Gikan sa Among mga Magbabasa

Datong mga Nasod Nagpahimulos sa Kabos nga mga Nasod Ako 14 anyos, ug ako mapasalamaton kaayo kaninyo tungod sa seryeng “Pahimuslan ba Kanunay sa Datong mga Nasod ang Kabos nga mga Nasod?” (Nobyembre 22, 1995) Ang magtutudlo nako sa geograpiya mihatag kanamog asaynment sa pagsulat bahin sa ulohang “Katimawa.” Milantaw ako sa mga mantalaan ug mga magasin apan wala akoy nakaplagan nga maayong gamiton. Unya, sa panahong gikinahanglan nako ang impormasyon, kining magasina miabot aron magsilbing pasikaranan sa akong taho. Akong nadawat ang kinatas-ang grado sa klase, ug ako mapasalamaton kaayo tungod sa maong mga artikulo.

A. O., Brazil

Mapugsanong Panggawi Salamat tungod sa makapalig-ong artikulong “Mapugsanong Panggawi​—Gigamhan ba Niini ang Imong Kinabuhi?” (Pebrero 8, 1996) Nag-antos ako sa mapugsanong panggawi, ug makapadasig kaayo ang pagkasayod nga ako wala mag-inusara. Nakapabalaka kaayo kini kanako sukad sa pagkabata. Sukad sa pagtuon sa Bibliya, akong gihunahuna kanunay nga ako nakasala batok sa balaang espiritu. Sa inanay, akong nakontrolar ang akong mga suliran. Pagkamaayo nga masayrang si Jehova nakasabot sa iyang di-hingpit nga mga alagad!

A. B., Alemanya

Gipabilhan nako pag-ayo nga ang atong Maglalalang nakasabot sa maong sakit ug nga siya “mas labaw kay sa atong mga kasingkasing ug nahibalo sa tanang butang.” (1 Juan 3:20) Palihog ipadayon ang pagpatik niining matanga sa mga artikulo; sila makapadasig kaayo kanamo.

W. E., Switzerland

Dili ninyo mahanduraw kon unsa ka dako ang paghupay niining artikuloha kanako. Akong nabatonan ang mangil-ad, mapasipalahong mga hunahuna, nga mitultol sa depresyon ug usahay sa mga hunahuna sa paghikog. Apan karon nahisamag ang usa ka dakong palas-anon gikuha gikan sa akong mga abaga, samtang akong naamgohan nga si Jehova wala magsalikway kanako kondili nahigugma pag-ayo kanako.

I. B., Pransiya

Sukad sa pagkabata pa nako, ako kanunayng manghugas sa akong mga kamot nga balikbalik. Akong susihon ang kalan sa tulo ka beses, bisan pag ako mobalik pagsulod aron himoon kana. Akong susihon nga ang mga takop sa kaldero anaa sa akong mga kaldero, nga akong nasirhan nga tukma ang tanang pultahan. Ako mohigda nga gikapoy sa pagpakigbisog sa mapugsanong panggawi. Salamat sa inyong artikulo.

M. P., Venezuela

Mga Robin Nalingaw ako sa artikulong “Ang Mahigalaong Robin.” (Pebrero 8, 1996) Pila ka tuig nga miagi, samtang nagkalot ug trensera sa hardin, akong nabatian ang nindot nga awit sa usa ka robin nga nagtindog sa duol nga tugkaran nga naniid kanako. Sa dihang gisulayan nako pagsundog ang iyang tingog kadto nagtindog na tapad kanako diha sa trensera. Ang robin nagkalingaw sa pagtuhak sa mga insekto nga napagawas sa matag pala sa yuta. Palihog ipadayon ang pagpatik ug mga taho bahin sa kahayopan!

F. S., Alemanya

Mga Dagkong Yelo Salamat sa artikulong “Kristal nga mga Palasyo sa Dagat.” (Disyembre 8, 1995) Ang pagbasa lang sa maong artikulo ug paghanduraw nga ako diha sa atubangan sa usa niadtong higanteng mga bloke sa yelo, ako nahingangha sa kahibulongang mga butang nga gitagana sa atong Maglalalang, si Jehova nga Diyos, alang sa atong kalingawan. Sumala sa giingon sa salmista bahin kang Jehova sa Salmo 104:24, “ang yuta napuno sa [iyang] mga binuhat.”

A. I. B., Brazil

Sinulat sa Eskuylahan Ang estorya sa sinulat sa eskuylahan ni Eric nga “Kon Mausab Ko Lang ang Usa ka Yugto sa Panahon” (Pebrero 22, 1996) nakapatandog kaayo kanako. Kana mipukaw diha kanako sa pagbati sa pagdayeg ug pagpasalamat sa iyang mga ginikanan. Nagdeboto gayod silag daghang panahon ug kusog sa pagmatutog usa ka anak nga may talagsaon kaayong kaisog ug gugma alang kang Jehova, bisan pa sa iyang batang edad.

C. N., Italya