Ang Mahigalaong Robin
SINULAT SA KORESPONSAL SA PAGMATA! SA BRITANYA
DUGAY pa una ang lagumong-pula nga bulok mag-usab sa among kakahoyan sa Northumberland ngadto sa makapahimuot nga talan-awon sa tinghunlak, ang robin magpaila sa iyang presensiya. Ang iyang hayag nga pulang dughan ug ang tagingting nga ganay sa iyang awit nakadugang sa katahom ug kalipay sa among tanaman. Pagkamakapahimuot gayod niya nga langgam!
Ang robin dali rang mailhan tungod sa iyang samag-olibong-kape nga mga abaga ug ulo; iyang orens-pula nga dughan, tutonlan, ug agtang; ug iyang pution nga tiyan. Kining bus-okon nga langgam, nga kanunayng liksi, magbarog nga mapagarbohon ang katiso, nga may gitas-ong 14 sentimetros gikan sa ulo ngadto sa ikog. Sa 1961 ang robin gipili, dili ikatingala, nga nasodnong langgam sa Britanya.
Ang Britanikong robin mas gamay kay sa iyang Amerikanhong katumbas, nga gihatagan sa unang mga kolonista gikan sa Inglaterra sa ngalang robin, usa ka ngalan nga sinati nila. Ang Britanikong robin, hinunoa, may talagsaong kinaiya. Bisan ang kontinental Uropanhong robin, sa kaatbang, maoy maulawong langgam nga magtago sa kaugalingon niini sa kinasuloran sa kakahoyan.
Sa dihang magkaduol na ang tinghunlak, ang robin makita sa kinatahoman niini sa usa ka Britanikong tanaman. Siya mobarog duol sa usa ka tawo nga nagbugwal sa yuta ug magbantay sa wati nga mogawas sa ibabaw. Usahay, sa dihang ang hardinero mopahulay, ang robin motugdon sa pala aron sa pagsurbi sa esena. Kining mapangahasong langgam nasayran gani nga mosunod sa agi sa usa ka mole aron sa pagsuhid sa bag-o niining gikalot nga mga bungdo. Ang pagkaon sa robin maoy nagkadaiya—mga insekto, mga liso, ug mga lomboy, maingon man ang mga wati.
Pagkamakapahimuot nga makakaplag ug salag sa robin! Ang bisan unsang bukas nga pultahan o bintana sa kamalig maoy usa ka pagdapit alang sa parisan. Ang mga salag mahimong matukod dayon diha sa daan nga mga kaang o linabay nga mga kaldero, sa gibubod nga alambre, o bisan sa mga bulsa sa usa ka dyaket sa hardinero! Ang pagkamamugnaon sa mga robin sa pagpangitag talagsaong mga dapit sa salag walay kinutoban.
Ang robin maoy usa sa kinasayonang bansayon nga langgam nga pakan-on gikan sa imong kamot. Samtang magsingabot ang tingtugnaw ug ang iyang naandang suplay sa pagkaon magkamenos, pagbutang ug pagkaon sa imong gibukhad nga palad—mga pirasong keso o mga bunlod—ug pipila diha sa dili-mairog nga butang sa haduol. Human sa duha o tulo ka pagpakaon nga nianang panahona ang robin mokaon niining ulahing suplay sa pagkaon, makabaton siya ug pagsalig ug mokaon ug pipila gikan sa imong gibukhad nga kamot. Bisan tuod dili gayod siya tingali motugdon sa imong mga tudlo, sukad nianang panahona ang robin kanunayng mag-isip kanimo nga iyang higala. Dili siya malimot kanimo sa dihang mobalik siya sa sunod nga panahon—maingon nga dili nimo malimtan ang imong higala, ang robin!