Gikan sa Among mga Magbabasa
Nawalang mga Bata Pagkahuman nakog basa sa serye sa mga artikulong “Nawalang mga Bata—Kanus-a ba Matapos ang Trahedya?” (Pebrero 8, 1995), ang mga luha nanaligdig sa akong aping. Ang pipila sa mga kasinatian nga giasoy sa artikulo maoy susama sa akoa. Nagpasalamat ako kang Jehova sa paghatag kanako sa kusog nga molahutay. Pinaagi sa iyang Pulong nabatonan nako ang paglaom sa paraiso diin ang mga tawo dili na mag-antos sa maong mga kadaotan.
T. O., Brazil
Hapon nga Binilanggo Nadasig ako sa pagbasa sa artikulong “Ang Akong Amahan ‘Gipagula sa Bomba Atomika Gikan sa Bilanggoan.’” (Oktubre 8, 1994) Bag-o pa lang akong nabawtismohan ingong usa ka Kristohanon, ug subsob akong nahibulong kon mahuptan ko ba ang akong integridad ilalom sa pagsulay. Samtang gibasa nako ang bahin sa samag-bato nga pagtuo ni Brader Katsuo Miura, natandog pag-ayo ang akong galamhan. Kini nakatabang kanako sa pagkaamgo kon unsay nakulang sa akong kaugalingong pagtuo—nga kinahanglang himoon nako si Jehova nga Diyos ingong tuboran sa akong pagsalig.
K. T., Hapon
Genetika Ginahisgotan namo sa tunghaan ang balaod sa genetika. Busa gipahimuslan nako ang higayon nga isukip ang magasin bahin sa ulohang “Genetika sa Tawo—Kon sa Unsang Paagi Ikaw Nahimong ‘Ikaw’” (Marso 22, 1995) sa akong libro sa mga sinulat. Ang among magtutudlo sa siyensiya nag-analisar sa artikulo uban kanako. Giingnan ko niya nga bisan tuod siya usa ka biyologo ug nagtuon ug DNA sulod sa katuigan, nakadayeg siya sa pagkamatugkaron sa impormasyon.
P. N., Italya
Ang mga artikulo nagpakita kon sa unsang paagi ang usa ka komplikadong ulohan ikasaysay sa mga terminong masabtan. Nakatabang kini kanako nga labi pang nakasabot sa materyal nga akong gitun-an sa klase sa biyolohiya. Bisan pa niana, dili nako magamit ang mga kinutlo diha sa artikulo, sanglit wala ninyo ihatag ang impormasyon bahin sa reperensiya sama sa awtor ug magpapatik.
M. G., Alemanya
Tungod sa kakulang sa luna, kasagaran dili namo ipatik ang lista sa sekular nga mga reperensiya sama sa subsob nga gibuhat sa teknikal ug siyentipikanhong mga basahon. Sanglit ang “Pagmata!” gisulat alang sa masa, dili lamang alang sa mga propesyonal, among gibati nga ang maong bibliyograpikong impormasyon makapainteres sa diyutay lamang nga mga magbabasa.—ED.
Homoseksuwalidad Nag-alagad ako ingong ministeryal nga alagad ug usa ka payunir, usa ka bug-os-panahong magwawali. Ang “Mga Batan-on Nangutana . . .” nga mga artikulo bahin sa homoseksuwalidad daw gisulat alang kanako! (Pebrero 8, Pebrero 22, ug Marso 22, 1995) Sa sayo ug tungatunga sa akong pagkatin-edyer, akong gisuhid ang homoseksuwalidad. Mihunong ako, apan sukad niadto nalisdan ako sa pagpakigbugno niining mga pagbatia. Hinunoa, ginamit kining mga artikuloha, sa kataposan nasabtan nako ang akong mga pagbati, ug nakadawat ako ug tabang sa pagpadayon sa pagpakigbugno!
Ngalan gitago, Denmark
May homoseksuwal ako nga mga pagbati sukad sa pagkabayongbayong. Gimatuto ako ingong usa ka Kristohanon, busa kining mga pagbatia nakapalibog kaayo kanako. Tungod kay gibati ko ang hilabihang kaulaw ug kalibog, dili ako makasugilon kang bisan kinsa, bisan gani sa akong kaugalingong mga ginikanan. Naminyo ako karon sa usa ka maanyag nga babaye, apan aduna gihapon akoy daotang mga tinguha matag karon ug unya. Sa kataposan, akong gisuginlan ang akong asawa sa akong sekreto, ug gidasig niya ako nga makigsulti sa mga ansiano sa kongregasyon. Masinabuton kaayo sila ug mapaluyohon. Kon may ikasulti ako ngadto kang bisan kinsa nga nakigbisog niining mga pagbatia, mao gayod kini: Ayaw kanag itago. Suginli ang imong kapikas, imong mga ginikanan, usa ka ansiano, o usa ka kasaligang higala—apan ayaw kanag iluom.
Ngalan gitago, Tinipong Bansa
Gikan sa akong pagkabata, nag-antos ako sa seksuwal nga pag-abuso. Wala gayod ing gugma ug kamabination ang gipakita kanako. Gibatasan nako ang homoseksuwalidad, apan kon mahibaloan pa lamang sa mga batan-on ang kaulaw, kasakit, kagul-anan, ug mga kapakyasan nga dad-on sa homoseksuwal nga mga tinamdan, sila molikay niana. Daghan ang maglikay sa paghisgot bahin niining ulohana, apan gihisgotan ninyo kini diha sa tin-aw nga paagi. Nagpasalamat ako kaninyo uban sa tibuok kong kasingkasing sa pagpatik sa maong mga ulohan.
Ngalan gitago, Brazil