Kahilwasan sa Dalan Alang sa Kaihalasan
SINULAT SA KORESPONSAL SA PAGMATA! SA BRITANYA
USA ka gatos ka libong sora ug ingon ka daghan sa mga hedgehog ug mga koneho, apil ang 40,000 ka badger, 5,000 ka ngiwngiw, ug kapin sa usa ka milyong baki ang nangamatay sa kadalanan sa Britanya matag tuig. Ang gabon ug ang kangitngit sa tingtugnaw nakaamot sa pagpamatay sa kaihalasan pinaagi sa mga kotse nga nagpaturatoy diha sa mga haywey. Sagad molikay ang mga drayber aron dili mapatay ang hayop apan unya magdaot sa ilang sakyanan o gani mabangga sa nagsugat nga sakyanan. Kini usahay mosangpot sa pagkawala sa tawhanong kinabuhi. Human maaksidente nga naglangkit sa usa ka hayop, daghang drayber ang nag-antos sa mga epekto sa pagkaaksidente, ug sumala sa mga taho sa polis, gatosgatos ang wala na makapadayon sa ilang mga panaw.
Sa pipila ka haywey sa Britanya, ang mga awtoridad nagtaod ug espesyal nga mga replektor aron hadlokon ang mga osa nga mopalayo sa mga dalan. Sa dihang madan-agan ang mga replektor sa pangunang mga suga sa kotse, kini mohatag ug panagway sa mga mata sa oso! Sa laing dapit, ang mga kahoy gitanom nga halayo sa dalan kay sa naandan aron mohatag sa mga drayber ug mas maayong panglantaw sa bisan unsang kaihalasan nga anaa sa unahan. Sa Tinipong Bansa, ang ubang motorista nagtaod ug mga pito sa ilang mga sakyanan nga mopatunghag high-frequency nga kabanha kon ang sakyanan nagdagan ug kapin sa 55 kilometros matag oras. Ang paghuros sa hangin diha sa pito mopatunghag 60-desibel nga gikusgon sa tingog nga dili madungog sa tawo apan tin-awng madungog sa kaihalasan. Ang kasangkapan napamatud-ang labing epektibo diha sa mga hayop nga may nag-atubang nga mga dalunggan. Gitaho sa mga polis nga ang pagkabanggaay sa osa mius-os sa 50 porsiyento diha sa usa ka pagsulay nga ginamit ang pito.
Unsaon nimo paglikay sa kapeligrohan ug sa wala-kinahanglanang paglaglag sa kaihalasan diha sa kadalanan? Inigmaneho nimo, ilabina sa panahon sa tingtugnaw o sa gabii, pagmenor ug sunda ang mga timaan sa dalan nga magpaalerto kanimo sa pagkaanaa sa mga hayop.