Usa ka Kalibotan nga Walay Kadalo
“KON walay tibuok-yutang dakong kausaban sa panghunahuna sa tawo, walay kausaban sa kaayohan sa katawhan, ug ang katalagman nga gipadulngan sa atong kalibotan . . . dili kalikayan.”—Václav Havel, presidente sa Republikang Czech.
Giila sa daghang tawo nga ang presenteng sistema sa kalibotan dili makalahutay. Ang pipila, sama kang Václav Havel, nakasabot nga ang tibuok-yutang kausaban sa panghunahuna ug mga aksiyon sa tawo mao ang bugtong solusyon. Usa ka maniniid sa talan-awon karon sa kalibotan, pananglitan, nag-ingon: “Alang sa ginatos ka milyong kabos kaayo, ang kalaoman sa pagkaon ug sa ubang mga panginahanglan sa kinabuhi dili moarang-arang . . . gawas kon ang mga nasod sa kalibotan desididong molihok sa pag-usob sa mga kiling karon.”—Food Poverty & Power.
Bisan pa niana, realistiko ba ang pagsandig sa atong mga kalaoman sa pagpadayong buhi sa usa ka matang sa paninugdang kausaban sa tawhanong kinaiya? Makasalig ba kita nga ang mga gobyerno “desididong molihok sa pag-usob sa mga kiling karon”? Naghunahuna ang pipila nga mohimo sila. ‘Gihatagan kita sa Diyos ug kagawasan sa pagpili, ug atong responsabilidad ang pag-usob sa mga butang,’ sila nag-ingon. Apan ang mapait nga mga panghitabo sa kasaysayan nagpatunghag ugdang nga mga pangutana bahin sa tinguha ug katakos sa tawo sa paghimo sa mga kausabang gikinahanglan. Kining panglantawa dili ingon nga pagkadili-malaomon, kondili hinunoa, kini realistiko. Isalig ba nimo ang imong kinabuhi diha sa mga kamot sa usa ka siruhano kon nasayod ka nga nangamatay ang iyang tanang nangaging mga pasyente?
Usa ka Sulirang May Kalabotan sa Edukasyon?
“Ang suliran may kalabotan sa edukasyon,” matod ni Ted Trainer, diha sa Developed to Death—Rethinking Third World Development. Siya nag-ingon nga gawas kon ang mga tawo maedukar sa pagkasabot nga gikinahanglan ang paninugdang kausaban, “dili kita makalaom nga makab-ot ang moobrang sistema sa kalibotan.” Walay duhaduhang adunay panginahanglan nga edukahon ang mga tawo bahin sa kahinungdanon sa kausaban sa mga tinamdan ug mga lihok aron molahutay ang kalibotan. Gani, kini kinahanglanon, ug ang Bibliya naghisgot bahin sa maong edukasyonal nga programa. Nag-ingon kini nga ang yuta “mapuno sa kahibalo kang Jehova.” Unya, walay mausa ang “mohimog kadaot o magpahinabog kadaot” sa bisan diin sa yuta.—Isaias 11:9.
Apan walay gidak-on sa edukasyon, bisan edukasyonal nga programa sa Diyos, ang magwagtang gikan sa yuta sa mga tawong dalo nga naghimog dakong kadaot ug nagpahinabog kaylap nga panglaglag. Ang edukasyon magpatunghag kausaban diha lamang sa mga tawo nga gustong magbag-o, mga tawong gustong magpahiuyon sa mga sukdanan sa Diyos. Sumala ni Jesu-Kristo, sila diyutay ra. (Mateo 7:13, 14) Busa ang Bibliya wala magpasukad sa saad niining kausaban diha sa hinandurawng paglaom nga may adlaw nga ang tanang tawo mahigmata sa kadako sa suliran ug mag-usab sa ilang mga dalan. Nag-ingon kini nga ang Diyos direktang molihok aron wad-on ang mga tawong dalo gikan sa yuta.
Pagsalga sa Diyos
Giisip sa daghan kining ideya sa direktang paglihok sa Diyos nga usa ka damgo o handurawan. “Tungod sa utokang mga kauswagan napugos kita sa paghiklin sa makapahupay nga ideya bahin sa usa ka Diyos nga mosalga nga maoy magtul-id sa katawhan,” matod sa World Hunger: Twelve Myths. Apan angay bang ibutang nato ang atong pagtuo sa utokang mga argumento ug mga pilosopiya niadtong nawad-ag pagtuo sa “usa ka Diyos nga mosalga”? Dili ba ang ilang mga solusyon maoy handurawan? Mas maalamon nga ipasukad ang atong paglaom alang sa pagpadayong buhi diha sa dili-masayop nga mga tagna nga makaplagan sa Bibliya nga nagpunting sa pagsalga sa bahin sa Diyos. Dili lamang “makapahupay nga ideya” ang pagtuo sa mga saad sa Diyos—kini mao lamang ang realistikong paglaom alang sa pagpadayong buhi nga atong naangkon!
‘Gun-obon Kadtong Nagagun-ob sa Yuta’
Unsa ba gayod ang saad sa Diyos? Aw, sa usa ka bahin, siya nagsaad nga hinloan ang yuta niadtong naghugaw ug nagdaot sa kalikopan. Ang Pinadayag 11:18 nagpahayag nga siya adunay “tinudlong panahon” sa ‘paggun-ob niadtong nagagun-ob sa yuta.’ Unsay kahulogan unya niana? Kana magkahulogan sa kalaglagan niadtong tanan nga nagdaogdaog karon sa mga kabos ug mga mahuyang. Ang Diyos ‘magahukom sa mga sinakit sa katawhan, magaluwas sa mga anak sa kabos, ug magadugmok sa mangingilad.’ Iyang pagalaglagon ang mga dalo ug himoong mauswagon ang ilang inosenteng mga biktima. “Iyang pagaluwason ang kabos nga nagatuwaw alang sa panabang . . . Gikan sa pagdaogdaog ug gikan sa kapintasan iyang pagatuboson ang ilang kalag.”—Salmo 72:4, 12-14.
Pagkadakong kausaban ang ipahinabo niana! Sumala ni apostol Pedro, ang maong kausaban malukpanon kaayo nga magpatungha kinig “bag-ong mga langit ug usa ka bag-ong yuta.” (2 Pedro 3:13) Niining “bag-ong yuta,” ang tanan magpahimulos ug igong gidaghanon sa abot sa yuta. (Miqueas 4:4) Bisan karon, adunay daghang pagkaon alang sa matag usa. Ang dili-makiangayong pag-apod-apod mao ang suliran. “Gibanabanang kita makapatunghag abot nga igo sa matikad unta nga luna sa yuta aron pagsuportar sa 38-48 ka bilyong tawo,” matod ni Anne Buchanan, diha sa iyang librong Food Poverty & Power.
Kining planetaha molahutay. Ang Maglalalang niini “wala maglalang niini alang lamang sa walay kapuslanan [apan] nag-umol niini aron pagapuy-an.” (Isaias 45:18) Ang aksiyon sa Diyos batok sa mga tawong dalo magkahulogan sa hamubong “dakong kasakitan.” (Mateo 24:21) Ang mga makalabang-buhi nianang kasakitana magpahimulos unya sa usa ka paraisong yuta, nga puy-an sa mga tawong bug-os walay kadalo. (Salmo 37:10, 11; 104:5) Kini mahimo unyang sama sa gisaad sa Bibliya: “Si Jehova tinong magapahid sa mga luha gikan sa tanang nawong.”—Isaias 25:8.
Ikaw mamahimong usa sa malipayong mga benepisyaryo sa aksiyon sa Diyos sa paghinlo sa yuta sa kadalo. Kon gusto gayod nimong buhaton ang kabubut-on sa Diyos, pahimusli ang tanang tabang nga gitagana aron tabangan ka sa pagpadayong buhi karon diha sa usa ka dalo nga kalibotan. Lihok na aron makalabang-buhi sa “dakong kasakitan.” Ang mga Saksi ni Jehova andam motabang kanimo sa pagkat-on kon unsay kinahanglang imong mahibaloan. Ayaw pagpanuko sa paghibalag kanila diha sa lokal nga Kingdom Hall o pagsulat ngadto sa kinadul-ang adres nga nalista sa panid 5.