tubag motabang kanato sa pagsabot kon nganong kita masakit, matigulang, ug mamatay. Kay gipasaligan nga ang “tanang Kasulatan inspirado sa Diyos,” kita makalantaw sa Bibliya alang sa tubag. (2 Timoteo 3:​16; 2 Pedro 1:21) Kini nagtug-an kanato nga ang unang tawo, si Adan, gilalang nga may hingpit nga panglawas. Siya nakapahimulos ug lagsik nga panglawas basta siya motuman sa iyang Maglalalang.

Apan, si Adan mipili sa pagsupak sa sugo sa Diyos. Pinaagi sa pagkamasupilon ug tinuyong pagrebelde batok sa iyang Maglalalang, siya nakasala. Ingong resulta, siya nahimong dili hingpit, mataptan ug sakit, ug ngadtongadto siya namatay. Busa, ang sala mao ang hinungdan sa sakit ug kamatayon ni Adan.

Maingon nga ang pipila ka sakit gipasa gikan sa mga ginikanan ngadto sa mga anak ingong paglihok sa mga balaod sa henetiko, busa ang pagkadili-hingpit ug ang resultang mga sakit gipasa gikan kang Adan ngadto sa iyang mga kaliwat, ang tawhanong rasa. Busa, ang tanang sakit maoy resulta sa orihinal nga sala ni Adan. (Genesis 2:17; 3:​1-19; Roma 5:12) Aduna bay lutsanan?

Ang Lutsanan

Ang kausaban gikan sa hingpit nga panglawas ngadto sa dili-maayong panglawas gipahinabo sa sala​—ang pagrebelde ni Adan batok sa balaod sa Diyos. Ang kausaban gikan sa dili-maayong panglawas ngadto sa hingpit nga panglawas posible lamang pinaagi sa pagwagtang sa kasal-anan. (Roma 5:​18, 19) Sa unsang paagi? Ang laing hingpit nga tawo, ang tukmang katugbang ni Adan sa dihang siya hingpit, kinahanglang mohalad sa iyang kinabuhi ingong lukat. Ang balaod sa Diyos mao nga “ang kalag alang sa kalag,” nga mao, usa ka kinabuhi alang sa usa ka kinabuhi.​—Deuteronomio 19:21.

Apan, walay usa sa makasasalang mga kaliwat ni Adan ang makatagana sa maong lukat. Busa, si Jehova mismo mahigugmaong nagtagana sa iyang Anak, si Jesus, ingong hingpit nga tawo sa paghatag sa iyang kinabuhi ingong “usa ka lukat ilis sa daghan” aron “kita makabaton ug kinabuhi pinaagi kaniya.”​—Mateo 20:28; 1 Juan 4:9; Salmo 49:7.

Sa dinhi sa yuta, si Jesus nagpakita nga ang iyang Amahan, si Jehova, naghatag kaniya sa gahom sa pagwagtang sa mga sala sa dihang iyang giingnan ang paralitiko, “ang imong mga sala gipasaylo na,” ug ang naayo nga tawo mipauli nga naglakaw. Balikbalik gigamit ni Jesus ang iyang gahom gikan sa Diyos pinaagi sa pag-ayo dihadiha sa buta, bungol, ug daghang uban pa nga may nagkadaiyang mga balatian.

Bahin niining milagrosong pagpang-ayo ni Jesus, ang Bibliya nag-asoy: “Unya dakong mga panon sa katawhan ang nanuol kaniya, nga may uban kanilang mga tawong bakol, pungkol, buta, amang, ug daghang uban pa, ug gipamutang nila sila sa iyang tiilan, ug iyang giayo sila; mao nga ang panon sa katawhan mibati ug kahibulong sa nakita nila ang mga amang nga nagpanulti ug ang mga bakol nga nagpanglakaw ug ang mga buta nga nagpakakita.” (Mateo 15:​30, 31) Labi pa ganing kahibulongan, nakabanhaw si Jesus ug mga patay. Ang Bibliya naghisgot ug pipila niining maong mga pagpamanhaw.​—Lucas 7:​11-16; 8:​49-56; Juan 11:​14, 38-44.

Kining milagrosong mga pagpang-ayo nagpasalig kanato nga walay sakit nga dili maayo ni Jesus. Gamiton ba niya pag-usab ang hinatag-Diyos nga gahom? Makabaton ba kitag kaayohan?

Seguradong Mabatonan ang Hingpit nga Panglawas

Ang mga tagna sa Bibliya nagpakita nga si Jesus nagamando na sa langit ingong Hari sa langitnong kagamhanan sa Diyos. Ang Diyos naghatag kaniyag awtoridad sa pagwagtang sa tanang tawhanong kagamhanan nga nagalungtad karon ug sa pagmando ibabaw sa tibuok yuta. (Salmo 110:​1, 2; Daniel 2:44) Matuman unya ang pag-ampo nga gitudlo ni Jesus sa iyang mga sumusunod: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:10) Ilalom sa pagmando nianang langitnong Gingharian, bahin sa kabubut-on sa Diyos alang niining yutaa ang pagpauswag pag-ayo sa kahimtang sa panglawas sa tawhanong pamilya.

Unya, sa literal maingon man sa espirituwal nga diwa, “ang mga mata sa mga buta mangabuka, ug ang mga igdulongog sa mga bungol makadungog. Nianang panahona ang piang mokatkat sama sa lagsaw, ug ang dila sa amang mosinggit sa kalipay.” “Ug walay molupyo nga magaingon: ‘Ako masakiton.’”​—Isaias 33:24; 35:​5, 6.

Ilalom sa langitnong Gingharian sa Diyos, ang hingpit nga panglawas magkahulogan nga ang mga tawo dili na mamatay sama kanato karon. Ang Pulong sa Diyos nagasaad: “Ang tanan nga magapasundayag ug pagtuo kaniya makabaton ug kinabuhing walay-kataposan.” “Ang gasa nga ginahatag sa Diyos maoy kinabuhing walay-kataposan pinaagi ni Kristo Jesus nga atong Ginoo.” (Juan 3:16; Roma 6:23) Oo, dugay na kanhi ang dinasig nga salmo nagsaad: “Ang mga matarong mismo magapanag-iya sa yuta, ug magapuyo sila sa ibabaw niini sa walay kataposan.” (Salmo 37:29) Sama sa iyang gihimo sa dinhi pa sa yuta, si Jesus magabanhaw unya sa mga patay ug hatagan sila ug kahigayonan nga makabaton ug kaayohan gikan sa hingpit nga panglawas. Ang Bibliya nagasaad: “Aduna unyay pagkabanhaw sa mga matarong ug sa mga dili-matarong.”​—Buhat 24:15.

Ang yuta mismo mouswag ilalom sa pagmando sa Gingharian mao nga ang gutom, nga nakaamot sa dili-maayong panglawas, dili na gayod molungtad pa. Ang mga tagna sa Bibliya nagtug-an kanato: “Ang kahoy sa kapatagan magahatag sa bunga niini, ug ang yuta mismo magahatag sa abot niini, ug sila sa pagkatinuod magapuyo sa ilang yuta sa kasegurohan.” (Ezekiel 34:​27) “Ang yuta mismo magahatag gayod sa abot niini; ang Diyos, ang atong Diyos, magapanalangin kanato.” (Salmo 67:6) “Aduna unyay daghang trigo sa yuta.” (Salmo 72:16) “Ang kamingawan ug ang mamala nga yuta magmasadya, ug ang desyerto magakalipay ug mamulak sama sa saffron.”​—Isaias 35:1.

Sa pagsuma sa kahimtang nga molungtad unya sa bag-ong kalibotan sa Diyos, ang matagnaong kataposang basahon sa Bibliya nagpahayag: “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.”​—Pinadayag 21:4.

Ikaw ba moingon, ‘Lisod kanang tuohan’? Nan, hunahunaa kini. Sa wala pa si Adan nahimong makasasala, siya may hingpit nga panglawas. Hunahunaa nga posible alang sa usa ka tawo nga makigsulti kaniya niadtong panahona ug sultian siya nga usa ka adlaw niana ang yuta mapuno sa mga tawo nga may kaul-ol, masakiton, ug nagkatigulang. Wala ka ba maghunahuna nga si Adan malisdan sa pagtuo niana? Apan, mao na kana ang kamatuoran karon.

Sa balit-ad, ang hingpit nga panglawas mahimong katinuoran ilalom sa Gingharian sa Diyos. Ang Pulong ni Jehova nagpasalig kanato: “Kining mga pulonga kasaligan ug matuod.” (Pinadayag 21:5) Ang giingon sa Diyos nga mahitabo unya mahitabo tungod kay “imposible sa Diyos nga mamakak.”​—Hebreohanon 6:​18.

Unsa may imong mahimo karon aron makaseguro nga makapahimulos niining umaabot nga mga panalangin? Ang dalan ngadto sa hingpit nga panglawas ug walay-kataposang kinabuhi gitin-aw sa gisulti ni Jesus sa pag-ampo ngadto sa iyang Amahan: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Hangyoa ang mga Saksi ni Jehova alang sa libreng pagtuon sa Bibliya sa imong balay. Sila malipay sa pagtabang kanimo nga mokat-on ug dugang bahin sa kahibulongang mga saad sa Diyos. Mao kini ang imong unang lakang diha sa dalan paingon sa hingpit nga panglawas!

[Hulagway sa panid 14]

Sa bag-ong kalibotan sa Diyos, ang tanang tawo makapahimulos ug hingpit nga panglawas