Gikan sa Among mga Magbabasa
Menopos Salamat gikan sa kailadman sa akong kasingkasing alang sa seryal nga “Usa ka Mas Maayong Pagsabot sa Menopos.” (Pebrero 22, 1995) Ako 43 anyos, ug kamo naghatag kanakog makapatagbawng mga tubag sa akong mga pangutana. Duha ka babaye nga nagtrabaho uban kanako nangayog mga kopya, apan gipahulam ko na lang sila sa akong personal nga kopya. Nahutdan ang among kongregasyon niini!
M. H. S., Brazil
Ang mga artikulo nagbukas sa akong hunahuna ug kasingkasing aron masabtan ang matang sa kausaban nga ginaagoman sa akong inahan. Naglaom ako nga ako makapadayon sa pagsabot niini nga kausaban sa iyang kinabuhi ug mahimong mas matinabangon.
A. K., Tinipong Bansa
Ako 47 anyos, ug hangtod nga nadawat nako kanang isyuha sa Pagmata!, ako walay nasabtan bahin niining ulohana, bisan human nga nagpakonsulta sa mga doktor. Kamo nakatabang kanako sa pagsabot nga kini nga mga kausaban maoy kinaiyanhon. Andam na ako karon nga mosagubang sa mga problema.
E. M., Sierra Leone
Bag-o pa ako nga mitambong sa tulo-ka-oras nga seminar bahin niini nga ulohan. Gihikay kadto sa mga departamento sa edukasyon sa duha ka dagkong mga ospital. Impormatibo kaayo ang programa, apan ako daghag nakat-onan sulod sa 30 minutos nga pagbasa sa Pagmata! kay sa akong nakat-onan sa tulo-ka-oras nga seminar.
J. B., Tinipong Bansa
Nawalang mga Artikulo? Ako 11-anyos nga batang babaye. Nakita nako nga wala na kamo magpatik sa seryal nga “Mga Batan-on Nangutana . . .” Ngano man? Nalingaw gayod ako nianang lindoga. Ang ubang mga pangutana aplikado kanako, ug ganahan gayod akong mobasa niana! Kini maoy una nakong paklion inigkadawat nako sa Pagmata! Segurado ako nga ang ubang mga batan-on samag pagbati. Magpatik pa ba kamo nianang lindoga sa umaabot?
E. K., Tinipong Bansa
Ang “Mga Batan-on Nangutana . . .” padayon nga ginapatik kas-a sa usa ka bulan. Kini makita diha sa isyu nga penetsahan ug 22 sa matag bulan. Sukad ang seryal nagsugod sa 1982, kapin sa 300 ka artikulo ang napatik niini nga mga seryal. Gidasig namo ang among batan-ong mga magbabasa sa pagtan-awg balik sa uban niining karaang mga artikulo. Apan, makasalig kamo sa among padayon nga interes sa mga problema sa mga batan-on.—ED.
Inkwisisyon Diha sa inyong artikulong “Ang Inkwisisyon sa Mexico—Sa Unsang Paagi Kini Nahitabo?” (Oktubre 8, 1994), naghisgot kamo “sa hari sa mga Aztec, nga si Netzahualcóyotl.” Ugaling, si Netzahualcóyotl dili hari sa mga Aztec kondili hari sa mga Chichimec.
E. R. C. L., Mexico
Sa pagkatinuod si Netzahualcóyotl maoy usa ka Chichimecan, dili Aztec. Makaiikag, hinunoa, ang ubang reperensiya nga mga basahon, sama sa “Nueva Enciclopedia Cultural IEPSA,” naghisgot kaniya ingong “hari sa mga Aztec.” Ingon sa gibatbat sa librong “Historia de México,” si Netzahualcóyotl nagmando “nga kaabin sa mga Aztec,” nga nagmando na sa katawhang Chichimecan.—ED.
“Mausikon” nga mga Batan-on Dili ako makasugod sa pagpahayag kaninyo sa espirituwal nga pagpalig-on nga akong nadawat sa pagbasa sa artikulong “Mga Batan-on Nangutana . . . Unsaon Nako Pagtul-id sa Akong Kinabuhi?” (Enero 8, 1995) Kini naghatag kanakog kaisog sa pag-ampo kang Jehova ug sa pagpangayo sa iyang pasaylo sa mga sala nga akong nahimo sa nangagi. Sa wala pa basaha kining artikuloha, adlaw ug gabii nasubo ang akong kasingkasing niining mga salaa. Daghang gabii nga mohigda ako sa katre ug mobating ang pagtubok mao lamang ang bugtong tubag. Nahibalo na ako karon nga ang mga prinsipyo ni Jehova maoy alang sa atong kaayohan, ug mokat-on ako gikan sa akong nangaging kasaypanan.
Q. B., Tinipong Bansa
Ingong usa ka batan-on, mibiya ako kang Jehova ug sa iyang organisasyon. Bisan tuod ako nakabalik na karon sulod sa halos lima ka tuig, bation ko usahay nga dili gayod ako bug-os pasayloon ni Jehova. Karon ako nasayod nga ako sayop; ang halalom, nagasamok nga pagbati sa pagduhaduha sa sulod nawala sa kataposan.
R. D., Trinidad