Unsa ang Sulbad?
ANG kahimtang sa kagiw dili bug-os nga mangiob. Sa tibuok kalibotan, ang mga organisasyon nga makitawhanon naningkamot sa pagtabang niadtong nabugaw tungod sa gubat ug sa ubang mga problema. Usa sa dakong paagi nga sila makatabang mao ang pagbulig sa mga kagiw nga makabalik sa ilang kaugalingong mga nasod.
Gibiyaan sa mga kagiw ang ilang balay, komunidad, ug nasod tungod kay sila nahadlok nga patyon, sakiton, lugoson, prisohon, uliponon, pangawatan, o magutman. Busa sa dili pa makabalik sa balay ang mga kagiw nga luwas, ang mga problema nga nagtukmod kanila sa pagkalagiw kinahanglang sulbaron. Bisan pa kon matapos na sa kataposan ang panaggubat, ang pagkawala sa balaod ug kahusay sagad magpaluya sa mga tawo sa pagpauli. Si Agnes, nga usa ka taga-Rwanda nga kagiw ug inahan sa unom ka bata, miingon: “Ang pagpadala kanamo [ug balik] sa Rwanda nahisama sa pagdala kanamo ngadto sa among mga lubnganan.”
Bisan pa niana, sukad sa 1989, kapin sa nuybe milyones ka kagiw namalik na sa ilang mga balay. Duolan sa 3.6 milyones niini namalik gikan sa Iran ug Pakistan ngadto sa Afghanistan. Laing 1.6 milyones ka kagiw sa unom ka nasod namalik sa Mozambique, usa ka nasod nga nagusbat sa 16 ka tuig nga giyera sibil.
Ang pagpabalik malisod. Sagad ang mga nasod nga balikan sa mga kagiw anaa sa kagun-oban—nga ang mga balangay nangalumpag, ang mga taytayan nangadaot, ug ang mga dalan ug kaumahan gitamnan ug mga mina. Busa, ang namalik nga mga kagiw magtukod pag-usab gikan sa wala dili lamang sa ilang mga kinabuhi apan usab sa ilang mga balay, mga eskuylahan, mga klinika sa panglawas, ug sa tanan pang ubang mga butang.
Apan, bisag mapalong na ang mga kalayo sa panaggubatay sa usa ka dapit, nga magtugot sa mga kagiw sa pagpamauli, kini mosiga sa laing dapit, nga makamugnag bag-ong mga buhagay sa mga kagiw. Sa ingon, ang pagsulbad sa krisis sa mga kagiw nagkahulogang pagsulbad sa nalangkit nga mga problema sa gubat, pag-ipit, pagdumot, paglutos, ug ubang mga butang nga magpakalagiw sa mga tawo alang sa ilang mga kinabuhi.
Ang The State of the World’s Refugees 1995 miadmitir: “Ang malisod nga kamatuoran . . . mao nga ang mga sulbad [sa krisis sa mga kagiw] nagadepende gayod sa politikanhon, militar ug ekonomikanhong mga butang nga dili na makontrolar sa bisan unsang organisasyong makitawhanon.” Sumala sa Bibliya, ang mga sulbad sama nga dili maabot sa bisan unsang yutan-ong organisasyon, makitawhanon man o dili.
Usa ka Kalibotan nga Walay mga Kagiw
Hinunoa, adunay sulbad. Ang Bibliya nagpakita nga si Jehova nga Diyos nagatagad niadtong napalagpot gikan sa ilang mga balay ug mga pamilya. Dili sama sa mga kagamhanan sa kalibotan, siya adunay gahom ug kaalam sa pagsulbad sa tanang malisod nga mga problema nga nagaatubang sa katawhan. Iyang pagahimoon kini pinaagi sa iyang Gingharian—ang langitnong kagamhanan nga sa dili madugay maoy modumala sa mga kalihokan sa yuta.
Pagapulihan sa Gingharian sa Diyos ang tanang tawhanong mga kagamhanan. Imbes magbaton ug daghang kagamhanan sa yuta, sama sa atong nabatonan karon, adunay usa lamang unya ka kagamhanan, nga maoy momando sa tibuok nga planeta. Ang Bibliya nagtagna: “Ang Diyos sa langit magatukod ug usa ka gingharian nga dili gayod malumpag. Ug ang gingharian dili gayod mabilin ngadto sa laing katawhan. Kini magadugmok ug magaut-ot sa tanan niining mga ginghariana, ug kini molungtad sa walay kataposan.”—Daniel 2:44.
Tingali pamilyar ka sa sulondang pag-ampo nga makita diha sa Bibliya sa Mateo 6:9-13. Ang bahin niana nga pag-ampo nag-ingon: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” Nahiuyon niana nga pag-ampo, ang Gingharian sa Diyos sa dili madugay ‘moabot’ sa pagtuman sa katuyoan sa Diyos alang sa yuta.
Ilalom sa mahigugmaong pagmando sa Gingharian sa Diyos, aduna unyay tibuok-kalibotang kalinaw ug kasegurohan. Wala na unyay pagdumot ug panag-away tali sa mga tawo ug mga nasod sa yuta. (Salmo 46:9) Wala na gayod unyay milyonmilyong mga kagiw nga mangalagiw alang sa ilang mga kinabuhi o mag-ilaid diha sa mga kampo.
Ang Pulong sa Diyos nagsaad nga ang Hari sa Gingharian sa Diyos, si Kristo Jesus, “magaluwas sa kabos nga nagapangayog tabang, usab ang sinakit nga walay magtatabang. Siya maluoy sa timawa ug sa kabos, ug ang mga kalag sa mga kabos iyang pagaluwason. Pagalukaton niya ang ilang mga kalag gikan sa pagdaogdaog ug gikan sa kapintasan, ug hamili ang ilang dugo sa iyang pagtan-aw.”—Salmo 72:12-14.
[Hulagway sa panid 10]
Sa dili madugay tagdon sa tanan ang usag usa ingong tinuod nga mga igsoong lalaki ug babaye