“Bukha Lang ang Imong mga Mata ug Tan-aw”
UNSAY makita sa imong mga anak? Gubat? Krimen? Polusyon? Kakabos? Sakit? Tinuod, kini sila maoy anaa-kanunay nga mga tinuod nga panghitabo. Apan gitudloan mo ba sila sa pagtan-aw saylo sa maong mga butang ngadto sa kahibulongang umaabot nga gisaad diha sa Bibliya? Ang mga ginikanan sa nuybe-anyos nga si Joel Pierson nagbuhat niini. Unsay resulta?
Tagda kon unsay gisulat ni Joel bahin sa ulohang “Bukha Lang ang Imong mga Mata ug Tan-aw.” Kining topikoha gihatag ingong usa ka asaynment sa panulat alang sa mga batan-on sa usa ka tunghaan sa distrito sa Virginia, T.B.A. Matikdi kon sa unsang paagi ang sinulat ni Joel, nga gipatik sa mantalaang The Central Virginian, Agosto 22, 1996, nagpadayag nga ang iyang paglaom gibase sa iyang nakat-onan gikan sa Pulong sa Diyos. Misulat siya:
“Bukha lang ang imong mga mata ug tan-aw, sa tanang katahoman nga gituyo nga maingon.
“Dili ba kaha kahibulongan ang pagmata usa ka buntag ug pagkabati nga wala nay polusyon? Inay sa pagpatay ug krimen nga maoy balita, ang kalinaw ug kalipay anaa sa mga kinabuhi sa katawhan.
“Ang mga silingan nagbuhat nga nagkahiusa aron tabangan ang usa ka higala sa pagtukod sa iyang balay. Sa duol, atong makita ang uban nga nagatanom sa usa ka tanaman. Dili lamang kini, apan putli ang ilang mga motibo. Ang tanan nagkausa sa pagtinabangay sa usag usa. Wala na unyay kabos nga mga tawo, ug aduna unyay daghang pagkaon sa pagtagana sa mga panginahanglan. Aduna unyay panaghiusa ug kalinaw sa tibuok kalibotan. Wala na gayoy gutomon o masakit pa. Adunay maanindot nga mga palibot nga matan-aw sa tanan ug tan-awa, ang usa ka bata nagsakay sa usa ka tigre! Dili lang ang tigre kondili ang tanang hayop may pakigdait uban sa mga tawo.
“Buot kong mopuyo sa usa ka dapit nga ingon niini. Buot ba nimong mopuyo didto uban kanako?”
Ang Diyos tinuod bang nagsaad sa mga panalangin nga sama sa gibatbat dinhi sa batan-ong si Joel? Sa pagkatinuod, siya nagsaad! Palihog buksi ang imong Bibliya ug basaha ang maong mga saad nga makaplagan sa Salmo 46:8, 9; 67:6; 72:16; Isaias 2:3, 4; 11:6-9; 33:24; 65:17-25; Mateo 6:9, 10; 2 Pedro 3:13; Pinadayag 21:3, 4.