Ang Hingpit ba nga Panglawas Damgo Lamang?
NASAKIT ka ba ug grabe sukad o nakaagom sa grabeng operasyon? Kon nakaagi ka na, lagmit mas naapresyar nimo karon ang kinabuhi. Apan bisan pag unsay imong pisikal nga kahimtang, nagtuo ka ba nga posible ang pagpahimulos ug hingpit nga panglawas? Morag dili kini makataronganon tungod sa pagdagsang sa makapaluyang mga balatian sama sa kanser o sakit sa kasingkasing. Sa pagkatinuod, kadaghanan kanato masakit matag karon ug unya. Bisan pa niana, ang hingpit nga kahimtang sa lawas dili damgo lamang.
Ang tawo gilalang aron magpahimulos ug ekselenteng panglawas, dili makigbisog sa sakit ug kamatayon. Busa, aron masumpo ang sakit ug kamatayon, si Jehova nagtagana ug pasikaranan alang sa hingpit nga panglawas ug walay-kataposang kinabuhi pinaagi sa halad lukat ni Kristo Jesus. “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kondili makabaton ug kinabuhing walay-kataposan.” (Juan 3:16) Kadtong mabuhi sa walay kataposan sa gisaad nga bag-ong kalibotan sa Diyos dili makigbisog sa dili-maayong panglawas o pagkatigulang. Kay ingon niana, unsay mahitabo sa mga kaluyahon?
Kahupayan Gikan sa Sakit
Ang paagi nga si Jesu-Kristo nag-ayo sa maluyahon nagtaganag sumbanan. Mao kini ang giingon bahin sa maong mga pagpang-ayo: “Nagpakakita pag-usab ang mga buta, ug ang mga bakol nagpanglakaw, ang mga sanlahon gihinloan ug ang mga bungol nagpakadungog, ug ang mga patay gipamangon, ug ang mga kabos ginapahayagan sa maayong balita.” (Mateo 11:3-5) Oo, ang tanang baldado nga miduol kang Jesus “bug-os naayo.” (Mateo 14:36) Ingong resulta, “ang panon sa katawhan mibati ug kahibulong sa nakita nila ang mga amang nga nagpanulti ug ang mga bakol nga nagpanglakaw ug ang mga buta nga nagpakakita, ug ilang gihimaya ang Diyos sa Israel.”—Mateo 15:31.
Sa pagkatinuod, bisan walay usa karong adlawa nga makapang-ayo nga sama niini, makasalig kita nga ubos sa pagmando sa Diyos ang katawhan ituboy ngadto sa kahingpitan, ayohon sa tanang sakit sa kaisipan ug lawas. Ang saad sa Diyos gisulat diha sa Pinadayag 21:3, 4: “Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang mitaliwan na.”
Handurawa ang kalibotan diin dili na kinahanglanon ang mga botika o mga ospital, pagdisdis, o terapiya! Dugang pa, sa napasig-uling Paraiso, ang depresyon ug mga balatian sa kaisipan maoy mga butang sa nangagi. Ang kinabuhi tinuod unyang makapahimuot; ug ang kalipay, usa ka permanenteng pagbati. Sa pagkatinuod, ang walay-kinutobang gahom sa Diyos magpalihok sa mga proseso sa pagbag-o sa lawas, ug ang mga benepisyo sa lukat magpapha sa makapaluyang epekto sa sala. “Walay molupyo nga moingong: ‘Ako masakiton.’”—Isaias 33:24.
Pagkakahibulongang paglaom—nga makapahimulos ug hingpit pisikal ug espirituwal nga kahimsog ubos sa Gingharian sa Diyos! Samtang mentinahon nimo ang timbang ug himsog nga estilo sa kinabuhi karon, lantaw sa unahan sa mga panalangin sa bag-ong kalibotan sa Diyos. Hinaot si Jehova ‘magatagbaw sa imong tibuok kinabuhi uban sa kon unsay maayo, ug hinaot ang imong pagkabatan-on kanunayng magabag-o sama gayod nianang sa agila’!—Salmo 103:5.