Gikan sa Among mga Magbabasa
Magbasa sa Tibuok Magasin Ako nakaangay kanunay sa Pagmata!, apan ako tigbasa lamang sa mga artikulong nakadani sa akong pagtagad. Karon ako magbasa sa tibuok magasin ug kini misangpot nga akong naangayan ang mga ulohan nga kaniadto akong laktawan. Pananglitan, bag-o pa nakong natapos pagbasa ang “Usa ka Karaan nga Amerikanong Indiang Tradisyon” (Marso 8, 1996), ug nagustohan ko kaayo kini!
E. A. S., Brazil
Pagpasilo sa Uban Ang artikulong “Ang Hunahuna sa Bibliya: Kon Unsay Buhaton sa Dihang Nakapasilo Ka sa Uban” (Pebrero 8, 1996) miabot gayod sa hustong panahon. Usa ka Kristohanong sister kalit nga wala na makigsulti kanako. Ako siyang gisukna kon may nahimo ba akong nakapasilo kaniya, ug ako nangayog pasaylo. Apan wala kadto makausob sa iyang tinamdan. Ako nasakit pag-ayo niini ug nagsugod paghunahuna nga ang akong pag-alagad kang Jehova dili madawat. Pagkadakong kahupayan ang akong gibati sa pagbasa sa kataposang parapo sa artikulo! Kini nag-ingon nga “sa dihang ikaw nanlimbasog nga makigdait, si Jehova malipay sa pagdawat sa imong pagsimba.”
M. R., Argentina
Kobra Ang artikulong “Buot ba Nimong Mahimamat ang Kobra?” (Marso 22, 1996) makaiikag kaayo. Apan usa ka kapsiyon sa hulagway sa panid 16 mabasa: “Usa ka itom nga kobra nagpatingkag sa silik niini samtang kini nagpabulad sa adlaw diha sa usa ka mainit nga bato.” Sumala sa akong nasayran, ang kobra magpatingkag sa iyang silik sa dihang makamatikod lamang kinig kapeligrohan o sa dihang mapikal ang kobra.
R. F., Alemanya
Kini gisaysay sa artikulo sa panid 18, parapo 1, ug sa panid 20, parapo 2. Ang among koresponsal sa India nag-ingon nga sa letrato ang kobra mipatingkag sa silik gumikan sa paghagit gikan sa luyoluyo sa letratista.—ED.
Baldadong Drayber Ang artikulong “Baldado—Apan Makahimo sa Pagdrayb” (Mayo 8, 1996) miabot sa hustong panahon. Ingong tawong baldado, akong nadiskobrehang diyutay kaayo ang akong Kristohanong ministeryo. Salamat kang Jehova, karon ako adunay sakyanang gipasibo, ug kining artikuloha nagdasig kanako sa pagpauswag sa akong ministeryo.
A. A. V., Brazil
Pagsayaw Ako gustong mosayaw nga duyog sa klasikal, Latin, ug mananoy nga popular nga musika ingong kalingawan. Gipabilhan ko gayod ang artikulong “Ang Hunahuna sa Bibliya: Ang Pagsayaw ba Alang sa mga Kristohanon?” (Mayo 8, 1996) Nakatabang kini kanako sa pagsusig maayo niining matanga sa lingawlingaw. Ang matugkaron-sa-kalag nga mga pangutana nga inyong gipatungha moabag kanako sa pagpabiling walay-ikasaway ug ‘walay buling sa kalibotan.’—Santiago 1:27.
D. D. G., Trinidad
Ako 15 anyos, ug nalisdan ako pag-ayo sa paghukom kon unsay angay ug dili-angay kon bahin sa pagsayaw. Sa paggamit sa giya nga gitagana sa artikulo—uban sa mga kasulatang gisitar gikan sa Bibliya—ako karon makahukom kon unsay angay.
M. R., Tinipong Bansa
Mga Tagana Alang sa Nadaot nga Pandungog Ako bungol ug buta, ug buot kong pasalamatan mo tungod sa artikulong “Pagpakigsultiay Pinaagi sa Senyas sa mga Kamot.” (Abril 8, 1996) Nag-asoy kini bahin sa “Malipayong mga Magdadayeg” Distritong mga Kombensiyon sa mga Saksi ni Jehova nga gihimo sa Amerikanhong Pinulongan sa Senyas. Makapadasig kaayo kanako ang pagkahibalong daghan nga buta ug bungol ang mitambong. Mapasalamaton kaayo ako alang niadtong mga nag-interpretar sa programa sa kombensiyon alang kanako sa dihang gihimo ang among kombensiyon dinhi sa Disyembre 1995. Wala gayod ako makatuon ug Braille, busa aron makasangyaw ngadto sa uban, gisag-ulo ko ang 121 ka teksto sa Bibliya. Maoy akong tinguha nga makita ang katumanan sa saad sa Diyos sa Isaias 35:5, 6, nga naghisgot bahin sa pagkadungog sa bungol ug pagsulti sa amang. Buot nakong makaawit ug mga pagdayeg kang Jehova sa umaabot nga Paraiso!
A. F. A., Argentina