Ang mga Saksi ni Jehova Instrumento sa Kauswagan sa Operasyon sa Kasingkasing
ANG Daily News sa New York sa Agosto 27, 1995, may pangunang ulohan sa ilang taho, “Ang Walay-Dugo nga Operasyon.” Kini nag-ingon nga ang New York Hospital-Cornell Medical Center “nagbutyag sa usa ka bag-ong paagi sa pag-opera sa kasingkasing—ang samang operasyon nga gikinahanglan sa Mayor kaniadto nga si David Dinkins—nga wala kaayoy daghang dugong nawala.”
“Nadasig sa mga kabalaka sa mga Saksi ni Jehova,” ang mantalaan miingon, “ang kahibulongan sa bag-ong paagi . . . mapabanaag diha sa gatosan ka linibong dolyar nga madaginot sa mga ospital ug sa pagkatinuod nagpamenos sa risgo sa pagkatakod sa dugo sa mga pasyente.” Si Dr. Todd Rosengart, direktor sa programa sa ospital nga walay-dugo nga pag-opera, miingon: “Kami makapakunhod na karon sa gidaghanon sa pag-abuno ug dugo nga gikinahanglan sa panahon niining operasyona gikan sa naandang duha ngadto sa upat ka yunit matag pasyente ngadto sa sero.”
Si Dr. Karl Krieger, usa ka siruhano sa kasingkasing sa ospital, nga mitabang sa pagmugna sa paagi, miingon: “Pinaagi sa pagwagtang sa panginahanglag gidonar nga dugo ug mga produkto sa dugo, among napakunhod usab ang risgo sa pipila ka tapos-operasyon nga mga hilanat ug mga impeksiyon nga maoy kasagarang nalangkit sa mga pag-abuno.”
Ang ubang mga eksperto nag-ingon nga “ang walay-dugo nga operasyon magpakunhod sa panahong magugol diha sa intensive care human sa operasyon—gikan sa 24 oras o kapin pa ngadto sa unom ka oras na lamang. Ang mga pasyente nga napili alang sa walay-dugo nga operasyon daling naulian sa maayong panglawas ug nakagawas sa ospital sulod sa 48 oras kay sa mga pasyente nga giabunohan ug dugo.” Kana nagpasabot nga dako ang madaginot sa mga ospital, gobyerno, ug mga kompaniya sa seguro. Gibanabana ni Dr. Rosengart nga “kining operasyona makadaginot ug labing menos $1,600 sa matag pasyente.”
Ang asoy sa Daily News nagpadayon:
“Makaiikag, ang bag-ong operasyon gipasiugda dili sa panalapi o bisan sa medikal nga emerhensiya, kondili tungod sa relihiyosong kasibot. Ang komunidad sa mga Saksi ni Jehova—kansang pagtulon-an nagdili sa mga pag-abuno—nagpangitag tabang alang sa edarang mga membro nga masakiton ug kasingkasing. . . .
“Sa awhag sa komunidad sa mga Saksi ni Jehova, gihiusa sa mga doktor ang ilang mga teknik sa pagtipig sa dugo pinaagi sa bag-ong mga tambal. Ilang nakaplagan usab ang bag-ong paagi sa paggamit sa naandang makina sa kasingkasing ug baga sa pagpabilin sa mga pasyente nga buhi panahon sa operasyon sa kasingkasing.
“Dugang pa sa 40 ka pasyente nga mga Saksi ni Jehova nga nalakip sa unang gisulayan sa pag-opera nga walay-dugo, sa unom ka bulang miagi gisugdan sa tem sa New York-Cornell ang operasyon diha sa katibuk-ang komunidad sa pasyente. ‘Sukad niadto, natapos nila ang 100 ka sunodsunod nga mga operasyon nga walay-dugo nga walay nangamatay,’ miingon si Krieger. Ang gidaghanon sa nangamatay sa normal nga operasyon maoy mga 2.3%.”
Sa tibuok-kalibotan 102 ka ospital ang nagdugang ug mga programa sa walay-dugo nga pag-opera diha sa ilang mga pasilidad, nga naghimo niining mas luwas nga mga paagi sa pag-opera nga mabatonan alang sa katibuk-ang komunidad sa pasyente sa tibuok yuta.