Usa ka Habol sa Tingtugnaw
NAKATAN-AW ka na ba sukad, nga nadani, sa ulan nga niyebe? Kon mao, sa walay duhaduha mouyon ka nga mao kini ang usa sa kinanindotan ug labing malinawon sa mga talan-awon—ilabina kon ikaw luwas ug mainit sa sulod sa balay ug walay dinaliang panginahanglan nga mobiyahe. Samtang ang puti nga habol mobaga, daw magsabwag kini ug tumang pakigdait ug kahilom bisan diin. Bisan ang kasaba sa siyudad mamenosan samtang milyonmilyong humok nga tipik mangahulog.
Apan, dili ba katingalahan kon sa unsang paagi ang usa ka butang nga daw humok sama sa ulan nga niyebe mahimong malaglagon? Ang mga saba nga siyudad sama sa New York—nga subsob gibatbat nga “siyudad nga dili gayod matulog”—modangat sa makauulaw nga kahilom kon ang niyebe magtapun-og pag-ayo.
Nan, dili ikatingala nga ang Diyos nangutana sa matinumanong tawo nga si Job: “Nakasulod ka ba sa mga tipiganan sa niyebe, o nakita mo ba bisan ang mga tipiganan sa ulan nga yelo, nga akong gitagana alang sa panahon sa kalisdanan, alang sa adlaw sa pakig-away ug pakiggubat?” (Job 38:22, 23) Ilalom sa pagmando sa Maglalalang niini, si Jehova nga Diyos, ang niyebe mahimo gayong usa ka dili-mabuntog nga hinagiban.
Bisan pa niana, ang niyebe subsob nga may bahin sa pagtipig sa kinabuhi inay sa pagpahinabog kalaglagan. Pananglitan, ang Bibliya nag-ingon nga ang Diyos “naghatag sa niyebe sama sa balhibo sa karnero.” (Salmo 147:16) Sa unsang paagi nga ang niyebe sama sa balhibo sa karnero? Ang Bibliya naggamit sa niyebe ug balhibo sa karnero sa paghawas sa kaputi ug kaputli. (Isaias 1:18) Apan adunay laing hinungdanong kaamgiran. Ang niyebe ug balhibo sa karnero nagsilbing mga insulador. Ang The World Book Encyclopedia nag-ingon: “Ang balhibo sa karnero . . . panalipod batok sa kabugnaw ug kainit.” Ug bahin sa niyebe, ang World Book nag-ingon nga kana usab “nag-alagad ingong maayong insulador. Ang niyebe motabang sa pagpanalipod sa mga tanom ug mga hayop nga tiglublob batok sa mabugnaw nga hangin sa tingtugnaw.”
Busa sa sunod higayon nga motan-aw ka sa niyebe nga mahulog gikan sa langit, tingali buot nimong hunahunaon ang makalilisang nga gahom sa Diyos. O mahimong mopili ka sa paghunahuna sa malumong panalipod nga iyang itagana samtang iyang gibukhad ang usa ka puti nga habol ibabaw sa iyang linalang, sama gayod sa paagi nga ang usa ka mahigugmaong ginikanan magpakatulog sa iyang anak ug bukotan kana ug habol.