Pagsagop—Kini ba Alang Kanimo?

SINULAT SA KORESPONSAL SA PAGMATA! SA BRITANYA

“ANG pagsagop maoy pag-alagad sa kabataan, dili pag-alagad aron sa pagtagana ug bata sa walay-anak nga mga magtiayon,” matod sa usa ka Britanikong tig-alagad sa katilingban. Bisan pa niana, may katungod ba ang usa ka bata sa paghimog desisyon sa dihang sagopon siya?

Naghunahuna ka bang mosagop ug bata? Nan nag-atubang ka sa usa ka desisyon nga dili lamang kay emosyonal apan dili usab mabakwi. Unsa ka malamposon nga ang bata mahiusa sa imong pamilya?

Kon ikaw usa ka bata nga sinagop, nahibalo ka ba kon kinsa ang imong tinuod nga mga ginikanan? Kon wala, sa imong hunahuna unsay kalainan kon nahibaloan pa nimo?

Ikaw ba usa ka inahan nga naghunahunang ipasagop ang imong bata? Ang pagsagop ba gayod mao ang bugtong sulbad ug maoy labing makaayo sa imong anak?

Sa 1995 kapin sa 50,000 ka bata ang gisagop sa Tinipong Bansa, ug mga 8,000 kanila ang natawo sa langyawng nasod. Nga nagauswag, ang mga tawo nagsagop ug mga bata gikan sa langyawng mga nasod. Sumala sa magasing Time, sa miaging 25 ka tuig ang mga pamilya sa Tinipong Bansa nagsagop ug kapin sa 140,000 ka bata nga natawo sa langyawng nasod. Ang ikatandi nga mga gidaghanon sa Uropa mao ang Sweden 32,000, Holland 18,000, Alemanya 15,000, ug Denmark 11,000.

Ikaw ba anaa sa usa nianang mga kahimtanga? Ang pagsagop nagkahulogan nga ang imong kinabuhi​—dili lang ang kinabuhi sa bata​—malahi na gayod. Ang nanagop nga mga ginikanan angayang magdahom ug daghang kalipayan, apan kinahanglan usab nga magmaandam sila sa daghang suliran ug mga kahigawad. Sa susama, ang kaguol nga masinati sa usa ka inahan sa pagpasagop sa iyang anak mahimong dili gayod maalim sa bug-os.

Ang matag kahimtang nagpresentar sa hagit nga umolon o umolon-pag-usab ang usa ka linghod nga kinabuhi uban ang gugma. Ang mosunod nga mga artikulo maghisgot sa pipila sa mga kalipay​—ug mga suliran​—sa pagsagop ug bata.