Ngadto sa mga Dalunggan sa Usa ka Batang Gamay
USA ka adlaw, sa bata pa ako, usa ka lalaki ang miduaw sa among balay sa Coeburn, Virginia, T.B.A., ug samtang nakigsulti siya sa akong amahan, ang iyang kauban nakigsulti kanako aron malingaw ako. Gilarawan sa iyang mga pulong ang usa ka paraisong yuta, diin ako makadula sa ihalas nga mga mananap nga dili mangunsa kanako. (Isaias 11:6-9) Siya miingon nga dili kinahanglang mamatay pa ako apan mahimong mabuhi sa walay kataposan dinhi mismo sa yuta. Ang umaabot daw maanindot kaayong paminawon! Ang gisulti sa tawo bahin sa pagkinabuhi sa yuta midulot pag-ayo kanako.—Isaias 25:8; Pinadayag 21:3, 4.
Relihiyosong Pangandoy
Ang akong mga ginikanan, kinsa daghag problema sa kaminyoon, nagdiborsiyo sa pipila ka tuig sa ulahi, ug ako nagpuyo uban kang Mama. Siya wala gayoy interes sa relihiyon. Busa nag-inusara akong moadto sa Sunday school sa bisan unsang simbahan nga malakaw duol sa among balay. Wala magdugay nagminyo pag-usab si Mama, ug kami mibalhin uban sa akong ama-ama ngadto sa Indiana. Apan, matag ting-init mopauli ako sa Virginia aron sa pagduaw sa akong amahan.
Nahimong Mormon si Papa wala madugay human sa diborsiyo, ug gisulayan niya ang pagpasilsil sa iyang bag-ong nakaplagang relihiyon kanako. Sa ting-init sa 1960, sa otso pa ako, gibawtismohan niya ako. Bisan pa, sa dihang didto ako sa Indiana, misimba ako sa bisan unsang simbahan nga duol sa balay. Kining tanan nagtudlo nga kon kami buotan, mangadto kami sa langit ug kon kami maldita, mangadto kami sa impiyerno diin kami pagasakiton. Sanglit wala ako magtuo nga adunay makasabot sa akong mga pagbati nga gustong mabuhi dinhi sa yuta imbes sa langit, wala gayod akoy gisultihan bisan usa mahitungod niini.
Sa dihang nag-11 anyos ako, mibalhin si Papa sa Oregon. Naguol ako ug nasuko kaayo. Usa ka ateyista ang akong ama-ama ug alkoholiko, ug gilisodlisod niya ako tungod sa akong pagtuo. Ginganlan niya ako nga gamayng Miss Relihiyosa, ug kon mosugod ako sa paghilak, siya moingon: “Nganong dili man nimo tawgon ang imong Diyos sa pagtabang kanimo?” Walay usa diha sa balay ang daw nagtagad bahin sa Diyos. Kadto maoy mangiob, malisod nga katuigan. Ako dinagmalan sa pisikal, sa binaba, ug sa seksuwal. Nahupayan ako sa pagpakigsulti sa Diyos tungod kay sa daghang higayong bation ko nga siya lamang ang bugtong nagatagad kanako.
Gibiyaan ni Mama ang akong ama-ama, ug nahunong ang pag-abuso. Bisan pa, pobre kaayo kami, ug naglisod si Mama sa pagpangitag pangabuhian. Sa nag-13 ako, mibalik kami sa Virginia sa pagduaw sa akong iyaan. Siya maluloton, sinserong Baptist nga babaye. Gihigugma ko siya pag-ayo. Sa dihang ako iyang gihangyo sa pag-uban kaniya sa simbahan, misugot ako. Si Mama miuban pa gani, ug nahinumdom ako nga pagkamalipayon gayod nga ako nakauban sa akong pamilya didto. Sa natapos ang among pagduaw, nahadlok akong mopauli sa balay. Nahadlok ako nga kon ako mopauli, malangkit ako sa imoralidad. Busa gihangyo ko ang akong iyaan nga mopuyo ako uban kaniya, ug misugot si Mama nga ako magpabilin.
Gipalitan ako sa akong iyaan ug King James nga bersiyon sa Bibliya. Magarbohon kaayo ako niana ug mobasa sa bahin niana matag gabii. Nabasahan nako sa kataposang kapitulo sa Bibliya nga “kon may tawo nga magdugang ngadto niining mga butanga, idugang sa Diyos kaniya ang mga hampak nga nahisulat niining basahona.” (Pinadayag 22:18, 19, King James Version) Busa ako nangatarongan, “Unsaon ko sa pagtuo nga ang Basahon sa Mormon maoy bahin sa balaang Kasulatan?” Busa, mihukom ako sa pagkahimong Baptist.
Bisan tuod ug nahibalo ako nga natugaw si Papa sa dihang gisulatan ko siya ug gisultihan sa akong desisyon, ang iyang komento lamang mao nga siya nalipay nga ako nagsimba. Kanunay akong mouban sa among ministro nga Baptist sa mga balay sa mga tawo sa pagdapit kanila sa among mga miting nga ginahimo diha sa tolda. Gibati ko nga gihimo ko ang kabubut-on sa Diyos pinaagi sa pagduaw sa mga tawo diha sa ilang mga balay ug sa pagpakigsulti kanila sama sa gihimo ni Jesus.
Bisan pa niana, anaa gihapon kanako ang tinguha nga mabuhi diha sa usa ka yutan-ong paraiso imbes sa langit. Apan unya nabasa nako ang mosunod nga teksto sa Bibliya, ug kini naghatag kanako ug paglaom: “Pangayo, ug igahatag kini kaninyo; pangita, ug kamo makakaplag; panuktok, ug pagabuksan kini kaninyo: kay ang matag usa nga nagapangayo magadawat; ug ang matag usa nga nagapangita makakaplag; ug ngadto sa matag usa nga nagapanuktok kini pagabuksan.”—Mateo 7:7, 8, KJ.
Kaminyoon ug Pamilya
Sa pagkasunod tuig mibalhin ako ug puyo uban kang Mama sa Indiana. Sa 15 pa lang ang akong edad, naminyo ako, nagmabdos, ug nagpaingon sakay ug bus ngadto sa habagatang California. Wala kaayo ako makaila sa pamilya sa akong bana, apan buot ko nga ila akong dawaton. Sila mga Pentekostal, ug gisultihan ako sa igsoong babaye sa akong bana bahin sa gasa sa pagsultig mga pinulongan. Busa sa miuban ako kanila sa ilang serbisyo sa pag-ampo usa ka gabii, ako miampo nga tugotan ako sa pagsultig mga pinulongan.
Sa kalit, diha sa serbisyo usa ka katingalahang pagbati midaog kanako. Misugod sa pagpangurog ang akong tibuok nga kalawasan, ug ang akong dila misugod sa pagsulti nga dili-mapugngan. Ang magwawali misinggit nga ang espiritu mikunsad pinaagi kanako, ug iyang gipikpik ang akong bukobuko. Human niana, gigakos ako sa tanan ug gisultihan ako nga pagkalalim nga gigamit ako sa Diyos niining paagiha. Apan naglibog ako ug nahadlok. Wala gayod akoy ideya kon unsay akong gisulti.
Wala magdugay human niadto, dihay mga komplikasyon sa dihang nagbati ako sa among unang anak. Gisultihan sa pastor sa simbahan ang akong bana nga gipasamot sa Diyos ang sakit sa akong pagbati tungod kay siya dili man usa ka Kristohanon. Miduol ang akong bana kanako nga nagluha ang iyang mga mata ug miingon nga kon ako nagtuo nga kini makatabang, magpabawtismo siya. Gisultihan nako siya nga segurado ako nga dili manghulga ug bayad ang Diyos sa mga tawo aron moalagad kaniya.
Mibulag sa Simbahan
Usa ka Dominggo, human sa iyang wali, ang pastor nangayog amot sa kongregasyon. Ang simbahan kinahanglang ayohon tungod sa kadaot nga gipahinabo sa dili pa dugayng linog. Sa dihang gipasa ang plato sa koleksiyon, gibutang nako ang akong tanang kuwarta. Human sa pag-ihap sa kuwarta, ang pastor, imbes pasalamatan ang kongregasyon, nanambag kanila sa pagbukas sa ilang mga bulsa ug sa ilang mga kasingkasing niining takos nga kawsa. Unya iyang gipasa pag-usab ang plato. Wala na akoy kuwarta, busa sa dakong kaulaw dalidali nakong gipasa ang plato. Dalidali nga giihap pag-usab sa pastor ang kuwarta ug, sa makausa pa sa walay popasalamat kanila, miingon nga dili pa kadto igo. “Wala gayoy usa ang makagawas hangtod makuha nato ang kuwarta nga gikinahanglan sa paghimo sa buluhaton sa Diyos,” siya miingon.
Ang akong bana naghulat sa gawas, ug ako nahibalo nga siya gilaayan na. Dili lang siya ra. Nawad-an akog pailob sa pagkaingrato sa pastor. Busa uban sa akong anak diha sa akong mga bukton ug sa mga luha nga midagayday sa akong nawong, milakaw ako gawas sa simbahan sa atubangan sa tanan. Nanumpa ako niadtong higayona nga dili na gayod ako makiglangkit pa ug simbahan. Bisan pag mihunong na ako sa pag-adto sa simbahan, wala ako mohunong sa pagtuo sa Diyos. Nagabasa gihapon ako sa akong Bibliya ug naningkamot nga mahimong usa ka maayong asawa.
Nakakat-on sa Kamatuoran sa Bibliya
Human natawo ang among ikaduhang anak, gipakigsultihan sa among mga higala nga mobalhinay sa Texas ang tag-iya sa yuta nga ilang ipaabang kanamo ang ilang balay nga ilang gipuy-an. Samtang talilakaw na ang akong higalang si Pat, siya miingon nga may babaye nga nakautang kaniya ug kuwarta ug moagi nga magdala niini. Gihangyo ako ni Pat sa pagpadala niini sa koreyo ngadto kaniya sa Texas. Sa milabay ang pipila ka adlaw, duha ka babaye nanuktok sa pultahan. Naghunahuna nga sila atua didto nga dala ang kuwarta, gidapit ko dayon sila sa pagsulod. Miingon ako nga si Pat mibalhin na apan gitugon niya ako nga sila mohapit. “Aw, pagkamaayo ni Pat,” miingon si Charlene Perrin, nga usa sa mga babaye. “Nalipay kaayo kami sa pagtuon uban kaniya.”
“Unsa?” nangutana ako. “Pagtuon? Nasayop tingali kamo.” Si Charlene miingon nga sila nakasugod ug pagtuon sa Bibliya uban kang Pat. Sa pagkahibalo nga mibalhin na si Pat, gipangutana ako ni Charlene kon gusto ba akong magtuon sa Bibliya. “Oo,” masaligon akong mitubag. “Tudloan ko kamo ug bisan unsang butang nga gusto ninyong mahibaloan.” Magarbohon ako sa nahimo nako nga pagbasa sa Bibliya, ug nagtuo ako nga madasig ko sila.
Gipakitaan ako ni Charlene sa librong Ang Kamatuoran nga Motultol sa Kinabuhing Dayon, ug among gibasa ang Salmo 37:9: “Ang mga mamumuhat ug daotan pagaputlon, apan kadtong nagalaom kang Jehova mao ang magapanunod sa yuta.” Nakurat ako. Didto, sa akong kaugalingong Bibliya, kini nag-ingon nga ang mga tawo magapanunod sa yuta. Human niadto, daghang pangutana ang nanggawas, dihadiha. Si Charlene mipahiyom ug miingon: “Oy, hinayhinay! Usa-usahon natog tubag ang imong mga pangutana.” Iyang gisaysay ang panginahanglan ug regular, sistematikong pagtuon sa Bibliya. Dihadiha, iya akong gidapit sa Kingdom Hall, ang ngalan sa tigomanan sa mga Saksi ni Jehova.
Gisultihan nako si Charlene bahin sa akong eksperyensiya labot sa plato sa koleksiyon ug nga dili na ako gustong moadto pag balik sa simbahan. Iyang gipakita ang Mateo 10:8 kanako, nga nag-ingon: “Nakadawat kamo nga walay bayad, panghatag nga walay bayad.” Iyang gipatin-aw nga walay plato sa koleksiyon ang ginapasa sa mga tigom sa mga Saksi ni Jehova ug nga ang tanang donasyon kinabubut-on. Siya miingon usab nga adunay kahon alang sa kontribusyon diha sa tigomanan ug nga ang mga tawo nga gustong mohatag makabutang sa mga amot diha niana. Mihukom ako sa paghatag ug higayon makausa pa sa relihiyon.
Samtang ako nagtuon, nakat-onan ko kon nganong lain ang akong gibati sa dihang nagsulti ako ug mga pinulongan sa simbahan sa Pentekostal. Ang gasa sa Diyos sa pagsultig nagkalainlaing mga pinulongan gihatag sa unang mga Kristohanon aron sa pagpamatuod nga sila nakabaton sa iyang balaang espiritu. Kining milagrosong gasa usab nagsilbing praktikal nga katuyoan aron mabatonan ang mga kamatuoran sa Bibliya ngadto sa mga tawo sa nagkalainlaing kayutaan nga gitigom sa Pentekostes 33 K.P. (Buhat 2:5-11) Apan, ang Bibliya nag-ingon nga ang gasa sa Diyos sa pagsultig mga pinulongan mohunong, nga dayag nga natapos sa nangamatay ang mga apostoles. (1 Corinto 13:8) Apan aron mabutaan ang mga hunahuna sa mga tawo, si Satanas ug ang iyang mga demonyo nagpahinabo sa uban sa pagsulti nga dili-masabtan, sa usa ka paagi nga nagpatuo sa daghan nga kini sila nakabaton sa balaang espiritu sa Diyos.—2 Corinto 4:4.
Pagsupak sa Pamilya
Wala magdugay, nasabtan nako ang katuyoan sa Diyos alang sa yuta ug nga kinahanglang dili ako mahimong bahin sa daotang kalibotan. (Juan 17:16; 18:36) Nakat-onan usab nako nga kinahanglang taposon nako ang tanang pagpakiglangkit sa Dakong Babilonya, nga mao ang simbolo nga gigamit sa Bibliya alang sa kalibotang imperyo sa bakak nga relihiyon. (Pinadayag 18:2, 4) Sa dihang gisultihan nako si Papa nga magpabawtismo ako, niining higayona ingong usa sa mga Saksi ni Jehova, siya nahugno. Iya akong gihangyo nga dili magpahimong Saksi. Unang higayon kadto sukad nga nakita ko siya nga mihilak. Naghinilakay kaming duha, kay dili ko gustong masakitan siya. Apan nahibalo ako nga nakaplagan ko ang kamatuoran ug nga dili gayod ako makatalikod kang Jehova.
Supak ang tibuok ko nga pamilya nga mahimo akong usa sa mga Saksi ni Jehova. Sa makadiyot mihunong ako sa pagtambong sa mga tigom. Nakahupay kini sa pagsupak sa mga membro sa pamilya, apan miserable kaayo ako. Nahibalo ako nga dili gayod ako magmalinawon hangtod buhaton ko ang kabubut-on ni Jehova. Sa akong oras sa paniudto sa usa ka adlaw niana, mihapit ako sa balay ni Charlene ug gisultihan siya nga kinahanglang magpabawtismo ako. “Dili ba maayo nga magsugod ka una sa pagbalik ug tambong sa mga tigom?” siya nangutana. Gisultihan nako siya nga determinado ako niining higayona ug walay makaulang tali kanako ug kang Jehova. Gibawtismohan ako sa Septiyembre 19, 1973.
Kapin na kana sa 23 ka tuig karon. Sa mapasalamaton, ang akong pamilya sukad niadto nagtahod sa akong desisyon, ug walay usa kanila ang nagpugos kanako sa pagbiya sa kamatuoran, nga giapresyar ko pag-ayo. Apan, ang akong kamagulangang anak nga babaye, si Kim, mao lamang ang usa nga nahimong Saksi. Ang iyang maunongong pag-alagad kang Jehova naghatag ug dakong tuboran sa pagdasig kanako sa daghang katuigan.
Usa ka Halandomong Panagkita
Sa 1990, sa dihang mibalik ako sa Coeburn, Virginia, sa pagbisita, akong gihangyo si Mama sa paghunong sa Kingdom Hall aron akong masusi kon unsang orasa magsugod ang mga tigom sa Dominggo. Samtang misulod kami sa lagwerta, siya miingon nga nagpuyo kami niadto sa usa ka balay sa likod sa tigomanan, sa tabok sa riles sa tren. Ang balay dugay nang nasunog, ug ang tisa nga panghaw na lamang ang nagbarog. “Gamay ka pa niadto,” siya miingon, “nga wala pay tres o kuwatro ang edad.”
Sa Dominggo mainit nga giabiabi ako sa Kingdom Hall. Sa nakig-estorya ako kang Stafford Jordan, wala lang sa buot nga nahisgotan ko nga sa bata pa nagpuyo ako sa balay nga nagbarog sa likod sa Kingdom Hall. Gitan-aw niya ako ug maayo. “Nahinumdoman na ti ka!” siya miingon. “Ikaw kadtong batang gamay nga bughawon ug buhok nga ingon niini katas-a [nagsukod siya pinaagi sa iyang kamot]. Nagsangyaw kami niining teritoryoha sa dihang ang akong kauban nakigsulti sa imong amahan. Naningkamot ako sa paglingaw kanimo pinaagi sa pagpakigsulti kanimo bahin sa Paraiso.”
Wala ako makatingog. Ang akong tingog morag natuk-an sa nagsaysay ako kaniya bahin sa akong pagpangita sa kamatuoran sa Bibliya. “Sa bata pa ako, imong gitanom ang mga binhi sa kamatuoran diha sa akong gamayng kasingkasing!” matod ko. Unya iya akong gisultihan nga ako adunay paryente sa bahin sa akong apohan, si Stephen Dingus, nga nahimong usa ka matinumanong Saksi. Ang pamilya wala gayod maghisgot bahin kaniya, kay supak kaayo sila. “Magarbohon gayod unta siya kaayo kanimo! miingon si Igsoong Jordan.
Sa maghandom ako ug balik sa akong katuigan sa organisasyon ni Jehova, mapasalamaton gayod ako kaayo sa gugma ug kalulot nga gipakita kanako. Oo, may mga panahon gihapon nga samtang anaa ako sa Kingdom Hall nga makakitag mga pamilya nga nagkahiusang nag-alagad kang Jehova mopabati kanakog diyutayng kaguol, kay kasagaran atua ako didto nga nag-inusara. Apan hinumdoman dayon nako nga nagauban si Jehova kanako. Siya kanunayng nagabantay, ug sa dihang ang akong kasingkasing makadumala na sa kamatuoran nga gisulti ngadto sa mga dalunggan sa batang gamay sa daghan na kaayong tuig nga milabay, iyang gitugotan kini sa pagpanalingsing ug sa pagpamulak.
“Salamat, Igsoong Jordan,” matod ko, “sa paghatag ug panahon sa pagsulti bahin sa Paraiso diha sa usa ka lihokan nga batang gamay!”—Sumala sa giasoy ni Louise Lawson.
[Hulagway sa panid 13]
Uban kang Stafford Jordan sa nagkita kami pag-usab sa 1990