Akong Dugay, Lisod nga Pakigbisog sa Pagpangitag Matuod nga Pagtuo

Nahadlok ako kanunay nga maimpiyerno, nahibalo ako nga ako di-kaayo matarong aron mahilangit. Gibati ko nga palaran ako nga makadangat sa purgatoryo, busa ako kinasingkasing nga nag-ampo ug nagdagkot ug mga kandila aron dili malandig sa impiyerno.

SAMTANG nagdailos ug nagsagirit ang mga ligid sa akong awto diha sa nagyelong mga dalan sa lutsanan sa bukid sa Oregon, T.B.A., ako nangutana kon unsa kining problema nga akong nasudlan. Kini ang akong unang higayon nga nagmaneho sa niyebe, ug ania ako sa tunga sa bagyo nga yelo diha sa di-pamilyar nga mga dalan, nga titip kaayog mga pangpang ang matag kilid, nga halos dili makita ang unahan sa dulong sa akong awto. Nagtuo ako nga kataposan na kini, busa ako nag-ampo sa Diyos nga luwason ang akong pasahero ug ako ug nga baslan ko siya pinaagi sa pagsimba pag-usab.

Buweno, kami nakaabot sa among destinasyon, ug gituman ko ang akong panaad sa pagsimba pag-usab. Nakakita ako ug lokal nga simbahan sa Seattle pinaagi sa pagtan-aw sa direktoryo sa telepono ug misimba sa pagkasunod nga Dominggo. Naghatag kini kanako ug samang kahaw-ang sa pagbati nga gibati ko niadto. Gipasiugda sa simbahan ang mao gihapong butang nga gipasiugda sa akong simbahan niadto, kuwarta. Ang basket gipasa sa tulo ka beses! Nahinumdom ako nga misulti sa Diyos nga kinahanglan ko nga mangitag laing paagi sa pagsimba kaniya.

Sa bata pa, ako gimatuto sa usa ka estriktong Katoliko nga militaryong panimalay. Nagtungha ako sa eskuylahang Katoliko. Nahinumdom ako nga diha sa klaseng katesismo ug nangutana sa madre: “Nganong wala gayod kita mogamit sukad ug Bibliya?” Gisultihan ako nga ako huyang ug pagtuo, ug daghang higayon nga gipahibalo ang akong mga ginikanan sa akong kahuyangan.

Ako gipadako nga may kahadlok kanunay sa Diyos. Wala akoy tin-aw nga ideya bahin kaniya. Siya maoy usa ka Diyos nga takos pagasimbahon apan sakiton ka kon dili mo siya simbahon sa hustong paagi. Sa nag-17 ako, gisultihan nako ang akong mga ginikanan nga dili na ako mosimba. Gibati ko nga mas suod sa Diyos bisan asa gawas sa simbahan. Ako tiglakawlakaw sa baybayon, ug kon may nakatugaw kanako, ako kanang ipakigsulti sa Diyos. Ako nangayog pasaylo kaniya sa pagpakigsulti kaniya nga walay paggamit ug pari, nga nagpahibalo kaniya nga buot ko lang isulti kaniya kon unsa ang anaa sa akong hunahuna. Naluya usab ang akong buot tungod sa tanang butang nga akong nakita nga nagakahitabo sa kalibotan. Uso ang hippie niadtong panahona, ug nalangkit ang akong mga higala sa bisan-unsa-puwede nga sekso ug mga droga. Nakita ko ang makapasubong mga resulta sa wala kinahanglanang pagmabdos, aborsiyon, sobrang paggamit ug droga​—dili ko buot nga mahimong bahin niana!

Nagsugod ang Pagpangita

Si Becky, usa ka suod nga higala, ug ako mihukom sa pag-undang sa kolehiyo aron mangitag mas maayo pang butang. May butang gayod nga mas maayo! Mihukom kami sa pagduaw sa iyang inahan sa Washington State. Gisultihan ko ang akong mga ginikanan nga kinahanglan ko nga magpalayo, aron makalimot sa mga suliran nga nagsamok kanako. Mao kanang higayona nga nagmaneho kami diha sa nagbagyo ug yelo sa Oregon. Human migawas sa simbahan nga naglagot niana nga Dominggo sa Seattle, ako mipauli sa balay ug nakigsulti sa inahan ni Becky, si Edna, bahin sa akong gibati. Gisultihan niya ako nga may nailhan siya nga makatubag sa akong mga pangutana. Iyang gitawag ang mga Saksi ni Jehova sa Kingdom Hall.

Nahinumdom ako nga naghulat sa ilang pag-abot. Miabot kinig tulo ka adlaw. Apan sa dihang sila miabot, ako naghunahuna nga sila ang mga tawo nga Kristohanon kaayong tan-awon nga akong nakita sukad sa akong kinabuhi. Sila mao si Clarence ug Edith Meunier. Si Clarence maoy usa ka graduwado sa Watchtower Bible School of Gilead ug dayag nga batid kaayo sa Kasulatan. Ako nakadayeg dayon sa dihang gipatin-aw nila nga ang Diyos may ngalan​—si Jehova. Gibati ko nga daw usa ka suga ang gipasiga diha sa akong ulo. Ang unang pagtuon mikabat ug tulo ka oras, ug sila mibalik duha ka adlaw sa ulahi alang sa laing pagtuon.

Nalipay kaayo ako. Wala magdugay giteleponohan ko ang akong mga ginikanan ug gisultihan sila nga nakaplagan ko ang kamatuoran. Gisultihan ko sila nga ang Diyos adunay ngalan, si Jehova, ug nga ang mga Saksi ni Jehova nagtudlo sa kamatuoran sa Bibliya. Nasayod ako nga wala pa sila makadungog bahin sa mga Saksi ni Jehova ug malipay usab nga makakat-on sa akong nakat-onan. Ugaling, sila nakadungog na bahin sa mga Saksi ni Jehova ug naglagot. Sila miabot aron dalhon ako pagbalik sa California.

Sa pag-abot sa balay, ako nahibalo nga kinahanglan ko nga makigkita sa kongregasyon dihadiha. Nakit-an nako ang Kingdom Hall ug mitambong sa sunod nga tigom ug milingkod. Usa ka sister ang mitan-aw kanako ug mipahiyom, busa gihangyo ko siya kon mahimo ba niyang tun-an ako. Siya nahibulong kaayo ug dihadiha misugot. Nalipay kaayo ako nga nakabalik sa kongregasyon tungod kay ako misugod sa pagbating nahilain. Gikinahanglan ko ang panag-ubanay.​—Hebreohanon 10:​24, 25.

Nagsugod ang Paglutos sa Pamilya

Ang akong mga ginikanan supak gihapon kaayo sa akong bag-ong relihiyon ug gipadala ako ngadto sa usa ka sikyatrista. Sa dihang ang akong mga ginikanan nangayog taho, iyang gisultihan sila nga ako nagrebelde. Giingnan ko sila nga ako wala magrebelde. Mao kadto ang unang higayon sa akong kinabuhi nga akong nakaplagan ang usa ka butang nga naghatag kanako sa mga tubag, nga naghatag kanako ug katarongan nga mabuhi.

Human niini, inigtambong nako sa Kingdom Hall, ang akong mga ginikanan nasuko pag-ayo. Gisultihan nila ako nga ako makatungha sa bisan unsang kolehiyo nga buot nako, magtuon sa bisan unsang kurso nga buot ko, ug sila ang mobayad alang niana, apan sa kondisyon nga dili ako makiglabot sa mga Saksi ni Jehova. Ang nagpalisod nako niini sa paglahutay ilabina mao ang gugma ko sa akong pamilya. Sa usa ka partikular nga dili maayong adlaw giingnan ako sa akong inahan nga mas maayo pang mamampam ako kay sa mahimong usa ka Saksi ni Jehova. Ako mahimong bisan unsa, apan dili usa sa mga Saksi ni Jehova. Gipalayas ako sa akong mga ginikanan. Ang Salmo 27:10 misantop sa hunahuna: “Kon ako pagabiyaan sa akong amahan ug sa akong inahan, si Jehova mismo maoy modawat kanako.” Usa ka sister sa kongregasyon may balay nga wala puy-i, ug gipapuyo niya ako niini.

Nakahimamat akog usa ka sister sa Kingdom Hall kinsa, sama kanako, bag-ohan pa. Ang iyang ngalan mao si Chris Kemp, ug kami nahimong suod kaayong higala ug misugod sa pagpuyo sa usa ka balay. Kami gibawtismohan niadtong Hulyo 18, 1969, sa Dodger Stadium sa Los Angeles.

Sa mga tigom sa kongregasyon, among naobserbahan ang usa ka bug-os-panahong sister nga payunir, si Dana Wolff. Siya espirituwal kaayo. Nahibaloan namo nga siya nagkinahanglan ug dapit nga kapuy-an, busa kami nakabaton ug maayo kaayong kauban sa balay.

Nahinumdom ako sa akong unang bahin sa tigom. Ako may usa ka pasundayag, ug balikbalik ko kining gipraktis. Kadto maoy pasundayag sa pagtanyag ug usa ka libro, ug nasag-ulo ko kini. Apan, sa kataposang minuto, gisulat ko kini ug gibutang kini sa akong bulsa. Misaka ako sa entablado ug nablangko ang akong hunahuna. Ako miingon: “Komosta . . . Komosta . . . Komosta.” Nangomosta ako sa lima ka beses. Wala gayod akoy mahinumdoman. Busa mitan-aw ako sa tumatambong ug miingon: “Dili gayod ingon niini ang ginahimo ko sa mga tagbalay.” Unya gikuha ko ang akong gum-os nga papel sa notbok ug gibasa pulong-por-pulong ang angay nakong isulti. Sa dihang natapos ako, mibalik ako sa akong lingkoranan ug mihilak.

Ang igsoon nga mihangyo kanako sa paghatag sa pasundayag nangutana sa tumatambong: “Unsay atong makat-onan gikan niini nga pasundayag?” Ang tigomanan walay timik. Unya mitindog ako, miatubang sa tumatambong, ug miingon: “Unsa ba goy ilang makat-onan? Ako wala magkadimao! Siyempre sila wala gayoy nakat-onan!” ug mibalik ako sa paglingkod ug nagpadayon sa paghilak. Nahibalo ako nga ang akong mga bahin mas maayo na karon​—maarang-arang na.

Wala magdugay human niadto, si Dana misugod sa paghisgot nga gusto siya makakitag usa nga andam mobalhin sa dapit nga dako ang panginahanglan ug magpayunir uban kaniya. Nianang gabhiona si Chris ug ako misulod sa among lawak ug nagsultihay bahin niini. Mibalik kami sa pagkasunod adlaw ug nangutana kang Dana: “Kami diay?” Nakurat kaayo si Dana. Kami mga bag-ohan pa; dili pa kaayo dugay kami nga gibawtismohan aron mahimong mga regular payunir! Dili gayod kami ang anaa sa iyang hunahuna nga mahimong mga kauban. Hinuon siya misulat sa Watchtower Society, ug gitudlo nila kaming tulo sa Middlesborough, Kentucky.

Napakyas ang Pagsupak sa Akong Pamilya

Nag-empaki kami sa among mga butang sa paggikan sa dihang mitawag ang akong mga ginikanan sa telepono ug gisultihan ako nga dili nako mahimong mapagawas ang akong awto sa estado sa California. Sila ang migarantiya sa akong awto ug gisultihan ako nga ilang tawgon ang mga polis kon mosulay ako sa pagdala sa awto gawas sa estado. Busa mihukom kami sa pagsakay ug bus. Sa usa ka salosalo alang sa among paggikan, usa ka igsoong lalaki nga nahibalag nako sa usa ka higayon miduol ug miingon: “Nasayran ko nga utangan ka pa ug $3,000 sa imong awto.” Ako miingon ug oo. Siya miingon nga buot niyang bayran kini. Ako miingon nga dili ako makatugot nga buhaton niya kana. Siya mihimog kahikayan aron makigkita ako sa mga igsoon sa among kongregasyon. Sila miingon: “Kon buot niya, tugoti siya. Ayawg kontraha ang espiritu ni Jehova.” Busa nabayran ang awto. Naglagot kaayo ang akong mga ginikanan apan nahibulong nga adunay usa nga may mihimo niana. Migikan kami paingon sa Kentucky sa pagkasunod adlaw.

Sa dihang nakaabot kami sa Middlesborough, gihatagan kami ug apartment nga kapuy-an sa likod sa daang Kingdom Hall. Kini walay insulasyon. Tugnaw kaayo kini sa panahon sa tingtugnaw. Tugnaw gani kini bisan sa ting-init, apan nalipay kami nga nakabaton niana tungod kay dili kami makaabot sa pag-abang. Kami aduna lamay usa ka gamayng mabalhinbalhin nga pangpainit. Sa tingtugnaw kami nagsapaw ug mga sinina, bisan sa pagkatulog. Inigkabuntag usahay may hanig nga yelo ang tibuok salog, ug ang among mga medyas mamilit diha niana. Sa kasilyas may martilyo kanunay kami sa pagbuak sa yelo sa tubig sa inuduro tungod kay kini mikamig sa tibuok gabii.

Si Chris ug ako maoy bug-os panahong mga ministro sulod sa lima ka bulan pa lamang, apan kami nagdumala nag daghang maayong mga pagtuon sa Bibliya, ug makapalipay gayod ang pagkaatua didto. Nalipay kami pag-ayo nga kaming tanan may aberids nga kapin sa 150 ka oras sa usa ka bulan sa panahon niadtong unang pipila ka bulan sa pagpayunir. Si Dana gustong mahimong temporaryong espesyal payunir sa ting-init busa siya mihukom sa pag-adto sa punoang mga buhatan sa mga Saksi sa New York. Wala pa kami sukad makaadto didto, busa mihukom kami sa pagbiyahe uban kaniya. Samtang didto kami, si Dana miadto sa Service Department, ug kami miuban kaniya. Sa among kahibulong gitudlo nila kaming tulo nga mahimong mga espesyal payunir.

Wala Tumana sa Akong Amahan ang Iyang Saad, Sayop nga Nagpadapat sa Kasulatan

Sa bulan mismo nga nagsugod ako sa espesyal payunir, gipadako ni Satanas ang iyang mga paningkamot sa pagpaluya kanako. Nakadawat ako ug listahan sa mga bayranan sa bangko nga nag-ingon nga kinahanglang magsugod ako pagbayad ug $32.80 kada bulan alang sa akong edukasyon sa kolehiyo. Wala ko kini damha, kay ang akong mga ginikanan nag-ingon kanako nga bayran nila ang akong edukasyon sa kolehiyo kon padayon ako nga makakuha ug aberids nga A nga grado, nga akong nahimo. Gisulatan ko ang akong amahan ug gihangyo siya nga dili niya isipon akong usa sa mga Saksi ni Jehova niining bahina kondili isipon ako ingong iyang anak nga babaye. Gipahinumdoman ko siya sa mahigugmaong paagi bahin sa kasabotan nga among gihimo labot sa akong edukasyon, nga kon padayon nga makakuha akog mga grado nga iyang gipangayo, siya kanunay ang mobayad sa akong edukasyon. Gihangyo ko siya nga dili niya unta kini ipapas-an kanako tungod kay maglisod kaayo ako sa padayong pagbayad niini, sanglit $50 lamang ang akong madawat kada bulan, nga maoy akong gipaigoigo nga ikabuhi. Kon magbayad ako ug $32.80 mabinlan na lamang ako ug $17.20 kada bulan nga ikabuhi.

Ang akong amahan mitubag nga may teksto diha sa sulat. Siya misulat: “Sanglit kanunay ka nga mogamit ug Bibliya, unsay ikasulti mo niining tekstoha: ‘Siya nga dili buot motrabaho, ayaw usab siya pakan-a.’ Wala nimo gamita ang imong edukasyon sa mapuslanong paagi, busa bayri kini nga mga balayranan sa bangko.”​—2 Tesalonica 3:10.

Sa nadawat ko ang mubo, laktod nga mensahe, nasakit kaayo ako niini. Misakay ako sa akong kotse, miadto sa usa ka dapit nga nag-inusara, ug mihilak tungod kay wala ako masayod kon unsay buhaton. Unya mihunong ako sa paghilak ug nasuko. Nasabtan ko nga dili ang akong mga ginikanan ang nagbatok kanako kondili si Satanas. Misinggit ako kang Satanas nga magpalayo gikan kanako, nga siya dili makadaog, nga siya dili molampos sa pagpahunong kanako sa pagpayunir.

Daghang Kalisod, Daghang Panalangin

Ako nakabaton ug dili bug-os panahong trabaho nga 20 oras sa usa ka semana​—11 oras sa usa ka adlaw ug 9 sa sunod nga adlaw​—ug ako nagpadayon sa espesyal nga pagpayunir. Nakakat-on ako dayon sa pagpahimulos sa mga tindahan nga namaligyag baratilyo. Ang akong sinina sa tingtugnaw maoy upat ka sayal sa usa ka dolyar. Ang akong coat sa tingtugnaw maoy $1.50. Naglampaso akog mga salog aron makapalit ug usa ka paris nga botas nga tag $20. Kaming tanan naningkamot. Aron makatigom ug kuwarta, ako nagbukas ug kuwenta sa bangko. Usahay ideposito nako ang 25 cents ug unya kuhaon kini aron ipalit ug gasolina. Nagtuo ako nga naglagot ang teler sa bangko inigkakita kanako nga mosulod. Sa ngadtongadto gisira nila ang akong kuwenta sa bangko​—kanunay kining gamay ra kaayog sulod nga kuwarta. Ako mosulod sa gasolinahan ug magpatobil ug 25 cents nga kantidad sa gasolina. Nagtuo ako nga nanghupaw ang tigtobil matag hunong nako. Dihay mga panahon nga kami wala gayoy ikapalit ug gasolina. Daghang higayong mosakay kami sa awto, bisag nasayod nga hapit nang mahurot ang among gasolina apan nahibalo usab nga may pagtuon sa Bibliya kami nga adtoan. Usahay kon moadto kami sa buhatan sa koreyo, diha sa among sulat kami makakitag usa ka dolyar gikan sa usa ka tawo​—nga igo rang nakatabang kanamo. Sa tunga niining mga kalisod, nakita namo ang kamot ni Jehova diha sa among kinabuhi. Kadto makapatandog kaayo.

Nakahinumdom ako nga nangolektag linabayng mga botelya aron pabayloan kinig kuwarta aron ikapalit ug mga selyo sa mga sulat. Nag-ipon ako sulod sa tulo ka bulan aron may ikapalit ug usa ka parisang sapatos nga tag $8. Unya ang personal kaayo nga butang nahitabo kanako. Duha na lamang gayod ka buok ang akong panti. Miampo ako kang Jehova ug gisultihan siya nga gibati nako nga dili gayod kini angayang iampo apan wala ko masayod kon unsay angay nakong himoon. Duha ka semana sa ulahi, ako nakadawat ug kahon nga may 17 ka panti, usa ka half slip, usa ka blusa, ug ubang mga butang! Ang tanan gikan sa usa ka kaila nga wala na ako makadungog sulod sa usa ka tuig.

Usa sa pangunang mga suliran sa dapit mao ang pagnegosyog kontrabandong ilimnon nga makahubog. Tungod sa ilang ilegal nga mga buhat, ang mga tawo sa pipila ka teritoryo makiparyente kaayo ug madudahon sa mga estranghero. Bisan pa niana, daghan akog mga pagtuon sa Bibliya, ug sa ulahi ako nakagugol sa pag-alagad sa kanataran ug mga 25 ka oras sa usa ka semana nga nag-inusara lamang. Wala ko sukad mabati nga mas nasuod kang Jehova sa maong panahon tungod kay ako bug-os nga misalig kaniya. Imong makat-onan nga dili ang mga butang nga imong nabatonan kondili ang imong relasyon kang Jehova ang bililhon. Imong makat-onan nga ang materyal nga mga butang dili makapalipay kanimo; si Jehova ang maghimo kanimong malipayon.​—Lucas 12:15.

Nakabaton Ako ug Bag-ong Mahigugmaong Pamilya

Sa bulan mismo nga nakatapos ako sa pagbayad sa akong utang sa akong edukasyon sa kolehiyo mao ang bulan nga nahimamat ko ang akong umaabot nga bana ug labing suod nga higala, si Jeff Malone. Siya nag-alagad sa Bethel, ug usa ka tuig sa ulahi kami nagminyo. Sa giminyoan ko si Jeff, ako wala lamang maminyo kaniya kondili nakabaton sa iyang inahan, igsoong babaye, ug tiyo, nga gihigugma ko pag-ayo. Ang among paghigugma kang Jehova maoy nagpahiusa kanamo nga labaw sa bisan unsang bugkos. Si Jeff ug ako giasayn sa Union City, Tennessee, ingong mga espesyal payunir. Upat ka bulan lamang kami didto sa dihang kami miaplay sa Bethel ug gidawat.

Mibiya kami sa Bethel niadtong 1980, ug ang among anak nga babaye, si Megan, natawo sa hinapos nianang tuiga. Ang among anak nga lalaki, si J. T., natawo niadtong 1983. Si Jeff ug ako sa pagkakaron pulos nag-alagad ingong mga regular payunir sa Forest Hill Congregation sa Fort Worth, Texas.

Mihukom kami nga buhaton namo ang tanan kutob sa mahimo sa pagpadako sa among mga anak sa paghigugma kang Jehova. Bisag si Jeff nag-alagad ingong ansiano, iyang ginauna kanunay ang espirituwal nga intereses sa among pamilya. Among gisunod ang mga sugyot sa Sosyedad bahin sa regular nga pagtambong sa mga tigom, pagbasa sa mga bata, pagpakigbahin sa pag-alagad sa kanataran, paghisgot sa inadlaw nga teksto, ug pagboluntaryo sa mga proyekto sa pagpanukod sa Kingdom Hall. Kaming duha sagad nagagugol ug kapin sa usa ka oras sa pagpatulog sa mga bata​—kantahan sila, basahan sila ug mga sugilanon sa Bibliya, moampo uban sa matag usa kanila. Ang among tumong sa pamilya mao nga kaming tanan makasulod sa bug-os panahong pag-alagad. Usa ka butang nga bug-os namong gipaningkamotan latas sa katuigan​—magkauban ingong usa ka pamilya, magbuhat sa mga butang ingong usa ka pamilya, sa pagtrabaho ug sa pagdula.

Sa magtan-aw ug balik, ako makapamatuod nga husto kaayo ang pagkapahayag ni David sa dihang siya miingon: “Unsa man ang akong ikabalos kang Jehova tungod sa tanan niyang mga kaayo kanako?” (Salmo 116:12) Walay bisan unsa nga nahimo si Satanas nga dili arang masanta ni Jehova. Ako adunay suod, mahigugmaong pamilya uban kang Jeff ug Megan ug J. T., ang tanan nahiusa sa pag-alagad kang Jehova; ug dugang pa niana, ako nakabatog kahibulongan tibuok-yutang pamilya tungod sa pagkahimong bahin sa organisasyon ni Jehova. Kini maoy usa ka butang nga ako mapasalamaton gayod kanunay.​—Sumala sa giasoy ni Karen Malone.

[Hulagway sa panid 23]

Si Karen uban sa iyang bana ug duha ka anak