Pagpaniid sa Kalibotan
Mga Unitarian Nagduso sa Homoseksuwal nga Kaminyoon
Ang Unitarian Church nahimong unang denominasyon sa T.B. nga opisyal nga nagduso sa mga kaminyoon sa samang sekso, nagtaho ang Christian Century. Ang mga delegado nga mitambong sa tinuig nga kombensiyon sa relihiyosong grupo masibotong mipahayag nga “imantala nga angayan ang kaminyoon tali sa duha ka tawo nga komitido sa usag usa.” Ang relihiyosong magasin nag-ingon nga “ubos sa mga lagda sa simbahan, ang matag usa sa 1,040 ka kongregasyon sa iglesya makahukom sa kaugalingon niini kon kini mouyon sa kaminyoon sa mga bayot ug mga lesbiyan nga mga magtiayon ug kon didto niini himoon ang maong mga kasal.”
Pagtino-Daan sa Sekso sa Bata
Sumala sa magasing Popular Science, “posible na karon ang pagtino-daan sa sekso sa bata pinaagi sa pagklaseklase sa binhi sa amahan, sanglit ang matang sa binhi nagtino sa sekso.” Una, ang binhi tinaon sa sanag nga tina. Unya, ang laser beam gamiton sa pag-ila sa X (babaye) nga binhi gikan sa Y (lalaki) nga binhi. Usa ka kompiyuter ang mobasa sa kalainan, ug ang usa ka kahimanan sa laboratoryo nga kasagarang ‘gigamit alang sa mga pagsusi sa dugo mohatag ug positibong karga sa koryente sa X nga binhi ug usa ka negatibong karga ngadto sa Y nga binhi. Dayon ang binhi klaseklasehon ginamit ang mga terminal sa magkaatbang nga karga sa koryente aron butaron kini sila.’ Sumala sa siyentipiko nga maoy unang nag-ugmad sa pamaagi alang sa industriya sa kahayopan, ang pagklaseklase maoy 90 porsiyento nga tukma. Human niana, ang pinili nga binhi gamiton sa pagpertilisar sa mga binhi sa babaye, ug “ang mga pertilisadong binhi sa gitinguhang sekso itisok diha sa tagoangkan.” Ugaling, hangtod karon usa lamang ang gipanganak nga bata nga miresulta gumikan niining prosesoha.
Makadaot nga Binatang Sinultihan
Ang unang mga paningkamot sa mga bata sa pagsulti subsob nga giisip nga makapahimuot, ug daghang ginikanan ang motubag nga mabination pinaagig ilang binatang sinultihan. Kini, hinunoa, mahimong magpameligro sa pag-ugmad sa sinultihan sa mga bata, misulat ang Brazilianhong espesyalista sa panulti nga si Eliane Regina Carrasco diha sa magasing Veja. Sa dihang ang mga ginikanan magsubli sa sayop nga mga paglitok sa bata, kana “magpalig-on sa usa ka paagi sa sinultihan nga dili husto,” matod ni Carrasco. Siya miingon nga kini mahimong magpahinabog mga suliran sa panulti. Makaapektar usab kini sa sosyal nga mga relasyon sa bata, siya midugang. “Kasagaran, ang maong mga bata mahimong tigpalain, maulawon, ug dili-masaligon, nga maglikay sa mga kahimtang diin iladlad nila ang ilang kaugalingon [sa pagbiaybiay].” Normal alang sa gagmayng mga bata nga masayop paglitok sa mga pulong, ug dili kinahanglang tul-iron sila kanunay, mipunting si Carrasco. Apan hinungdanon nga mosulti kanila sa hustong paagi ug sa paghinumdom nga “sila intelihente ug adunay kapasidad nga mokat-on.”
Tsina Magkunhod sa Polusyon sa Tubig
“Ang polusyon sa tubig maoy dakong suliran sa Tsina, ug ang pagkunhod sa polusyon sa tubig maoy dinaliang buluhaton,” matod sa tigpamaba alang sa National Environmental Protection Agency sa Tsina. Busa ang gobyerno sa Tsina naghimog mga lakang sa pagkunhod sa polusyon sa tubig diha sa labing nahugawan nga mga suba ug mga lanaw sa Tsina, mitaho ang magasing China Today. Pananglitan, aron kontrolahon ang hugaw nga mosulod sa usa sa labing nahugawan pag-ayong mga suba sa nasod, ang Huaihe, ang gobyerno “nagsira sa 999 ka gagmayng naggamag-papel nga mga pabrika diha sa walog sa Huaihe.” Duolan sa 154 ka milyong tawo ang nagpuyo sa Walog sa Huaihe, nga usa sa dagkong tigpatunghag lugas ug enerhiya nga mga rehiyon sa Tsina.
“Sagradong” mga Terorista
Sa paningkamot nga “tukoron-pag-usab ang kaugalingon niini ingong nasodnong iglesya,” ang Romanianhong Ortodoksong Iglesya “naglansad ug malipotong kampanya sa pagpakaulaw sa ubang mga denominasyon,” nagtaho ang magasing Compass Direct sa usa ka artikulo ni Willy Fautré. Si Fautré midugang: “Ang pangunang mga lider ug lokal nga mga pari sa Ortodoksong simbahan sa Romania” naghugpong ug ubay-ubayng grupo sa “paghulga sa minoriyang mga grupo sa relihiyon ug paghikaw kanila sa pasikaranang relihiyosong mga katungod.” Nga nagtawag sa ebanghelikal nga mga tigsibya sa radyo nga “mga tigpanamastamas sa pagtuo sa atong katigulangan,” ang arsobispo sa Suceava ug Rădăuţi misulat sa presidente sa kapunongan nga nagdumala sa mga sibya sa radyo ug telebisyon sa Romania, nga nag-ingon: “Naghangyo kami kaninyo sa pagpahunong kanila o paglimite sa ilang mga sibya, tungod kay sila mga wala gayoy uwaw ug sila dayag nga nagtinguha sa paghimog mga kinabig diha sa atong kaugalingong yutang natawhan.”
Mga Hayop nga Sus-an Mas Nameligro Kay sa mga Langgam
“Ang mga hayop nga sus-an mas nameligro gani nga mapuo kay sa mga langgam,” nagtaho ang magasing New Scientist. Kining maong mga kaplag, nga gibase sa mga ihap nga giluwatan sa World Conservation Union’s Red List, nagpadayag nga samtang 11 porsiyento sa mga espisye sa langgam ang hapit nang mapuo sa tibuok yuta, 25 porsiyento sa tanang espisye sa mga hayop nga sus-an sa pagkakaron ang nameligro. Ang pamilya sa mga unggoy mao ang labing nameligrong grupo, nga may 46 porsiyento sa mga espisye nga nameligrong mapuo. Ang ikaduha mao ang mga kumakaon ug mga insekto nga may 36 porsiyento, gisundan sa mga baboyng ihalas ug mga antelope nga may 33 porsiyento. Ang labing nameligrong grupo sa langgam mao ang talabon, nga may 26 porsiyento sa mga espisye nga hapit nang mapuo. Usa ka hinungdan sa kusog kaayong pagkapuo sa mga hayop nga sus-an mao nga, dili sama sa mga langgam, sila dili dayon makabalhin sa laing lugar sa dihang mahanaw ang ilang puloy-anan.
Programa sa Pagbasa Nakatabang sa Pagkunhod sa Krimen
Sa Bradford, Inglaterra, usa ka programang gigastoan sa gobyerno nga gidisenyo sa pagpauswag sa katakos sa pagbasa sa mga batang nagtungha adunay dayag nga mga resulta, nagtaho ang Britanikong mantalaan nga The Independent. Dili lamang kay nakatabang ang programa sa pagbasa sa pagpauswag sa mga katakos sa pagbasa kondili nakadawat usab kini sa reputasyon nga nakatabang sa pagpakunhod sa krimen! “Among gilangkit ang gidaghanon sa mga batan-on nga nanglungkab sa kabalayan ngadto sa gidaghanon sa mga estudyanteng tigsibat-sa-klase,” matod ni John Watson, pangulo sa Better Reading Partnership. “Kon ang kabataan makabasa mas lagmit nga maikag sila kon unsay nagakahitabo sa tunghaan ug menos ang kalagmitan nga mosibat sa klase. Tungod kay wala sila sa kadalanan menos ang kalagmitan nga sila manglungkab ug mga balay.”
Ang Olimpiada ug Kakabos
“Ang gidaghanon sa medalya nga nadaog sa pipila ka nasod diha sa Olimpiada ug ang gidak-on sa salapi nga gigasto diha sa mga pasilidad ug ang pagpangama sa mga korporasyon sa mga dula nagpatunghag mga pangutana bahin sa panaad sa kalibotan nga taposon ang kakabos,” nagtaho ang ENI Bulletin, gikan sa Switzerland. “Dili buot sabton nga dili kita angayng mopasidungog sa kabatid o modayeg sa talagsaong mga kalamposan sa tawhanong katakos ug paglahutay,” matod ni Greg Foot, sa World Vision nga ahensiya sa Australia. “Apan,” siya midugang, “angay kitang mangutana kon ato bang nabatonan ang hustong panimbang sa dihang mogasto kitag maayo sa paghingpit sa diyeta sa atong kinamaayohang mga atleta sa dihang minilyon sa atong mga silingan walay igong makaon aron may kusog nga makalakaw.” Gibanabana nga sulod sa duha ka semana nga ang Olimpiada gihimo sa Atlanta, 490,000 ka bata ang nangamatay sa kagutom ug mapugngang mga sakit sa tibuok kalibotan.
Dugay nga mga Pagpangape
Ang pipila ka empleyado manggawas gayod aron makainom ug usa ka tasang kape sa tungatunga sa kabuntagon. Sa pagkatinuod, daghan ang bug-os nga mibiya sa ilang trabahoan. Sanglit may mga kapehan nga nagtanyag ug espesyal nga mga kape, ang mga trabahante mogula sa opisina aron makainom sa ilang paboritong timpla sa kape. Ingong resulta, “inay mangape diha sa trabahoan, ang mga tawo mobiya niana aron makapangape diha sa usa ka kapehan,” matod sa The Wall Street Journal. Apan ang mga amo nabalaka bahin sa gidugayon sa pagpangape diha sa lokal nga mga kapehan. Sa paningkamot nga masumpo ang gidaghanon sa mga hingape nga mobiya sa trabahoan, ang Journal miingon, ang pipila ka negosyo nagsanta niana pinaagi sa pagpahimutang sa ilang kaugalingong mga makina nga tiggamag kape nga cappuccino.
Nagpatunghag-Kainit nga mga Tanom
Duha ka Australianong mga tigdukiduki ang nakadiskobre nga ang mga bulak nga lotus adunay katingalahang katakos sa pagkontrolar sa ilang kaugalingong temperatura. Kaniadto, ang init-ug-dugo lamang nga mga hayop ang gihunahunang nakabaton niining maong katakos. Nga nagtrabaho sa Botanic Gardens sa Adelaide, si Dr. Roger Seymour ug Dr. Paul Schultze-Motel nagtaod ug mga sensor sa namuswak nga mga bulak nga lotus aron irekord ang ilang temperatura ug ubang pisikal nga mga kinaiya. Unsay ilang nadiskobrehan? Bisan sa dihang ang temperatura sa hangin mius-os ngadto sa 50 grado, ang temperatura sa mga bulak nga lotus nagpabilin tali sa 86 ug 95 grado Fahrenheit. Ang mga tigdukiduki wala pa makakaplag ug katin-awan niining talagsaong hitabo. Apan, sumala sa The New York Times, si Dr. Hanna Skubatz, usa ka biokemista sa tanom sa University of Washington, T.B.A., nag-ingon nga ang “pagpatunghag kainit [taliwala sa mga tanom], sa pagkatinuod, lagmit nga kaylap, lisod lang nga matiktikan.”
Mga Ebanghelikal Miangkon sa mga Sayop
“Ang ebanghelikal nga kalibotan karong adlawa halos nawad-an na sa pagkamaunongon niini sa Bibliya, moral nga direksiyon ug misyonaryong kasibot,” nag-ingon ang “Cambridge Declaration of the Alliance of Confessing Evangelicals.” Diin maggikan kining grabeng pagsaway? Lagmit sa usa ka karibal nga pundok sa iglesya? Dili, naggikan kini sa mga ebanghelikal mismo. Ang dokumento giluwatan sa kapin sa 100 ka ebanghelikal nga mga pangulo nga nagtigom di pa dugay sa Cambridge, Massachusetts. Ang mga magsusulat sa dokumento miila nga sila ug ang relihiyosong mga lider nagkinahanglang “maghinulsol gumikan sa ilang kinabubut-ong pagpadominar sa mga sukdanan sa popular nga kultura.” Ang dokumento miangkon usab nga ang “mga paagi sa terapiya, mga estratehiya sa pagpamaligya, ug ang impluwensiya sa kalibotan sa kalingawan subsob nga adunay labawng impluwensiya kon unsay gusto sa iglesya, kon sa unsang paagi kini maglihok ug kon unsay itanyag niini, kay sa Pulong sa Diyos.”